PAGBASA I 

Sir 35:12-14, 16-18

Pagbasa tikang han Basahan han Sirac.

An Ginoo waray pinili ug waray pinalabi. Diri hiya nagtatamay han mga kablas; kon may-ada nag-aampo tungod kay ginpakaraot hiya, pinamamatian hiya han Ginoo. Kon an mga ilo ug mga balo kinasingkasing an ira mga pag-ampo, diri hiya nagpapakabungol. Pag-alagad nga mahinalangpon han Ginoo ngan kakarawaton ka han Ginoo; an imo mga pag-ampo maabot ngadto ha mga dampog. An mga pag-ampo han mapainubsanon nga tawo nalahos han mga dampog ngan naabot ngadto han Gihahataasi nga Ginoo ngan nagpapabilin didto tubtob han pagbaton niya pinaagi nga an katadongan tumanon gud ngan adton mga salaan kastigohon. Ngan an Ginoo magbubuhat dayon.

An Pulong han Ginoo.

SALMO RESPONSORIO

Sal 34:2-3, 17-18, 19 & 23

℟. Pinamamatian han Ginoo

an pangaraba han mga kablas.

1. Pasalamatan ko pirme an Ginoo,

pagdayaw ha iya di’ maundang ako.

2Tungod han iya buhat ak’ dadayawon,

an ginsakit mamati, magmalipayon!

2. Kontra hiya han nabuhat hin karat-an,

ngan limoton hira han ira katawhan.

An Ginoo namamati han magtadong,

kakurian nira iya kukuhaon.

℟. Pinamamatian han Ginoo

an pangaraba han mga kablas.

3. Hiraniay gad la an aton Ginoo

hadton mga nahuhulop na hin duro.

Tinatalwas niya adton nagugupong,

an nawad-an na han tanan nga paglaom.

Kanan Ginoo nga mga surugoon

han Ginoo manta hira tatalwason;

diri gudman niya hira sisirotan

an naayop ha iya nga panalipdan.

℟. Pinamamatian han Ginoo

an pangaraba han mga kablas.

PAGBASA II          

2 Tim 4:6-8, 16-18

Pagbasa tikang han Ikaduha nga Surat ni San Pablo ngadto kan Timoteo.

An para ha akon, inabot na an takna hin paghalad han akon kalugaringon, aanhi na an panahon nga mabaya ako hini nga kinabuhi. Ginbuhat ko tubtob han akon maabot dida han paisan-isan, ngan natapos ko gud ini, gintipigan ko an pagtoo. Ngan yana igin-andam para ha akon an primyo han pagdarag-an, an pudong-pudong han pagkamatadong, nga hito nga Adlaw, ihahatag ha akon han Ginoo, an matadong nga Maghurukom—ngan diri la ha akon, kundi ha ngatanan nga naghuhulat nga mahigugmaon han iya pagpadayag.

Waray gud may inugop ha akon han syahan ko nga pagpanalipod han akon kalugaringon; ginbayaan ako nira ngatanan. Hinaot unta nga diri ini isipon han Dyos nga supak ha ira! Kundi ginupdan ako han Ginoo ngan gintagan ako hin kusog, sanglit nakagsangyaw ako han bug-os nga mensahe basi makabati an ngatanan nga mga Hentil; ngan nahigawas ako han paghukom ha kamatayon. Ngan tatalwason ako han Ginoo tikang han ngatanan nga karat-an, ngan dadad-on ako niya ngadto han iya langitnon nga Ginhadian. Ha iya an himaya ha kadayonan! Amen.

An Pulong han Ginoo.

EBANGHELYO    

Lc 18:9-14

Pagbasa tikang han santos nga ebanghelyo sumala kan Lucas.

Iginsumat liwat ni Jesus ini nga pananglitan ha mga tawo nga natapod ha ira kalugaringon nga kamaupay, ngan nagtatamay han iba: “Kinadto ha Templo hin pag-ampo in duha ka tawo; Parisiyo an usa, ngan parasukot hin buhis an ikaduha. Tinukdaw nga tay-aw an Parisiyo, ngan nag-ampo: ‘Nagpapasalamat ako ha imo, Dyos, nga diri ako halot, malimbong, o malibog sugad han iba. Nagpasalamat ako ha imo nga diri ako sugad hito nga parasukot hin buhis. Nagpupuasa ako duha ka adlaw kada semana, ngan nahatag ako ha imo han ikanapulo nga bahin han ngatanan ko nga hiagi.’ Kundi tinmukdaw an parasukot hin buhis, hirayo han iba, ngan waray ngani humangad ha langit, kundi nagpukpok han iya dughan ngan nagsiring, ‘O Dyos, kalooyi gad ako nga makasasala!’” Ngan nagsiring hi Jesus, “Susumatan ko kamo, an parasukot hin buhis, diri an Parisiyo an gin-isip nga matadong ha atubangan han Dyos, han pag-oli niya. Kay an magpahitaas han iya kalugaringon pauubson, ngan an magpaubos pahihitas-on.”

An Ebanghelyo han Ginoo.