PAGBASA I 

Rom 6:12-18

Pagbasa tikang han Surat ni San Pablo ngadto han mga taga Roma.

Mga kabugtoan: Kinahanglan diri na maghadi an sala dida ha iyo lawas nga may kamatayon, basi diri na niyo pagtumanon an iyo lawasnon nga mga karuyagon. Ngan kinahanglan diri na niyo itubyan ha sala an bisan ano nga bahin han iyo lawas para hin magraot nga katuyoan. Lugod ihatag sa Dyos an iyo kalugaringon sugad nga mga tawo nga ginbanhaw na, ngan itubyan ha iya an iyo bug-os nga lawas para hin matadong nga katuyoan. Kinahanglan diri na maghadi ha iyo an sala; kay diri na kamo nag-uukoy ha ilarom han Balaod, kundi ha ilarom na han grasya han Dyos.

Ta, ano man? Magpipinakasala ba kita, kay diri man ngay-an kita aada ha ilarom han Balaod, kundi aada kita ha ubos han grasya han Dyos? Diri gud mahihimo! Sayod na kamo nga kon napaoripon kamo hin pagsugot hin usa ka tawo, ha tinuod oripon kamo han agaron nga iyo ginsusugot—kon magsugot kamo han sala, oripon kamo han sala nga nabunga hin kamatayon, o kon magsugot kamo han Dyos iniisip kamo nga matadong sa Dyos. Kundi salamat han Dyos! Kay hadto anay mga oripon kamo han sala; kundi yana nagsusugot na kamo hin kinasingkasing han mga kamatuoran nga aada han pagturon-an nga iyo kinarawat. Natalwas na kamo han sala ngan nahimo kamo nga mga oripon han pagkamatadong.

An Pulong han Ginoo.

SALMO RESPONSORIO

Sal 124:1b-3, 4-6, 7-8

℟. An pagbulig ha aton aada ha ngaran han Ginoo.

1. Kon diri pa dapig ha at’ an Ginoo?

O Israel, pagbatonon ini niyo!

“Kon di’ pa dapig an Ginoo ha aton,

han pagsulong han mga kaaway naton;

bangin buhi kita nga paglalam-oyon,

tungod han duro nga kasina ha aton.

℟. An pagbulig ha aton aada ha ngaran han Ginoo.

2. Bangin kita igin-anod na han baha,

ngan ginlapwas pagud hadton tubig ada.

Hadto pa gud nagkakalulumos kita,

tungod hadton sulog nga nagrurumpat na.”

Ha Ginoo pagpasalamat gud kita

waray h’ya tumogot mapuo kit’ nira.

℟. An pagbulig ha aton aada ha ngaran han Ginoo.

3. Sugad mga tamsi nga nakabuhi na,

tikang hadton bitik nagdakop ha ira.

Adton bitik amo gud adton naruba,

amo ini nga nagpakabuhi kita.

Natikang han Ginoo an tambulig ta,

nga naghimo hadton langit ngan han tuna.

℟. An pagbulig ha aton aada ha ngaran han Ginoo.

EBANGHELYO    

Lc 12:39-48

Pagbasa tikang han santos nga ebanghelyo sumala kan Lucas.

Nagsiring hi Jesus ha iya mga tinun-an, “Tigamni ini: kon maaram la an tagbalay han takna han pag-abot han kawatan, diri gud hiya matugot nga sudlon an iya balay. Ngan pag-andam man liwat kamo, kay maabot an Anak han Tawo ha takna nga diri niyo ginpapamulat hiya.”

Nagsiring hi Pedro, “Ginoo, iginsusumat mo ba ini nga pananglitan para la ha amon, o para ba ini han ngatanan?” Binaton an Ginoo, “Hin-o man ngay-an an matinumanon ngan may-ada aram nga surugoon? Amo hiya an tataporan han iya agaron pagdumara han panimalay ngan paghatag ha iba nga mga surugoon han ira bahin han pagkaon, ha igo nga panahon. Palaran adto nga surugoon nga hiabtan han iya agaron ha iya pagbalik, nga nagbubuhat hini! Susumatan ko kamo hin tinuod, itatapod han agaron hadto nga surugoon an ngatanan nga iya mga manggad. Kundi kon sumiring ha iya ngahaw adto nga surugoon, ‘Maiha pa bumalik an akon agaron,’ ngan magtikang hiya pagpinanlatob han iba nga surugoon nga kalalaken-an ug kababayen-an, ngan pagkinaon, pag-ininom, ngan paghinubog, niyan maoli an agaron ha adlaw nga diri hiya ginpapamulat han surugoon, ngan ha takna nga diri niya hinbabaroan. Pagkakastigohon hiya han iya agaron, ngan paaangbiton hiya han sirot han mga diri magsinugtanon. “An surugoon nga maaram han karuyag igpabuhat ha iya han iya agaron, kundi diri nag-aandam ngan diri nagbubuhat han karuyag han iya agaron, pagkakastigohon hin damo nga paglatob; kundi an surugoon nga diri maaram han karuyag han iya agaron, ngan nagbubuhat hin butang nga angay hin paglatob, pagkakastigohon hin diri damo nga paglatob. An tawo nga gintagan hin damo aaroan hin damo; ngan an tawo nga gintagan hin darudamo aaroan liwat hin darudamo.”

An Ebanghelyo han Ginoo.