PAGBASA I 

Jon 3:1-10

Pagbasa tikang han basahan ni Jonas nga Manaragna.

Nagyakan na liwat kan Jonas an Ginoo. Nagsiring hiya, “Kadto ha Ninibe, hito nga bantogan nga syudad, ngan igsangyaw ha mga tawo an mensahe nga iginhatag ko ha imo.” Sanglit ginsugot ni Jonas an Ginoo ngan kinadto hiya ha Ninibe nga usa nga hiluag kaupay nga syudad nga tulo gud ka adlaw an paglatas hini. Nagtikang hi Jonas hin paglatas han syudad ngan kahuman niya paglinakat hin usa ka adlaw, nagsangyaw hiya, “Kwarenta na la ka adlaw ngan pagbubungkagon na an Ninibe!” Tinmoo han mensahe han Dyos an mga tawo ha Ninibe. Sanglit nagkasarabot hira nga kinahanglan magpuasa an tagsatagsa, ngan magbado hin sako an ngatanan nga mga tawo, tikang han gilalabawi ngadto han giuubosi ha pagpakita nga nagbasol hira.

Han pakabati hini han hadi han Ninibe, linusad hiya ha iya trono, ginlubas an iya bado nga hilaba, nagbado hiya hin sako, ngan liningkod hiya dida hin mga agbon. Nagpagawas hiya hin usa nga pasangyaw ngadto han mga tawo ha Ninibe: “Usa ini nga sugo tikang han hadi ngan han iya mga opisyal: Waray bisan usa nga kumaon hin bisan ano; gindidid-an hin pagkaon o pag-inom an ngatanan nga mga tawo, kabakahan, ngan kakarnerohan. Kinahanglan magbado hin sako an ngatanan nga mga tawo ngan mga mananap. Kinahanglan an tagsatagsa mag-ampo hin kinasingkasing ngadto han Dyos ngan kinahanglan bayaan an magraot niya nga mga panggawi ngan an mga magraot niya nga mga binuhatan. Manggad na la magliwat an Dyos han iya hunahuna; manggad na la umukoy na hiya hin kasina ngan diri kita magkamatay!” Hinkit-an han Dyos an ira ginbuhat; hinkit-an niya nga binayaan nira an magraot nira nga mga panggawi. Sanglit ginliwat niya an iya hunahuna ngan waray hira pagkastigoha sumala han iya ginsaad ha ira.

An Pulong han Ginoo.

SALMO RESPONSORIO

Sal 130:1b-2, 3-4ab, 7-8

(b) Kun ikaw, Ginoo, magtigaman han amon mga sala, hin-o in mabubuhi?

1. Ha butnga han akon pagturaw, O Ginoo,

natawag ug nasangpit ako ha imo.

Pamatii, Ginoo, an akon mga pangamuyo,

dungga an akon pangaro han tambulig nimo.

(b) Kun ikaw, Ginoo, magtigaman han amon mga sala, hin-o in mabubuhi?

2. Kon manumdom ka han amon mga kasal-anan,

hin-o man an diri kasisirotan?

Kundi ha amon ikaw napasaylo,

sanglit magsusugot gud kami ha imo.

(b) Kun ikaw, Ginoo, magtigaman han amon mga sala, hin-o in mabubuhi?

3. O Israel, an Ginoo paglaomi,

kay an iya gugma dayuday gud pirme,

ngan andam hiya hin katalwasan pagserbi.

Tutobson niya an mga tawo han Israel,

han ngatanan nira nga mga pagsupil.

(b) Kun ikaw, Ginoo, magtigaman han amon mga sala, hin-o in mabubuhi?

EBANGHELYO    

Lc 10:38-42

Pagbasa tikang han santos nga ebanghelyo sumala kan Lucas.

Samtang nagpadayon hi Jesus ngan an iya mga tinun-an ha ira paglakaton, inabot hiya ngadto hin usa nga baryo, diin gin-abiabi hiya ngadto ha iya balay hin usa nga babaye nga ginngangaranan kan Marta. May-ada bugto hi Marta nga Maria an ngaran, nga liningkod ha tiilan han Ginoo ngan namati han iya gintututdo. Nalisang hi Marta han iya damo nga mga buruhaton; sanglit dinaop hiya ngan nagsiring, “Ginoo, diri ka ba nababaraka nga ginpapabay-an la ako han akon bugto pagbuhat han ngatanan nga buruhaton ha balay? Sidnga daw nga buligan ako niya!” Binaton ha iya an Ginoo, “Marta, Marta! Naguguol ngan nababaraka ka hin damo nga mga butang, kundi usa la an kinahanglanon. Ginpili ni Maria an labi ka maupay nga butang, ngan diri na ini maaagaw ha iya.”

An Ebanghelyo han Ginoo.

_____________

Mahihimo gamiton ini nga mga pagbasa:

PAGBASA I 

Buhat 1:12-14

Pagbasa tikang han mga  Buhat han mga Apostol.

