PAGBASA I     

Rom 3:21-30

Pagbasa tikang han Surat ni San Pablo ngadto han mga taga Roma.

Mga kabugtoan: Kundi yana iginpadayag na an kanan Dyos paagi hin pagmatadong han tawo, ngan waray labot hini in balaod, bisan kon nagpapamatuod hini an Balaod ni Moises ngan an mga manaragna. Gin-iisip nga matadong ha atubangan han Dyos an mga tawo pinaagi han ira pagtoo kan Jesu-Cristo. Ginbubuhat ini han Dyos han ngatanan nga natoo kan Cristo, kay pareho la an mga tawo: nagpakasala an ngatanan nga mga tawo ngan nawad-an hira han himaya han Dyos. Kundi pinaagi han libre nga hatag han grasya han Dyos, iniisip niya hira ngatanan nga matadong, pinaagi kan Cristo Jesus nga nagtatalwas ha ira. Iginhalad hi Cristo han Dyos, basi pinaagi han iya kamatayon, mahimo hiya nga paagi nga mapasaylo an mga sala han mga tawo, pinaagi han ira pagtoo ha iya. Ginbuhat ini han Dyos basi igpakita niya an iya pagkamatadong. Ha una nga panahon mapasayloon an Dyos ngan pinabay-an la an mga tawo han ira mga sala. Kundi yana nga panahon gintatagad na niya an mga sala han mga tawo, ha pagpakita han iya pagkamatadong. Dida hini nagpapakita an Dyos nga hiya ngahaw matadong ngan gin-iisip niya nga matadong an ngatanan nga natuo kan Jesus.

Niyan, ano man ngay-an an aton sadang iparayaw? Waray! Ngan ano an rason hini? Tungod ba nga nagtutuman kita han Balaod? Diri, kundi tungod nga natoo kita. Kay sayod kita nga gin-iisip nga matadong ha Dyos an tawo pinaagi la han iya pagtuo ngan diri pinaagi hin pagtuman han Balaod. Ngan an Dyos, Dyos ba la hiya han mga Judiyo? Diri ba hiya Dyos liwat han mga Hentil? Oo, Dyos gihapon hiya. Uusa la an Dyos ngan gin-iisip niya nga matadong an mga Judiyo pinaagi han ira pagtoo, ngan an mga Hentil man pinaagi liwat han ira pagtoo.

An Pulong han Ginoo.

SALMO RESPONSORIO

Sal 130:1b-2, 3-4, 5-6ab

℟. Aada han Ginoo an kalooy ug kahingitan han katalwasan.

1. Ha butnga han akon pagturaw, O Ginoo,

natawag ug nasangpit ako ha imo.

Pamatii, Ginoo, an akon mga pangamuyo,

dungga an akon pangaro han tambulig nimo.

℟. Aada han Ginoo an kalooy ug kahingitan han katalwasan.

2. Kon manumdom ka han amon mga kasal-anan,

hin-o man an diri kasisirotan?

Kundi ha amon ikaw napasaylo,

sanglit magsusugot gud kami ha imo.

℟. Aada han Ginoo an kalooy ug kahingitan han katalwasan.

3. Naghihinulat ako han bulig han Ginoo,

ngan han iya mga pulong natapod ako.

Ngan naghuhulat ako han Ginoo,

labaw pa han mga sirino nga naghuhulat

han kaagahon nga bag-o.

℟. Aada han Ginoo an kalooy ug kahingitan han katalwasan.

EBANGHELYO            

Lc 11:47-54

Pagbasa tikang han santos nga ebanghelyo sumala kan Lucas.

An Ginoo nagsering: “Pagkamakaharadlok para ha iyo! Naghihimo kamo hin makaruruyag nga mga lubnganan para han mga manaragna—an mga manaragna ngahaw nga pinamatay han iyo mga kaapoy-apoyan. Kamo ngahaw natangdo nga nauyon kamo han ginbuhat han iyo mga kaapoy-apoyan; kay ginpatay nira an mga manaragna, ngan gintindog niyo an ira mga lubnganan. Tungod hini nga pangatadongan, nagsiring an Kinaadman han Dyos: ‘Padadad-an ko hira hin mga manaragna ngan mga magsarangyaw; papatayon nira in pira ha ira ngan pagtitimaraotan an iba.’ Sanglit kakastigohon an mga tawo hini nga panahon, tungod han pagpataya han ngatanan nga mga manaragna tikang pa han paghimoa han kalibutan, tikang han pagpataya kan Abel, ngadto han papataya kan Zacarias nga ginpatay ha butnga han altar ngan han baraan nga dapit. Oo, susumatan ko kamo, kakastigohon an mga tawo hini nga panahon tungod ha ira ngatanan! “Pagkamakaharadlok para ha iyo, mga magturutdo han Balaod! Gintago niyo an yawi nga nag-aabre han porta ngadto han balay hin hibaro; kamo ngahaw diri nasulod, ngan gindidid-an pa niyo adton karuyag sumulod!” Han pagbaya na ni Jesus hadto nga dapit, nagtikang an mga magturutdo han Balaod ngan an mga Parisiyo hin pagsuson ha iya, ngan pagpakiana ha iya mahitungod hin damo la nga mga butang, nga nagtalingoha hira hin pagbitik ngan pagdakop ha iya dida hin sayop nga iya igyayakan.

An Ebanghelyo han Ginoo.