Kinaadlaw nga Pagbasa
Pagbasa para han:
___________________
Martes han Ikakaruhaan nga Semana han Katuigan
PAGBASA I
Rom 5:12, 15b, 17-19, 20b-21
Pagbasa tikang han Surat ni San Pablo ngadto han mga taga Roma.
Mga kabugtoan: Nakasulod ha kalibutan an sala pinaagi hin usa ka tawo, ngan nagdara hin kamatayon an iya sala. Tungod hini an ngatanan nga mga tawo nahiagom han kamatayon, kay nakasala man an ngatanan nga mga tawo.
Matuod nga damo an nagkamatay tungod han sala hadto nga usa ka tawo. Kundi labaw pa gud ka dako an grasya han Dyos ngan sugad man an iya hatag ngadto han kadam-an nga mga tawo, pinaagi han grasya han usa ka tawo, hi Jesu-Cristo. Matuod ito nga pinaagi han sala han usa ka tawo, nagtikang paghadi an kamatayon, tungod hadto nga usa ka tawo. Kundi labaw pa gud ka dako an bunga han ginbuhat han usa nga tawo nga amo hi Jesu-Cristo! Maghahadi pinaagi kan Cristo adton ngatanan nga nakarawat han hura nga grasya han Dyos ngan han hatag han Dyos han iya pagkamatadong. Sanglit sugad nga tungod han usa nga sala nasirotan an ngatanan nga mga tawo; ha amo man nga paagi, tungod han usa nga matadong nga buhat natatalwas an ngatanan nga mga tawo, ngan natatagan hira hin kinabuhi. Ngan sugad nga tungod han pagtalapas hin usa ka tawo nahimo nga makasasala in damo nga mga tawo, sugad man tungod han pagsugot han usa ka tawo, pag-iisipon nga matadong ha Dyos in damo nga mga tawo.
Kundi kon hain magdugang an sala, naglabaw pa hin ka dako an grasya han Dyos. Sanglit sugad nga naghadi an sala pinaagi han kamatayon, sugad man naghahadi an grasya han Dyos pinaagi han pagkamatadong, nga nagtutugway ha aton ngadto ha kinabuhi nga dayon pinaagi kan Jesu-Cristo nga aton Ginoo.
An Pulong han Ginoo.
SALMO RESPONSORIO
Sal 40:7-8a, 8b-9, 10, 17
℟. Aadi ako, Ginoo, pagtuman
han imo kaburut-on.
1. Diri ka naruruyag hin mga halad-sinunog ngan mga halad;
diri ka nangangaro hin mga mananap
nga ginsunog hin bug-os ha halaran,
o mga halad-sinunog pagkuha hin mga sala.
Gintagan mo lugod ako
hin mga igdurungog pamati ha imo,
sanglit binmaton ako, “Iini ako.”
℟. Aadi ako, Ginoo, pagtuman
han imo kaburut-on.
2. “Aada ha basahan han Balaod
an imo mga tugon para ha akon.
Hin kamaruruyagon ko pagbuhat
han imo kaburut-on, O Dyos ko!
Tinitipigan ko ha akon kasingkasing
an imo pagturon-an.”
℟. Aadi ako, Ginoo, pagtuman
han imo kaburut-on.
3. Iginsumat ko an maupay nga sumat
nga nagtatalwas ka,
dida han katig-oban han ngatanan nimo
nga mga tawo, O Ginoo.
Maaram ka nga diri gud ako mahunong pagsinumat hito.
℟. Aadi ako, Ginoo, pagtuman
han imo kaburut-on.
4. Magrayhak ngan magmalipayon unta
an ngatanan nga nadangop ha imo!
Dayuday sumiring unta an ngatanan
nga nahigugma han imo katalwasan,
“Hin pagkadako gud han Ginoo!”
℟. Aadi ako, Ginoo, pagtuman
han imo kaburut-on.
EBANGHELYO
Lc 12:35-38
Pagbasa tikang han santos nga ebanghelyo sumala kan Lucas.
Nagsiring hi Jesus ha iya mga tinun-an, “Pag-andam dayuday kamo han bisan ano nga maabot, nga daan hinugtan ha hawak an iyo mga panapton, ngan daan dinagkotan an iyo mga suga, sugad hin mga surugoon nga naghuhulat han ira agaron pagbalik tikang hin kombite han pagkasal. Aabrehan nira dayon an porta para ha iya, kon umabot ngan magtuktok hiya. Palaran adton mga surugoon nga hiabtan han agaron nga nagmamata ngan andam han iya pagbalik! Susumatan ko kamo, magbabakos hiya, palilingkoron niya hira ha pangaraonan, ngan pagdudurotan hira. Palaran hira kon hiabtan hira nga andam, bisan kon umabot hiya ha katutnga, o ha kaagahon na!”
An Ebanghelyo han Ginoo.
___________________
Pyesta ni San Pedro Calungsod
PAGBASA I
2 Mac 7:1-2, 9-14
Pagbasa tikang han ikaduha nga Basahan han Macabeo.