Kahuman han pagsaka ni Jesus ngadto langit, binalik an mga apostoles ngadto ha Jerusalem tikang ha Bukid han mga Olibo, nga may usa ka kilometro an kahirayo tikang ha syudad.

Sinulod hira ha Jerusalem ngan sinaka han kwarto nga inuokyan nira Pedro, Juan, Santiago, Andres, Felipe, Tomas, Bartolome, Mateo, Santiago nga anak ni Alfeo, Simon nga bayani, ug Judas nga anak ni Santiago. Agsob hira magkatitirok hin pag-ampo kaupod an kababayen-an, pati hi Maria nga iroy ni Jesus, ngan an iya kabugtoan nga kalalaken-an.

An Pulong han Ginoo.

SALMO RESPONSORIO

Lc 1:46-47, 48-49, 50-51, 52-53, 54-55

(b) Dagko nga mga butang an ginbuhat para ha akon han Makagarahum; baraan an iya ngaran.

1.Nagdadayaw an akon kalag han Ginoo;

naglilipay an akon kasingkasing

dida han Dyos nga akon Manunubos,

(b) Dagko nga mga butang an ginbuhat para ha akon han Makagarahum; baraan an iya ngaran.

2. Kay nahinumdoman ako niya,

an iya ubos nga surugoon!

Tikang yana tatawgon ako

nga baraan han ngatanan nga katulinan,

tungod han dagko nga mga butang

nga ginbuhat para ha akon

han Makagarahum nga Dyos.

Baraan an iya ngaran.

(b) Dagko nga mga butang an ginbuhat para ha akon han Makagarahum; baraan an iya ngaran.

3. Nagpapakita hiya hin kalooy

hadton mga nahadlok ha iya,

tikang ha usa ngadto han sunod nga katulinan.

Ginpakita niya an kusog han iya butkon,

ngan ginpasarang niya

an mga mapahitas-on ha kasingkasing.

(b) Dagko nga mga butang an ginbuhat para ha akon han Makagarahum; baraan an iya ngaran.

4. Ginpukan niya in gamhanan nga mga hadi

tikang han ira mga trono,

ngan ginpahitaas niya an mga mapainubsanon.

Ginbusog niya hin mag-upay nga mga butang

an mga gutom,

ngan ginpalakat niya an mga riko nga waray dara.

(b) Dagko nga mga butang an ginbuhat para ha akon han Makagarahum; baraan an iya ngaran.

5. Gintuman niya an iya iginsaad

ha aton mga kaapoy-apoyan,

ngan binuligan niya an Israel nga iya surugoon;

nahinumdom hiya hin pagkalooy kan Abraham

ngan ha ngatanan

nga iya katulinan ha kadayonan!

(b) Dagko nga mga butang an ginbuhat para ha akon han Makagarahum; baraan an iya ngaran.

EBANGHELYO    

Lc 1:26-38

Pagbasa tikang han santos nga ebanghelyo sumala kan Lucas.

Han burod ni Isabel hin unom ka bulan, ginsugo han Dyos hi Gabriel nga anghel ngadto ha Galilea, ha usa nga bungto nga Nazaret an ngaran. May dara hiya nga sumat para hin usa nga daraga nga sinayoran na hin lalake nga ginngaranan kan Jose, nga tulin ni Hadi David. Maria an ngaran hini nga daraga. Kinadto an anghel ha iya ngan nagsiring, “Maghimaya ka! Puno ka hin grasya! An Ginoo aada ha imo!” Dako an kagupong ni Maria han iginpasabot han anghel, ngan ginpainoino niya kon ano an kahulogan han iya mga pulong. Nagsiring ha iya an anghel, “Ayaw kahadlok, Maria, kay ginpalabi ka han Dyos. Magbuburod ngan mag-aanak ka hin lalake, ngan pagngangaranan mo hiya nga Jesus. Mahihimo hiya nga dako nga pagkatawo ngan tatawgon nga Anak han Gihahataasi nga Dyos. Hihimoon han Ginoo nga Dyos nga hadi hiya, sugad kan David nga iya ginikanan, ngan mahihimo hiya nga hadi ha kadayonan han mga tulin ni Jacob; an iya ginhadian waray kataposan!” Hi Maria nagsiring han anghel, “Uray ngan putli ako. Uunanhon man hin kahimo hini?” Nagbaton an anghel, “Makunsad ha imo an Espiritu Santo, ngan magpapabilin ha imo an gahom han Dyos. Tungod hini, tatawgon nga Anak han Dyos ini nga santos nga bata. Kitaa! Hi Isabel nga imo urupod bisan kon baw-as hiya ngan lagas na kaupay yana, burod na hin unom ka bulan. Kay waray butang nga diri mahihimo han Dyos.” Nagsiring hi Maria, “Iini ako nga surugoon han Ginoo. Matuman unta dinhe ha akon sumala han imo pulong.” Ngan binayaan hiya han anghel.

An Ebanghelyo han Ginoo.