PAGBASA I 

2 Hadi 5:14-17

Pagbasa tikang han Ikaduha nga basahan han Kahadian.

Linugsong ha Jordan hi Naaman ngan linurop hiya makapito sumala han iginsiring ni Eliseo, ngan naupay gud hiya. Nagmaupay ngan nagmahamis na an iya lawas sugad hin kanan bata.

Binalik hiya kan Eliseo upod an ngatanan niya nga mga tawo ngan nagsiring, “Yana maaram na ako nga waray iba nga diyos kundi an Dyos la han Israel; sanglit karawata gad inin akon regalo.”

Binaton hi Eliseo, “Sugad nga buhi an Dyos nga akon gin-aalagad, diri ako makarawat hin regalo.” Nagpirit hi Naaman nga karawton niya kundi diniri gud hiya. Sanglit nagsiring hi Naaman, “Kon diri ka makarawat han akon regalo, tagi ako hin tuna nga duha ka karga hin mula nga dadad-on ko hin pag-uli, kay tikang yana, diri na ako maghahalad ngadto hin iba nga diyos kundi ngadto la han Ginoo.”

An Pulong han Ginoo.

SALMO RESPONSORIO

Sal 98:1, 2-3, 3-4

(b) Iginpahayag han Ginoo ngadto han mga nasud an iya matalwason nga gahum.

1. Bag-o nga kanta ha Ginoo kantahon,

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon.

(b) Iginpahayag han Ginoo ngadto han mga nasud an iya matalwason nga gahum.

2. An Ginoo amo’n nagpahibaro na

han iya pagdarag-an, iya victorya;

ha mga nasod ginpahibaro niya

adton iya gahom nga nagtatalwas pa.

Saad ha Israel gintuman gud niya

upod dayuday pag-unong, paghigugma.

(b) Iginpahayag han Ginoo ngadto han mga nasud an iya matalwason nga gahum.

3. Pagdarag-an han aton Dyos an nakita

han mga katawhan ha tanan nga tuna.

Magrugyaw ha Ginoo, tanan nga tuna,

pagrayhak hin kanta, pagdayawa hiya.

(b) Iginpahayag han Ginoo ngadto han mga nasud an iya matalwason nga gahum.

PAGBASA I 

2 Tim 2:8-13

Pagbasa tikang han Ikaduha nga Surat ni San Pablo ngadto kan Timoteo.

Hinumdomi hi Jesu-Cristo nga tulin ni David, nga ginbanhaw, sumala han Maupay nga Sumat nga akon iginwali. Nag-aantos ako kay nagwawali ako han Maupay nga Sumat, ngan kinadenahan pa ngani ako pareho hin kriminal. Kundi diri kinadenahan an pulong han Dyos, ngan tungod hini gin-iilob ko an ngatanan para han kaupayan han mga pinili nga mga tawo han Dyos, basi makaangkon hira liwat han katalwasan nga aada kan Cristo Jesus, upod an waray kataposan nga himaya. Matuod ini nga darahunon: “Kon mamatay kita upod ha iya, mabubuhi man kita upod ha iya. Kon magpadayon kita hin pag-ilob, maghahadi man kita upod ha iya. Kon iglirong ta hiya, iglilirong man kita niya. Kon diri kita magmatinumanon, nagpapadayon gihapon hiya kamatinumanon, kay diri hiya matipa han iya kalugaringon.”

An Pulong han Ginoo.

EBANGHELYO    

Lc 17:11-19

Pagbasa tikang han santos nga ebanghelyo sumala kan Lucas.

Han tipakadto hi Jesus ha Jerusalem, nag-agi hiya ha pag-ultan han Samaria ug Galilea. Tipakadto hiya hin usa nga baryo nga tapoon hiya hin napulo nga mga sanlahon. Tay-aw la ini hira. Naggoliat hira hin pagsiring, “Jesus! Agaron! Kalooyi gad kami!” Hinkit-an hira ni Jesus ngan ginsiring, “Kadto na, ngan pausisa kamo han kapadian.” Nalinisan hira han tipakadto pa la hira. Usa ha ira, han pakakita nga upay na hiya, binalik nga nagdadayaw han Dyos hin dako nga tingog. Hinapa hiya ha tiilan ni Jesus hin pagpasalamat ha iya. Usa hiya nga Samaritano. Nagyakan hi Jesus, “Napulo man adto hira nga nagkalilinisan; hain naman an siyam? Kay ano nga ini la nga diri dinhianon an binalik hin pagpasalamat han Dyos?” Ngan nagsiring hi Jesus ha iya, “Buhat ngan lakat. An imo pagtoo amo an nakaupay ha imo.”

An Ebanghelyo han Ginoo.