Syahan nga Misa | Ikaduha nga Misa
________________
SYAHAN NGA MISA
PAGBASA I
Mac 12:43-46
Pagbasa tikang han ikaduha nga Basahan han mga Macabeo.
Nangaro liwat hiya hin amot ha ngatanan niya nga mga tawo, nga inabot hin mga tulo ka kilo nga salapi, ngan iginpadara ini ngadto ha Jerusalem basi gamiton hin paghalad tungod hin sala. Ginbuhat ni Judas ini nga mahinungdanon nga butang kay natoo hiya han pagkabanhaw han mga minatay. Kon waray hiya pagtoo nga babanhawon an mga minatay, tinuyaw la ngan waray gamit an pag-ampo para ha ira. Ha iya marig-on ngan dyosnon nga pagtoo nga an ngatanan nga matinumanon nga mga tawo han Dyos makarawat hin makaaramdok nga balos, naghatag hi Judas para hin usa nga halad tungod hin sala basi adton mga namatay na matalwas ha ira mga sala.
An Pulong han Ginoo.
SALMO RESPONSORIO
Sal 103:8 & 10, 13-14, 15-16, 17-18
℟. An Ginoo maloloy-on ug mahigugmaon.
1. An Ginoo maloloy-on ug mahigugmaon,
mahinay masina, may gugma nga dayon.
Diri kita niya ginsisirotan,
sumala ha igo ha aton ug kaangayan.
Diri man kita niya ginbabalosan,
sumala han aton mga kasal-anan.
℟. An Ginoo maloloy-on ug mahigugmaon.
2. Sugad nga an amay han iya anak maloloy-on,
amo man an Ginoo hadton ha iya mahadlokon.
Maaram hiya kon ano an iya ginhimo ha aton,
nga tapotapo kita, hiya nanunumdom.
℟. An Ginoo maloloy-on ug mahigugmaon.
3. An kinabuhi han tawo sugad la hin banwa,
bukad ha kapatagan nga namumukad na.
Paghuypa han hangin, nawawara dayon,
ngan diri na gud ini hira kikitaon.
℟. An Ginoo maloloy-on ug mahigugmaon.
4. Kundi an gugma han Ginoo nagpapadayon,
han mga tawo nga ha iya mahadlokon;
ngan magpapadayon an iya kaupayan,
ngadto han ngatanan nga mga katulinan,
ngadto han nagtutuman han ginsaaran,
ngan hadton nasugot han iya kasugoanan.
℟. An Ginoo maloloy-on ug mahigugmaon.
PAGBASA II
Rom 8:31b-35, 37-39
Pagbasa tikang han Surat ni San Pablo ngadto han mga taga Roma.
Mga kabugtoan: Kon naugop ha aton an Dyos, hin-o pa man in matipa ha aton? Waray ngani niya pugngi an iya kalugaringon nga Anak, kundi iginhalad hiya niya para ha aton ngatanan! Iginhatag ngani niya ha aton an iya Anak—diri ba niya liwat ihahatag ha aton an ngatanan nga mga butang? Hin-o man in masumbong kontra han pinili nga mga tawo han Dyos? An Dyos ngahaw an naghukom nga diri hira salaan! Hin-o man ngay-an an maghuhukom ha ira ha karat-an? Diri hi Cristo Jesus nga namatay, nga ginbanhaw, ngan aadto na ha tuo han Dyos. Nanginginyupo hiya han Dyos para ha aton! Niyan, hin-o man in makakapabulag ha aton tikang han gugma ni Cristo? Makakahimo ba an kagul-anan, o an kakurian, o an pagpakurii, o an kagutom, o an kakablasan, o an kataragman, o an kamatayon?
