PAGBASA I     

Ex 17:8-13

Pagbasa tikang han Basahan han Exodo.

Nagkaabot an mga Amalekanhon ngan ginsulong nira an mga Israelita didto ha Refidim. Nagsiring kan Josue hi Moises, “Pagpili hin kalalaken-an nga makadto buwas hin pakig-away han mga Amalekanhon. Matindog ako ha bawbaw han pungtod ngan kakaptan ko an tungkod nga iginpadara ha akon han Dyos.” Ginbuhat ni Josue sumala han iginsugo ha iya ni Moises ngan ginmawas hi Josue hin pakig-away han mga Amalekanhon, samtang sinmagka hira Moises, Aaron ug Hur ngadto ha bawbaw han pungtod. Nakakadaog an mga Israelita kon binabayaw ni Moises an iya mga butkon, kundi nakakadaog an mga Amalekanhon kon ipinapaubos niya an iya mga butkon. Han pagbutlawa na han mga butkon ni Moises, kinuha hira Aaron ug Hur hin usa nga bato nga ginpalingkuran kan Moises, samtang nagtindog hira sapit kan Moises ngan gin-alsa nira an mga butkon ni Moises nga diri magtipaubos, tubtob han katunod han adlaw. Hini nga paagi ginpirde ni Josue an mga Amalekanhon.

An Pulong han Ginoo.

SALMO RESPONSORIO

Sal 121:1-2, 3-4, 5-6, 7-8

℟. An aton tabang natikang han Ginoo,

nga naghimo han langit ug tuna.

1. Tinan-aw ak’ ngadto hadton kabukiran;

diin ba titikang adton akon tabang?

Akon tabang natikang han Ginoo man,

nga naghimo han tawo ngan kalangitan.

℟. An aton tabang natikang han Ginoo,

nga naghimo han langit ug tuna.

2. Diri hiya matugot nga mapukan ka,

imo panalipod pirme nagmamata.

Panalipod han Israel pagtan-awa,

diri piraw ngan di’ nakaturog hiya.

℟. An aton tabang natikang han Ginoo,

nga naghimo han langit ug tuna.

3. Magbabantay gud ha imo an Ginoo,

sapit nimo hiya pagpandong ha imo.

Kapaso han adlaw di’ ka maaano,

O bulan ha gab-i di’ ka mapapaso.

℟. An aton tabang natikang han Ginoo,

nga naghimo han langit ug tuna.

4. Tikang han ngatanan mga kataragman,

tatalwason ka han Dyos, pananalipdan.

Ha imo pag-abot ngan imo paggikan,

bantay mo h’ya yana ngan ha kadayonan.

℟. An aton tabang natikang han Ginoo,

nga naghimo han langit ug tuna.

PAGBASA Ii   

2 Tim 3:14-4:2

Pagbasa tikang han Ikaduha nga Surat ni San Pablo ngadto kan Timoteo.

Hinigugma: Pagpadayon han igintutdo ha imo nga mga kamatuoran ngan rig-ona an imo pagtoo. Nakilala ka han imo mga magturutdo, ngan hinunumdoman mo nga tikang pa han imo pagkabata, hinbaroan mo na an Baraan nga Kasuratan, nga nakakahatag ha imo hin kinaadman nga nagtugway ha imo ngadto han katalwasan, pinaagi hin pagtoo kan Cristo Jesus. An bug-os nga Kasuratan ginsurat ha pag-aghat han Dyos ngan mapulsanon para pagtutdo han kamatuoran, pagsaway han kasaypanan, pagtadong han baliko nga mga buhat, ngan pagtutdo hin matadong nga kinabuhi, basi an tawo nga nag-aalagad han Dyos matakos ngan masangkap hin hingpit nga pagtuman han ngatanan nga mag-upay nga mga buhat.

Gin-aaghat ko ikaw ha atubangan han Dyos ngan ni Cristo-Jesus nga maghuhukom han ngatanan nga mga tawo nga buhi ngan mga minatay, ngan tungod han iya pag-abot ngan han iya Ginhadian, nagsusugo ako ha imo: Iwali an mensahe, magmaduruto ka hin pagsangyaw hini, (bisan kon igo o diri pa igo an panahon); kabiga, sawaya, dasiga, ngan tutdoi nga mailobon an mga tawo.

An Pulong han Ginoo.

EBANGHELYO             

Lc 18:1-8

Pagbasa tikang han santos nga ebanghelyo sumala kan Lucas.

Niyan, nagsumat hin pananglitan hi Jesus ha iya mga tinun-an hin pagtutdo ha ira nga kinahanglanon an dayuday nga pag-ampo, ngan diri gud magturaw. “May-ada hadto usa nga maghurukom hin usa nga bungto, nga waray pagkahadlok han Dyos ngan waray pagtahod han mga tawo. Ngan may-ada balo nga babaye hito ngahaw nga bungto, nga nagkikinadto hin pakimalooy ha iya: ‘Buligi gad ako kontra han akon kaaway!’ Hin maiha nga panahon ginpasibay-an la ini han maghurukom, kundi ha kataposan nagsiring an maghurukom ha iya ngahaw, ‘Bisan kon waray ako pagkahadlok han Dyos o pagtahod han mga tawo, kundi tungod kay nakakasamok man ha akon ini nga balo nga babaye, tatalingohaon ko nala nga katagan hiya han iya katungod; kay kon diri ko ini sugaron, magbibinalikbalik hiya nganhi ngan bangin ako kaubosan hin pag-ilob, tungod han iya padayon nga pagbinalikbalik!’” Ngan nagpadayon an Ginoo, “Paghunahunaa daw an iginsiring hadto nga maraot nga maghurukom. Niyan, kon maghukom an Dyos diri ba hiya maugop han iya kalugaringon nga mga tawo nga nasangpit ha iya adlaw gab-i hin pakibulig? Maglalangan ba hiya hin pagbulig ha ira? Susumatan ko kamo, maugop hiya ha ira, ngan bubuhaton ito dayon niya. Kundi kon bumalik na an Anak han Tawo, makakaagi ba hiya hin pagtoo dinhe ha tuna?”

An Ebanghelyo han Ginoo.