Kinaadlaw nga Pagbasa
PAGBASA I
Neh 2:1-8
Pagbasa tikang han basahan ni Nehemias nga manaragna.
Usa ka adlaw, paglabay hin upat ka bulan, han nakaon hi emperador Artajerjes, gintagayan ko hiya han bino. Waray pa gud hiya makakita ha akon nga mabidoon, sanglit nagpakiana hiya, “Kay ano nga mabidoon ka pagkit-on? Diri ka man masakit. Kay ano nga diri ka man malipayon?” Nahadlok ako ngan ginbaton ko hiya, “Mabuhi unta hin kadayonan an hadi! Uunanhon ko nga diri ako magmabidoon kon naruba man an syudad nga ginlubngan han akon kaapoy-apoyan ngan ginsunog an iya mga ganghaan?” Nagpakiana an emperador, “Ano man an imo karuyag?” Nag-ampo ako ngadto han Dyos han Langit, ngan katapos nagsiring ako ha emperador, “Kon ikalipay ako han emperador ngan kon pamatian niya an akon hangyo, tugoti ako hin pagkadto han tuna han Juda, ngadto han syudad nga ginlubngan han akon kaapoy-apoyan, basi akon pag-aydon na liwat an syudad.” Pinamatian an akon hangyo han emperador (samtang nasapit ha iya an iya asawa). Ginpakianhan ako niya kon maiha ba ako didto ngan kon san-o ako mabalik, ngan ginsumatan ko hiya.
Niyan naghangyo ako ha iya nga tagan ako niya hin mga surat ngadto han mga gobernador han Lalawigan han Katundan-han-Eufrates, basi ako paagion nira ngadto ha Juda. Naghangyo liwat ako hin surat ngadto kan Asaf nga tinaporan han mga kagurangan han hadi basi ako katagan hin kahoy para han mga ganghaan han kota nga nagbabantay han Templo, para han mga pader han syudad, ngan para han balay nga akon pag-uokyan. Iginhatag ha akon han emperador an ngatanan nga akon ginhangyo, kay upod ko man an Dyos.
An Pulong han Ginoo.
SALMO RESPONSORIO
Sal 137:1-2, 3, 4-5, 6
(b) Pumilit unta an akon dila ha baba, kon mangalimot ako ha imo!
1. Nanlingkod ngan nagtangis kami
ha ligid han mga salog han Babilonia,
dida han amon paghinumdom han Sion.
Iginsab-ong namon an amon mga arpa
ha mga kahoy nga hirani didto.
(b) Pumilit unta an akon dila ha baba, kon mangalimot ako ha imo!
2. Ginpakanta kami hadton mga nagbihag ha amon;
ginsiring kami pagliaw ha ira:
“Kantahi kami hin kanta hiunong han Sion!”
(b) Pumilit unta an akon dila ha baba, kon mangalimot ako ha imo!
3. Uunanhon namon pakagkanta han kanta han Ginoo
didto hin langyaw nga tuna?
Diri na gud ako unta makagtokar liwat han arpa,
kon hingalimtan ko ikaw, O Jerusalem!
(b) Pumilit unta an akon dila ha baba, kon mangalimot ako ha imo!
4. Diri na gud ako unta makagkanta liwat
kon diri ako mahinumdom ha imo,
kon diri ako maghunahuna ha imo
sugad hin akon gilalabawi nga kalipay!
(b) Pumilit unta an akon dila ha baba, kon mangalimot ako ha imo!
EBANGHELYO
Lc 9:57-62
Pagbasa tikang han santos nga ebanghelyo sumala kan Lucas.
Samtang naglalakat hira ha dalan, nagsiring in usa ka tawo kan Jesus, “Masunod ako ha imo bisan ngain.” Ginsiring hiya ni Jesus, “May mga buho an mga miro ngan may mga salag an katamsihan, kundi waray ngani dapit nga sadang kapahuwayan an Anak han Tawo.” Nagsiring hi Jesus ha lain nga tawo, “Sunod ha akon.” Kundi nagsiring adto nga tawo, “Tugoti ako anay hin pag-uli ngan paglubong han akon amay.” Binaton hi Jesus, “Asay papaglubnga an mga patay han ira kalugaringon nga minatay. Kundi ikaw, lakat ngan igwali an Ginhadian han Dyos.” Nagsiring in usa pa nga tawo, “Masunod ako ha imo; kundi tugoti ako anay pagkadto ngan pagpanamilit han akon panimalay.” Nagsiring hi Jesus ha iya, “Diri angay han Ginhadian han Dyos an bisan hin-o nga kinapot na han arado ngan nagliliningi pa.”
An Ebanghelyo han Ginoo.