Ha lain nga higayon gindakop in usa nga Judiyo nga iroy ngan han pito niya nga mga anak nga kalalaken-an. Iginpalatob hira han hadi ha pagpirit ha ira hin pagkaon hin karne nga baboy. Niyan nagsiring an usa han kalalaken-an, “Ano an iyo ginpapaabot nga kaupayan ha pagbuhat niyo hini? Gabay pa kami magkamatay kay magtalapas kami han mga pamatasan han amon kaapoy-apoyan.” Kundi dida han harapit na hiya mamatay, iya ginggoliatan an hadi, “Ikaw nga paraihaw! Makakahimo ka hin pagpatay ha amon, kundi babanhawon kami han Hadi han bug-os nga kalibutan ngan tatagan kami hin dayon nga kinabuhi, kay ginsugot namon an iya mga balaod.” Nagtikang an mga sondalo hin pagkalipay dida han ikatulo nga bugto. Han pagsugoa ha iya hin paggawas han iya dila, ginbuhat ini dayon niya. Niyan iya iginduhol nga waray pagkahadlok an iya mga kamot ngan nagsiring, “Iginhatag ini ha akon han Dyos. Kundi labaw ha akon an iya mga balaod kay han akon mga kamot, ngan maaram ako nga gibabalik liwat ini ngahaw ha akon han Dyos.” Nahiburong an hadi ngan adton mga kaupod niya han iya kamaisog ngan han iya kaandam hin pag-antos. Han kamatay na niya, ginpasakitan han mga sondalo an ikaupat nga bugto ha amo ngahaw nga waray kalooy nga paagi, kundi amo ini an kataposan niya nga mga pulong, “Nalilipay ako hin kamatay pinaagi han iyo mga kamot, kay waray ruhaduha nga babanhawon kami han Dyos. Kundi waray gud pagkabanhaw para ha imo, Antioco!”
An Pulong han Ginoo.
SALMO RESPONSORIO
Sal 112:1-2, 5-6, 7-8ab,9
℟. Malipayon an tawo nga maloloy-on
ngan napautang hadton nagkikinahanglan.
1. Dayawon an Ginoo!
Malipayon an tawo nga natahod han Ginoo,
nga nalilipay pagtuman han iya mga sugo!
An mga anak han tawo nga buotan,
dinhe ha tuna magagamhanan;
magmamalipayon an iya katulinan.
℟. Malipayon an tawo nga maloloy-on
ngan napautang hadton nagkikinahanglan.
2. Palaran an tawo nga diri makuri utangan,
ngan tangkod an iya mga binuhatan.
Diri mapapakyas an tawo nga buotan,
ngan dayuday diri ini hira hingangalimtan.
℟. Malipayon an tawo nga maloloy-on
ngan napautang hadton nagkikinahanglan.
3. Hiya an tawo nga waray kahadlokan,
han magraot nga sumat nga iya hinbabatian;
an pagtoo niya may-ada kadig-onan,
kay Ginoo la an iya sinasarigan.
Waray niya kabaraka ug kagupong,
waray dida ha iya an kamahadlokon.
℟. Malipayon an tawo nga maloloy-on
ngan napautang hadton nagkikinahanglan.
4. Hadton mga kablas hiya mahinatagon,
waray utlanan an iya kamaloloy-on;
hiya an magigin makagarahum,
ngan takus man liwat pagtahoron.
℟. Malipayon an tawo nga maloloy-on
ngan napautang hadton nagkikinahanglan.
PAGBASA II
2 Cor 9: 6-10
Pagbasa tikang han Ikaduha nga Surat ni San Pablo ngadto han mga taga Corinto.
Hinumdomi niyo ini: an magtanom hin gutiay la, mag-aani liwat man hin gutiay la an abot; an magtanom hin damo, damo man liwat an abot. Sanglit kinahanglan humatag an tagsatagsa sugad han iya karuyag, hin waray pagngurutob o paghunahuna nga ginpirit la hiya, kay nahigugma an Dyos hadton mga nahatag nga malipayon. Ngan mahatag ha iyo an Dyos hin labaw pa han iyo ginkikinahanglan, basi dayuday mamay-ada kamo han ngatanan nga ginkikinahanglan niyo, ngan labaw pa han kasadangan para han maupay nga panuyo. Sugad han siring han Kasuratan: “Mahinatagon gud hiya ngadto han mga kablas; waray katapusan an iya pagkalooy.” Ngan an Dyos nga nahatag hin binhe ngadto han magsarabod ngan tinapay nga karaonon, mahatag man liwat ha iyo han ngatanan nga binhe nga iyo kinahanglanon, ngan magpapatubo han binhe basi makahatag hin damo nga aranihon tikang han iyo kamahinatagon.
An Pulong han Ginoo.
EBANGHELYO
Jn 12:24-26
Pagbasa tikang han santos nga ebanghelyo sumala kan Juan.
Nagsiring hi Jesus ha iya mga tinun-an, Nagsusumat ako ha iyo hin tinuod: An usa ka lugas nga trigo nagpapabilin hin ka usa la ka lugas nga trigo labot kon mahulog ha tuna ngan katak-opan. Kon katak-opan na, mabunga hin damo nga mga lugas. Mawawad-an han iya kalugaringon an nahigugma han iya kinabuhi; kundi makakaangkon lugod han kinabuhi nga dayon adton nagdudumot han iya kinabuhi dinhe hini nga kalibutan. Kinahanglan magsunod ha akon an karuyag magsirbe ha akon, basi kon hain ako, aadto man an akon surugoon. Pagpapasidunggan han akon Amay an magsirbe ha akon.”
An Ebanghelyo han Ginoo.