PAGBASA I

Rom 4:1-8

Pagbasa tikang han Surat ni San Pablo ngadto han mga taga Roma.

Niyan, ano man an masisiring mahitungod kan Abraham nga amay han aton tulin? Kon gin-isip hiya nga matadong han Dyos pinaagi han iya mga buhat, may-ada unta niya sadang iparayaw. Kundi diri hiya makakaparayaw ha atubangan han Dyos. Nasiring an Kasuratan, “Tinoo han Dyos hi Abraham, ngan tungod han iya pagtoo, gin-isip hiya nga matadong han Dyos.” An suhol han tawo nga nagkakabudlay diri ini hatag ha iya, kundi katungod niya hin pagkarawat. Diri an tawo nga may mga buhat, kundi an tawo nga may pagtoo, nga natoo han Dyos nga nakakapamatadong han nakakasala, ini nga pagtoo niya an kinakarawat han Dyos, ngan gin-iisip hiya nga matadong. Amo ini an karuyag sidngon ni David han iya paghimangraw mahitungod han kalipayan han tawo nga gin-iisip nga matadong han Dyos, labot hin bisan ano nga ginbuhat hito nga tawo: “Palaran hira kanay mga kasaypanan ginpasaylo han Dyos, kanay mga sala iya ginpara! Palaran an tawo kanay mga sala diri na hinunumdoman han Ginoo!”

An Pulong han Ginoo.

SALMO RESPONSORiO          

Sal 32:1b-2, 5, 11

℟. Ginoo, ikaw an akon taragoan; ginpupuno mo ako hin kalipay han katalwasan.

1. Malipayon adton mga ginpasaylo,

han ira mga sala ug mga pag-ato.

Palaran an tawo nga diri paghukman,

han Ginoo han iya mga karat-an;

ngan waray dida ha iya kinabuhi,

an mga paglimbong, mga pagtiyupi.

℟. Ginoo, ikaw an akon taragoan; ginpupuno mo ako hin kalipay han katalwasan.

2. Niyan ngada ha imo akon gintug-an,

waray ko tagoa mga kasaypanan;

karuyag ko gud hin pagtug-an ha imo,

ngan an mga sala ko imo ginpasaylo.

℟. Ginoo, ikaw an akon taragoan; ginpupuno mo ako hin kalipay han katalwasan.

3. Paglipay ngan pagrayhak ngatanan kamo,

kamo adton mga magtadong nga tawo;

tungod kay ginbuhat ha iyo han Ginoo,

an iyo kalipay igoliat niyo.

℟. Ginoo, ikaw an akon taragoan; ginpupuno mo ako hin kalipay han katalwasan.

EBANGHELYO

Lc 12:1-7

Pagbasa tikang han santos nga ebanghelyo sumala kan Lucas.

Han nagdadaisog an yinukotyukot nga mga tawo, sanglit nagtitinamakay na hira, nagsiring anay hi Jesus ha iya mga tinun-an, “Pagbantay kamo kontra han patubo han mga Parisiyo an karuyag ko sidngon, an pagkasalingkapaw.

“Mabubuksan an bisan ano nga tinahoban, ngan mahibabaroan an tagsa nga tinago. Sanglit, an bisan ano nga imo iginyakan ha kasisidman, mahibabatian ha kapaw-an; ngan an bisan ano nga imo iginhoring ha sinadhan nga kuwarto igogoliat ha mga atop. “Kasangkayan ko, susumatan ko kamo, ayaw kamo kahadlok hadton mga nakakamatay han lawas, kundi katapos waray na nira nahihimo. Pakikitaon ko kamo han angay kahadlokan: kahadloki an Dyos nga kahuman niya pamatay, may gahom hin paglabog ha iyo ngadto ha impyerno! “Diri ba iginbabaligya hin duha ka sintabo an lima nga mga tamsi nga balinsasayaw? Kundi waray gud usa ha ira nga hinngangalimtan han Dyos. Gin-ihap na nga daan an ngatanan nga mga buhok han iyo ulo. Sanglit ayaw kamo kahadlok; labaw pa gud kamo hin kamahal kay hin damo nga katamsihan nga balinsasayaw!

An Ebanghelyo han Ginoo.