PAGBASA I 

Jl 4:12-21

Pagbasa tikang han basahan ni Joel nga manaragna.

Nasiring an Ginoo, “Kinahanglan mag-andam an mga nasod ngan kumadto han Kahamub-an han Paghukom. Didto malingkod ako nga Ginoo hin paghukom han ngatanan nga nagpapalibot nga mga nasod. Magraot gud hira hin duro; garaba hira sugad hin mga aranihon ha panahon hin kat-ani; pugaa hira sugad hin pagpuga hin mga ubas dida hin puno nga piriihan hin bino tubtob nga mag-awas an bino.” Yinukotyukot an aadto han Kahamub-an han Paghukom. Aadto didto aabot an diri na maiha nga adlaw han Ginoo. Magsisirom an adlaw ug bulan, ngan diri na gud nasilaw an mga bitoon. Masinggit an Ginoo tikang ha Bukid Sion; mag-aaningal an iya tingog tikang ha Jerusalem; mangungurog an tuna ug langit. Kundi pananalipdan niya an iya katawhan.

“Niyan, Israel, mahibabaro kamo nga amo ako an Ginoo nga iyo Dyos. Nag-uokoy ako ha Sion, an akon baraan nga bukid. Mahihimo nga baraan nga syudad an Jerusalem; diri na gud ini pagsasakopon hin mga lumalangyaw. Hito nga panahon maluluob hin mga urubasan an kabukiran, ngan hiaagian in kabakahan dida han tagsa nga pungtod; mahuhura hin tubig an bug-os nga Juda. Mag-aawas in sapa tikang han Templo han Ginoo, ngan pagtutubigan hini an Kahamub-an han Akasya. “Mahihimo nga kamingawan an Ehipto, ngan sugad man an Edumea. Kay ginsulong nira an tuna han Juda ngan pinanmatay an waray sala nga iya mga tawo. Mabulos ako tungod hadton mga pinanmatay; papatayon ko ngatanan an mga salaan. Kundi pag-uokyan ha kadayonan an Juda ug Jerusalem, ngan mag-uokoy ako nga Ginoo dida ha Bukid Sion.”

An Pulong han Ginoo.

SALMO RESPONSORIO

Sal 97:1-2, 5-6, 11-12

(b) Paglipay, kamo nga magtadong,

dida han Ginoo.

1. Hadi an Ginoo! Pagkalipay, tuna!

Kapupod-an ha dagat, pagkalipay na!

Magdakmol nga dampog nalibot ha iya;

matadong ug husto an paghadi niya.

(b) Paglipay, kamo nga magtadong,

dida han Ginoo.

2. Natutunaw bisan adton kabukiran,

sugad hin taro ha iya atubangan;

kay amo gud hiya an Ginoo gudman,

an Ginoo han bug-os nga kalibutan.

Iginsasangyaw na hadton kalangitan

ha ngatanan adton iya katadongan;

ngan han mga nasod ini hinkikit-an.

An himaya niya kita han katawhan.

(b) Paglipay, kamo nga magtadong,

dida han Ginoo.

3. Nasilaw an lamrag ha mga magtadong,

an mga mag-upay nagmamalipayon;

rayhak ha Ginoo, magtadong ngatanan,

iya baraan ngaran pasalamatan.

(b) Paglipay, kamo nga magtadong,

dida han Ginoo.

EBANGHELYO    

Lc 11:27-28

Pagbasa tikang han santos nga ebanghelyo sumala kan Lucas.

Kahuman ni Jesus pagyakan hini, may nagyakan nga babaye dida han kadam-an ngan nagsiring ha iya, “Pagkapalaran han babaye nga nag-anak ngan nagpasuso ha imo!” Kundi binaton hi Jesus, “Lugod pagkapalaran hadton mga namamati ngan nagtutuman han pulong han Dyos!”

An Ebanghelyo han Ginoo.