PAGBASA I

Bar 1:15-22

Pagbasa tikang han basahan ni Baruc nga manaragna.

Amo ini an pagkompisal nga iyo pagbubuhaton: “Matadong an Ginoo nga amon Dyos, kundi putos pa kami hin kaawod. Ngatanan kami—an mga tawo han Juda, an mga naukoy ha Jerusalem, an amon kahadian, an amon mga punoan, an amon kapadian, an amon mga manaragna, ngan an amon kaapoy-apoyan, puro ginpakaalohan, kay nakasala kami han Ginoo nga amon Dyos ngan sinupak kami ha iya. Waray kami mamati ha iya o mag-ukoy hin kinabuhi sumala han iya mga sugo. Tikang han adlaw han paggawara han Ginoo han amon kaapoy-apoyan ha Ehipto ngada yana nga adlaw, nagpadayon kami hin pag-ato ha iya, ngan waray kami mag-alang hin pagsupak ha iya. Hadto pa han paggawara han Ginoo han amon kaapoy-apoyan ha Ehipto, basi makahatag hiya ha amon hin usa nga hura ngan malangbo nga tuna, iya kami gintunglo pinaagi kan Moises nga iya surugoon. Ngan yana nag-aantos kami tungod hadto nga mga pagtunglo ha amon. Diniri kami hin pagsugot han pulong han Ginoo nga amon Dyos nga iya iginhimangraw ha amon pinaagi han mga manaragna. Ginbuhat lugod namon ngatanan an amon karuyag ngan nagpadayon kami han amon kalugaringon nga magraot nga mga paagi. Dinangop kami han iba nga kadiyosan ngan nagbuhat kami han mga butang nga napupungtan han Ginoo.”

An Pulong han Ginoo.

SALMO RESPONSORiO          

Sal 79:1b-2, 3-5, 8, 9

(b) Talwasa kami, Ginoo, tungod han himaya han imo ngaran.

1. O Dyos, ginsulong han mga Hentil

an tuna han imo mga tawo!

Ginhugawan nira an imo baraan nga Templo

ngan ginbayaan an Jerusalem nga bungkag na.

Ginbayaan nira nga kaonon han katamsihan

an mga lawas han imo mga tawo,

para han ihalas nga kamanampan

an mga lawas han imo mga surugoon.

(b) Talwasa kami, Ginoo, tungod han himaya han imo ngaran.

2. Ginpaawas nira sugad hin tubig

an dugo han imo mga tawo;

inawas an dugo sugad hin tubig

ha bug-os nga Jerusalem,

ngan waray nahisalin paglubong han mga minatay.

Gin-iintrimisan kami han mga nasod palibot namon;

gintitinawaan ngan gin-uuyan-uyan kami nira.

Tubtob san-o an imo kasina ha amon,

O Ginoo? Kadayonan ba?

Magpapadayon ba paglaga sugad hin kalayo

an imo kasina?

(b) Talwasa kami, Ginoo, tungod han himaya han imo ngaran.

3. Ayaw kami pagkastigoha

tungod han mga sala han amon kaapoy-apoyan,

kundi kalooyi kami yana,

kay waray na gud kami paglaom.

(b) Talwasa kami, Ginoo, tungod han himaya han imo ngaran.

4. Buligi kami, O Dyos nga amon magtaralwas,

tungod han imo kalugaringon nga kadungganan;

bawia kami ngan pasayloa an amon mga sala,

basi pagdayawon ka han mga tawo.

(b) Talwasa kami, Ginoo, tungod han himaya han imo ngaran.

EBANGHELYO

Lc 10:13-16

Pagbasa tikang han santos nga ebanghelyo sumala kan Lucas.

Nagsiring hi Jesus, “Kamakaharadlok an mahinanabo ha imo, Corasin! Kamakaharadlok an mahinanabo ha imo liwat, Betsaida! Kon an mga milagro nga ginbuhat dinhe ha imo didto pagbuhata ha Tiro ug Sidon, maiha na unta nga linmingkod an mga tawo didto, nagbado hin sako, ngan nagsabrag hin agbon ha ira ngahaw, hin pagpakita nga nagbasol na hira han ira mga sala! Mas kalolooyan pa han Dyos an Tiro ug Sidon, kay ha iyo, ha Adlaw han Paghukom. Ngan para ha imo Capernaum, karuyag mo ba mag-undong han imo kalugaringon ngadto ha langit? Ilalabog ka ngadto ha impyerno!” Nagsiring hi Jesus ha iya mga tinun-an, “Namamati ha akon an bisan hin-o nga namamati ha iyo; nasalikway ha akon an bisan hin-o nga nasalikway ha iyo; ngan nasalikway han nagsugo ha akon an bisan hin-o nga nasalikway ha akon.”

An Ebanghelyo han Ginoo.