PAGBASA I 

Bar 4:5-12, 27-29

Pagbasa tikang han basahan ni Baruc nga manaragna.

Pagmadasigon kamo, mga tawo ko, kamo nga nagpadayon nga diri hingalimtan an ngaran han Israel. Iginbaligya kamo ngadto hin Hentil nga mga nasod, kundi diri tuyo an pagpuo ha iyo. Tungod kay gintukso niyo an Dyos nga masina, igintubyan kamo niya ngadto han iyo mga kaaway. Han paghalad niyo hin mga halad nga tinubod ngadto hin mga yawa, ngan diri ngadto han Dyos, iyo gintukso nga masina hiya nga naghimo ha iyo. Hingalimtan niyo an Waray Katapusan nga Dyos nga nagpakaon ha iyo han bata pa kamo, ngan kahuman ginbido niyo an Jerusalem nga daw usa niyo nga iroy. Kinita an Jerusalem nga ginkastigo kamo han Dyos kay nasina an Dyos ha iyo, ngan nagsiring an Jerusalem han ngatanan nga higrani nga mga syudad,

“Tan-awa an dako nga kakurian nga iginhatag ha akon han Dyos. Kinita ako han akon mga anak nga ginhalin nga mga bihag, usa nga pagkabihag nga inabot ha ira tikang han waray katapusan nga Dyos. Ginpatubo ko an akon mga anak ha dako nga kalipay, kundi nagtangis ngan nagmabidoon ako han paghibulag nira ha akon. Waray unta malipay in bisan hin-o tungod han akon pag-antos yana nga balo na ako nga babaye ngan damo han akon mga anak in nabihag ha akon. Ginsalikway nira an Balaod han Dyos ngan an ira mga sala naghimo ha akon nga usa nga binayaan nga syudad.

“Pagmadasigon kamo, mga anak ko, ngan pangaraba han Dyos hin pakibulig. Ginkastigo kamo niya, kundi diri hiya mangangalimot ha iyo. Sugad nga hadto gintuyo niyo hin pagpahirayo sa Dyos, yana balik kamo ngadto ha ira dara in napulo ka pilo nga pagtalinguha hin pag-alagad ha iya. Hiya nga nagdara ha iyo hini nga mga karat-an, amo an magtatalwas ha iyo ngan magdadara ha iyo hin waray kataposan nga kalipay.”

An Pulong han Ginoo.

SALMO RESPONSORIO

Sal 69:33-35, 36-37

(b) Namamati an Ginoo hadton nagkikinahanglan.

1. Malilipay an mga magpakalolooy kon makakita hira hini;

madadasig adton mga nagsisingba han Dyos.

Namamati an Ginoo hadton mga nagkikinahanglan,

ngan diri nalilimot han iya katawhan ha bilanggoan.

Pagdayawa an Dyos, langit ug tuna,

an kadagatan ngan ngatanan nga mga binuhat dida ha ira!

(b) Namamati an Ginoo hadton nagkikinahanglan.

2. Tatalwason niya an Sion,

ngan titindogon liwat an mga bungto han Juda;

mag-uokoy didto an iya mga tawo

ngan ira aangkonon an tuna;

panunundon ito han mga tulin han iya mga surugoon,

ngan mag-uokoy didto adton mga nahigugma ha iya.

(b) Namamati an Ginoo hadton nagkikinahanglan.

EBANGHELYO    

Lc 10:17-24

Pagbasa tikang han santos nga ebanghelyo sumala kan Lucas.

Binalik nga puno hin kalipay an kapitoan kagduha (72) nga kalalaken-an ngan nagsiring, “Ginoo, sinugot ha amon bisan an mga yawa, han pagsugoa namon ha imo ngaran!” Ginbaton hira ni Jesus, “Hinkit-an ko hi Satanas nga nahulog sugad hin kikidlat tikang ha langit. Pamati! Gintagan ko kamo hin gahom, basi tamakan niyo an mga halas ngan mga bungad, ngan an ngatanan nga gahom han kaaway, ngan waray bisan ano nga makakadaot ha iyo. Kundi pagkalipay kamo, diri tungod nga sinusugot kamo han magraot nga espiritu; kundi lugod pagkalipay kamo, kay nahisurat na an iyo mga ngaran didto ha langit.”

Hito ngahaw nga panahon nalipay hi Jesus pinaagi han Espiritu Santo, ngan nagsiring, “Amay, Ginoo han langit ug tuna! Nagpapasalamat ako ha imo, kay iginpakita mo ha mga diri mag-aram an imo gintago tikang han mga may-ada aram ug hibaro. Oo, Amay ko, natuman ini, kay amo man an imo karuyag ug pagbuot. “Iginhatag ha akon han akon Amay an ngatanan nga mga butang. Waray nakilala han Anak labot han Amay, ngan waray nakilala han Amay labot han Anak ngan hadton mga ginpili han Anak hin pagpahayag ha iya.”

Kahuman, inatubang hi Jesus ha mga tinun-an ngan ginhilit hira hin pagsiring, “Kapalaran niyo hin pagkita han mga butang nga iyo hinkit-an! Susumatan ko kamo nga damo nga mga manaragna ngan mga hadi an karuyag kumita han iyo hinkit-an, kundi waray hira makakita, ngan mamati han iyo hinbabatian, kundi waray hira makabati.”

An Ebanghelyo han Ginoo.