PAGBASA I 

Rom 1:1-7

Pagbasa tikang han Surat ni San Pablo ngadto han mga taga Roma.

Tikang kan Pablo nga surugoon ni Cristo Jesus ngan apostol nga pinili ngan tinawag han Dyos hin pagwali han Maupay nga Sumat. Maiha na nga iginsaad han Dyos an Maupay nga Sumat pinaagi han iya mga manaragna, ngan iginsurat dida han Baraan nga Kasuratan. Mahitungod ini han iya Anak nga aton Ginoo Jesu-Cristo: ha iya pagkatawo, tulin hiya ni David; ha iya dyosnon nga pagkabaraan, iginpakita hiya nga makagarahom nga Anak han Dyos pinaagi han iya pagkabanhaw ha mga minatay. Pinaagi ha iya kinarawat ko tikang han Dyos an katungdanan han pagkaapostol, basi tungod kan Cristo dad-on ko ngadto ha pagtoo ngan pagsugot an katawhan ha ngatanan nga mga nasod. Upod man liwat kamo nga aada ha Roma nga gintawag han Dyos basi magin sakop ni Jesu-Cristo. Sanglit nagsusurat ako ha iyo ngatanan nga aada ha Roma, nga mga hinigugma han Dyos ngan gintawag nga magin iya kalugaringon nga mga tawo: Tagan unta kamo han Dyos nga aton Amay ngan han Ginoo Jesu-Cristo han grasya ngan han kamurayaw.

An Pulong han Ginoo.

SALMO RESPONSORIO

Sal 98:1bcde, 2-3ab, 3cd-4

(b) Ginpahibaro han Ginoo an iya pagtalwas.

1. Bag-o nga kanta ha Ginoo kantahon,

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon.

(b) Ginpahibaro han Ginoo an iya pagtalwas.

2. An Ginoo amo'n nagpahibaro na

han iya pagdarag-an, iya victorya;

ha mga nasod ginpahibaro niya

adton iya gahom nga nagtatalwas pa.

Saad ha Israel gintuman gud niya

upod dayuday pag-unong, paghigugma.

(b) Ginpahibaro han Ginoo an iya pagtalwas.

3. Pagdarag-an han aton Dyos an nakita

han mga katawhan ha tanan nga tuna.

Magrugyaw ha Ginoo, tanan nga tuna,

pagrayhak hin kanta, pagdayawa hiya.

(b) Ginpahibaro han Ginoo an iya pagtalwas.

EBANGHELYO    

Lc 11:29-32

Pagbasa tikang han santos nga ebanghelyo sumala kan Lucas.

Han nagdadaisog an mga tawo nga naglilibot kan Jesus, nagpadayon hiya hin pagsiring, “Pagkamaraot han mga tawo hini nga panahon! Nangangaro hira hin milagro, kundi waray ihahatag ha ira labot han milagro ni Jonas. Sugad nga nagin tigaman hi Jonas nga manaragna para han mga tawo ha Ninibe, magigin tigaman man an Anak han Tawo para han mga tawo hini nga panahon. Ha Adlaw han Paghukom, matindog an Rayna ha Seba, ngan isusumbong an mga tawo hini nga panahon, kay nagbaktas hiya tikang han iya natawohan nga tuna hin pamati la han makinaadmananon nga pagtutdo ni Solomon; ngan susumatan ko kamo, aanhi in labaw pa kan Solomon. Ha Adlaw han Paghukom matindog an mga tawo ha Ninibe ngan igsusumbong kamo, kay binmaya hira han ira mga sala han pakabati nira han pagwali ni Jonas; ngan susumatan ko kamo, aanhi in labaw pa kan Jonas!

An Ebanghelyo han Ginoo.