PAGBASA I

Rom 7:18-25a

Pagbasa tikang han Surat ni San Pablo ngadto han mga taga Roma.

Mga kabugtoan: Maaram ako nga waray maupay nga nag-uokoy dinhe ha akon. Kay bisan kon may tinguha ako hin pagbuhat hin maupay, kundi diri ako nakakahimo. Diri ko ginbubuhat an maupay nga karuyag ko pagbuhaton; asay ko lugod ginbubuhat an maraot nga diri ko karuyag pagbuhaton. Kon ginbubuhat ko an diri ko karuyag pagbuhaton, karuyag sidngon hini nga diri na ako amo an nagbubuhat hini, kundi an sala nga nag-uukoy dinhe ha akon. Sanglit hinsabtan ko ini nga balaod: nga kon karuyag ko magbuhat hin maupay, an maraot la lugod an akon ginpipili. Nalilipay gud ako han balaod han Dyos ha sag-od han akon kasingkasing. Kundi kinikita ko in lain nga balaod nga aanhi ha akon lawas—usa nga balaod nga natipa han balaod nga inuuyonan han akon hunahuna. Tungod hini nag-ooripon ha akon an balaod han sala nga aanhi ha akon lawas. Kamakalolooy ko nga tawo! Hin-o in magtatalwas ha akon tikang hini nga lawas nga nagdadara ha akon ngadto ha kamatayon? Salamat han Dyos, may-ada ko Magtaralwas, hi Jesu-Cristo nga aton Ginoo!

An Pulong han Ginoo.

SALMO RESPONSORiO          

Sal 119:66, 68, 76, 77, 93, 94

℟. Tutdo-i kami kami Ginoo, han imo mga lagda.

1. Tagi hin kinaadman ug hibaro,

kay han imo mga sugo, natapod ako.

℟. Tutdo-i kami kami Ginoo, han imo mga lagda.

2. Kamaupay mo, pagkamaloloy-on,

an imo mga sugo itutdo ha akon.

℟. Tutdo-i kami kami Ginoo, han imo mga lagda.

3. An imo dayon nga gugma nakakaliaw ha akon,

kay saad man ini ha akon, an imo surugoon.

℟. Tutdo-i kami kami Ginoo, han imo mga lagda.

4. Kalooyi ako ngan mabubuhi ako,

kay nalilipay ako han imo mga sugo.

℟. Tutdo-i kami kami Ginoo, han imo mga lagda.

5. Imo mga tugon diri ko pababay-an,

kay tungod hini, hin kinabuhi ako natagan.

℟. Tutdo-i kami kami Ginoo, han imo mga lagda.

6. Imo na man ako—imo ako tabangan!

Imo mga sugo gintinguha ko hin pagtuman.

℟. Tutdo-i kami kami Ginoo, han imo mga lagda.

EBANGHELYO

Lc 12:54-59

Pagbasa tikang han santos nga ebanghelyo sumala kan Lucas.

Nagsiring hi Jesus ha mga tawo, Nagsiring liwat hi Jesus ngadto han mga tawo, “Kon nakita kamo hin dampog nga tikang ha katundan, nasiring kamo dayon, ‘Mauran gud ada,’ ngan nauran manggud. Ngan kon naabat kamo nga nahangin an timog, nasiring kamo, ‘Magmamapaso ada,’ ngan nagmamapaso manggud. Mga salingkapaw! Nakita la kamo han tuna ngan han langit, ngan nababaro kamo han panahon; kay ano man nga diri kamo nakakahubad han kahulogan hini yana nga panahon?

“Kay ano nga diri man kamo magtirutimbang kon ano an angay buhaton? Kon igsumbong ka hin usa ka tawo, ngan dad-on ka ha hukmanan, talingohaa pakighusay ha iya samtang aada pa kamo ha dalan, basi diri ka danason niya ha atubangan han maghurukom, ngan itubyan ka han maghurukom ngadto han polis, ngan prisohon ka han polis. Susumatan ko kamo, diri ka makakagawas didto, tubtob nga kabaydan mo an multa han kataposan mo nga sintabo.”

An Ebanghelyo han Ginoo.