PAGBASA I
Gnp 7:2-4, 9-14
Pagbasa tikang han Basahan han Ginpadayag.
Hinkit-an ko in lain nga anghel nga tikang ha sinirangan, dara an silyo han buhi nga Dyos. Gintawag niya ha dako nga tingog an upat nga mga anghel nga gintagan han Dyos hin gahom hin pagpuo han tuna ngan han dagat. Nagsiring an anghel, “Ayaw pagpasipad-i an tuna, an dagat, ug an kakahoyan, tubtob nga katigamnan namon han silyo ha ira mga agtang an mga surugoon han amon Dyos.” Ngan ginsumatan ako han kadamoon hadton natigamnan han silyo han Dyos dida ha ira mga agtang: usa kagatos ug kap-atan kag-upat kayukot (144,000) hira ngatanan tikang han ngatanan nga mga tribo han Israel.
Kahuman hini, tinan-aw ako ngan hinkit-an ko in dako nga hugpo hin mga tawo nga diri maiihap. Tikang hira ha magkalainlain nga kanasoran, tribo, pinulongan, ug katawhan. Natukdaw hira ha atubangan han trono ngan han Kordero, ngan nakakasul-ot hira hin busag nga higlawig nga bado, ngan nakakabitbit hira hin mga palwa. Naggoliat hira ha dako nga tingog: “An katalwasan natikang han aton Dyos nga nalingkod ha trono, ngan han Kordero!”
Naglibot han trono an ngatanan nga mga anghel, upod an mga katigurangan, ngan an upat nga buhi nga mga binuhat. Ngan nanhapa hira ha atubangan han trono ngan nagsingba ha Dyos, hin pagsiring: “Amen! An pagdayaw, himaya, kinaadman, pagpasalamat, dungog, gahom, ngan kusog, kanan Dyos ini ngatanan ha dayon nga mga katuigan! Matuman kunta!”
Nagpakiana ha akon in usa han mga katigurangan, “Hira hin-o ini nga mga tawo nga nakakasuklob hin busag nga higlawig nga mga panapton, ngan tikang hira diin?” Binmaton ako, “Diri ako maaram. Ikaw an maaram.” Nagsiring hira ha akon, “Amo ini an mga tawo nga nakailob han makalilisang nga pag-antos. Ginlabhan nira an ira higlawig nga mga bado ngan ginlatakan hira han dugo han Kordero, sanglit nagmabusag.
An Pulong han Ginoo.
SALMO RESPONSORIO
Sal 24:1bc-2, 3-4ab, 5-6
℟. Ginoo, amo ini an bungto nga karuyag kumita ha imo.
1. An Ginoo han kalibutan an tag-iya,
an ngatanan pa nga butang nga aada:
Pati an tuna upod an mga butang,
hiya an tag-ada hini ngatanan.
Ha hilarom nga dagat iya ini gintindog,
didto ha ilarom han tuna iya gin-usok;
ngan ginbutang an mga patukoranan,
didto ha kahiladman han kalalawdan.
℟. Ginoo, amo ini an bungto nga karuyag kumita ha imo.
2. Hin-o an may katungod nga mga tawo,
pagsagka ngadto ha pungtod han Ginoo?
Hin-o in makakahimo hin pagkadto
pagsakob han iya baraan nga Templo?
Amo adton mga putli ha buhat nira,
ngan malinis an ira panhunahuna.
℟. Ginoo, amo ini an bungto nga karuyag kumita ha imo.
3. Pagpapakaupayon gud han Ginoo,
ngan pagtatalwason in sugad nga tawo.
An Dyos amo gud an magpapahibaro,
nga waray hira sala nga bisan ano.
Ini nga mga tawo han Dyos madangop,
ha atubangan han Ginoo ni Jacob.
℟. Ginoo, amo ini an bungto nga karuyag kumita ha imo.
PAGBASA II
1 Jn 3:1-3
Pagbasa tikang han Syahan nga Surat ni San Juan.
Mga kabugtoan: Tan-awa niyo kon ano kadako an paghigugma ha aton han Amay! Dako gud an iya gugma ha aton, sanglit gintawag kita nga mga anak han Dyos—ngan matuod nga mga anak kita niya. Amo ini an hinungdan kay ano nga an kalibutan diri nakilala ha aton: tungod kay an kalibutan waray kumilala han Dyos. Mga hinigugma ko, mga anak na kita yana han Dyos, kundi diri pa gud dayag kon ano an aton aabotan. Kundi maaram kita nga kon magpakita na hi Cristo, masusugad kita ha iya, kay makita kita ha iya, han iya kinaiya. An ngatanan nga may-ada hini nga paglaom kan Cristo, nagputli han ira kalugaringon, sugad nga putli hi Cristo.
An Pulong han Ginoo.
EBANGHELYO
Mt 5:1-12a
Pagbasa tikang han santos nga Ebanghelyo sumala kan Mateo.
Han pakakita ni Jesus han damo nga mga tawo, sinagka hiya hin pungtod ngan didto liningkod hiya. Gin-alirongan hiya han iya mga tinun-an, ngan nagtikang hiya hin pagtutdo ha ira:
“Palaran adton nakilala nga kablas hira ha espiritu, kay ira an Ginhadian han langit! “Palaran adton masulob-on, kay pagliliawon hira han Dyos! “Palaran adton mapinaubsanon, kay kakarawaton nira an iginsaad han Dyos! “Palaran adton may dako nga tinguha pagtuman han kaburut-on han Dyos, kay patutungahon gud hira han Dyos! “Palaran adton maloloy-on ha iba, kay malolooy man an Dyos ha ira! “Palaran adton maglinis in kasingkasing, kay makakakita hira han Dyos! “Palaran adton nagbubuhat para hin kamurayaw ha mga tawo, kay tatawgon hira nga mga anak han Dyos! “Palaran adton ginpapakurian tungod nga nagtutuman hira han kaburut-on han Dyos, kay ira an Ginhadian han langit! “Palaran kamo kon pagbiaybiayon, ngan pagpakurian kamo han mga tawo, ngan pagbutangbutangan kamo tungod la nga akon kamo mga sakop. Pagrayhak ngan paglipay kamo, kay dako an balos nga andam didto ha langit para ha iyo.
An Ebanghelyo han Ginoo.