PAGBASA I 

Rom 2:1-11

Pagbasa tikang han Surat ni San Pablo ngadto han mga taga Roma.

Sangkay ko, naghuhukom ka ba han iba? Kon sugad, diri ka makakabaribad bisan kon hin-o ka. Kay kon ha imo paghukom han iba, ginbubuhat mo liwat an mga butang nga ginbubuhat nira, naghuhukom ka la ngahaw ha karat-an han imo kalugaringon. Maaram kita nga matadong an paghukom han Dyos hadton mga tawo nga nagbubuhat hin sugad hini nga mga butang. Kundi, sangkay ko, kon naghuhukom ka hadton mga nagbubuhat hini nga mga butang nga imo liwat ginbubuhat, makakalikay ka ba han paghukom han Dyos? O gintatamay mo ba an dako nga kalooy han Dyos ngan an iya pagpaumaya ngan pagpailob? Diri ka ba maaram nga maloloy-on an Dyos kay tinguha niya nga magbasol ka? Kundi matig-a an imo ulo ngan kubalan na an imo kasingkasing. Sanglit imo ginhihimo nga madarudako an imo sirot ha Adlaw han pagpadayag han Dyos han iya kapungot ngan han iya matadong nga paghukom. Kay magbabalos an Dyos han kada tawo sumala han iya nabuhat. May-ada mga tawo nga nagpapadayon hin pagbuhat hin maupay ngan nangingita han himaya han Dyos, kadungganan, ngan kinabuhi nga waray kamatayon; ihahatag ha ira han Dyos an waray kataposan nga kinabuhi. Ihuhuwad han Dyos an iya kapungot ngan kasina ngadto han iba nga mga tawo nga naghuhunahuna la han ira kalugaringon, ngan nasalikway han matadong basi magbuhat han maraot. Pagpapaantoson ngan pagsasakiton an ngatanan nga nagbubuhat hin maraot, syahan an mga Judiyo, ngan sugad man an mga Hentil. Kundi mahatag an Dyos hin kadarayawon, kadungganan, ngan kalinaw ha ngatanan nga nagbubuhat hin maupay, syahan ha mga Judiyo, ngan sugad man ha mga Hentil. Kay waray han Dyos pinalabi.

An Pulong han Ginoo.

SALMO RESPONSORIO

Sal 62:2-3, 6-7, 9

(b) Ginoo, nabalos ka han tagsa nga tawo

sumala han iya mga binuhatan.

1. An Dyos gudla an akon gintataporan,

natikang ha iya an ak’ katalwasan.

Hiya'n panalipod, magtaralwas nakon,

akon salipdanan, di’ ak’ pipirdehon.

(b) Ginoo, nabalos ka han tagsa nga tawo

sumala han iya mga binuhatan.

2. An Dyos gudla an akon gintataporan,

hiya gudla an akon ginlalaoman.

Hiya’n ak’ magtaralwas ngan salipdanan,

kabulig ko hiya, w'ray ko kapirdehan.

(b) Ginoo, nabalos ka han tagsa nga tawo

sumala han iya mga binuhatan.

3. Katawhan ko, an Dyos amo an sarigan,

ha ngatanan nga mga kapanahonan;

sumati han tanan mo nga kakurian,

kay amo man hiya'n aton arayopan.

(b) Ginoo, nabalos ka han tagsa nga tawo

sumala han iya mga binuhatan.

EBANGHELYO

Lc 11:42-46

Pagbasa tikang han santos nga ebanghelyo sumala kan Lucas.

An Ginoo nagsering: “Pagkamakaharadlok para ha iyo, mga Parisiyo! Nahatag kamo ha Dyos han ikanapulo ka bahin han mga panakot, sugad han tanglad, kanila, ngan iba pa nga mga panakot, kundi ginpapabay-an niyo an katadongan ngan an paghigugma han Dyos. Kinahanglan unta buhaton niyo ini, hin waray pagpasibaya han iba. “Pagkamakaharadlok para ha iyo, mga Parisiyo! Karuyag niyo an linain nga mga lingkoran ha mga sinagoga, ngan an paghatag ha iyo hin katalahoran han mga tawo didto ha mga taboan. Pagkamakaharadlok para ha iyo! Sugad kamo hin mga lubnganan nga waray tigaman nga tinatamakan han mga tawo, kay diri man hira maaram.”

Nagsiring ha iya in usa han mga magturutdo han Balaod, “Magturutdo, kon nasiring ka hini ginpapakaalohan nimo kami!” Binaton hi Jesus, “Pagkamakaharadlok para ha iyo liwat, mga magturutdo han Balaod! Ginpapabug-atan niyo an mga tawo hin mga magkuri nga darad-on, kundi diri ngani kamo nabulig bisan han iyo tudlo hin pag-alsa han darad-on.”

An Ebanghelyo han Ginoo.