Diri, ha butnga hini ngatanan may-ada kita hingpit nga pagdarag-an pinaagi ha iya nga naghigugma ha aton! Kay maaram ako nga waray gud bisan ano nga makakapabulag ha aton han iya gugma: bisan pa an kamatayon o an kinabuhi; bisan pa an mga anghel o an iba nga kagamhanan; bisan pa an panahon yana o an tiarabot; bisan pa an mga kahitas-an o an mga kahiladman—waray gud bisan ano ha ngatanan nga mga binuhat nga makakapabulag ha aton han gugma han Dyos pinaagi kan Cristo Jesus nga aton Ginoo.
An Pulong han Ginoo.
EBANGHELYO
Jn 14:1-6
Pagbasa tikang han santos nga Ebanghelyo sumala kan Juan.
Nagsiring ha ira hi Jesus, “Ayaw kamo kabaraka ngan kagupong. Too kamo han Dyos ngan too man kamo ha akon. Damo in mga kwarto didto han balay han akon Amay, ngan makadto ako hin pag-andam hin dapit para ha iyo. Diri ako magsusumat hini ha iyo kon diri pa ini tinuod. Ngan katapos ko kadto ngan pag-andam hin dapit para ha iyo, mabalik ako ngan pauupdon ko kamo ha akon, basi kon hain ako aadto man liwat kamo. Maaram na kamo kon uunanhon niyo pagsangpot ngadto han akon kakadtoan.” Nagsiring ha iya hi Tomas, “Ginoo, diri kami maaram kon tikain ka; uunanhon man namon paghibaro han dalan nga tipakadto?” Nagbaton ha iya hi Jesus, “Amo ako an dalan, an kamatuoran, ngan an kinabuhi; waray makakadto han Amay kon diri pinaagi ha akon.”
An Ebanghelyo han Ginoo.
________________
IKADUHA NGA MISA
PAGBASA I
Kin 3:1-9
Pagbasa tikang han basahan han Kinaadman.
Kundi pinananalipdan han Dyos an mga magtadong ngan diri hira mag-aantos hin kasakitan. Usa ini nga tinuyaw nga sayop hin paghunahuna nga mapatay an mga magtadong ngan nga an ira kamatayon usa nga makalilisang nga karat-an. Nabaya hira ha aton kundi diri ini usa nga karat-an. Ngani murayaw an kinabuhi han mga magtadong. Daw nag-aantos hira hin sirot, kundi may-ada hira buhi nga paglaom han kinabuhi nga waray kamatayon. Gutiay la an ira mga pag-antos kon igtatanding han mga kaupayan nga ira kakarawaton. Ginsarihan hira han Dyos, sugad hin bulawan nga ginpurog pinaagi hin kalayo ha hudno, ngan hinbaroan nga takos hira hin pakig-usa ha iya. Iya ginkarawat hira sugad han pagkarawat niya han mga halad nga hayop nga pagsusunogon dida ha altar han mga nasingba ha iya. Kon kumanhi na an Dyos hin pagbalos han mga magtadong, makakapulaw hira han mga magraot sugad hin mga uga nga uhot nga naglalalaga. Maghahadi hira han mga nasod ngan mga katawhan, ngan magigin hadi nira ha kadayonan an Ginoo. Adton mga nasarig han Dyos makakasabot han kamatuoran han iya mga paagi. Mag-uokoy upod han iya gugma adton nagin matinumanon ha iya, kay maloloy-on ngan mapinairon hiya han iya mga pinili.
An Pulong han Ginoo.
SALMO RESPONSORIO
Sal 116: 5, 6, 10-11, 15-16ac
℟. Maglalakat ako ha atubangan han Ginoo, didto ha tuna han mga buhi.
1. Maloloy-on ngan maupay an Ginoo,
an aton Dyos mapinairon hin duro.
℟. Maglalakat ako ha atubangan han Ginoo, didto ha tuna han mga buhi.
2. Gin-aagak niya an kablas nga tawo,
han kataragman gintalwas niya ako.
℟. Maglalakat ako ha atubangan han Ginoo, didto ha tuna han mga buhi.
3. Natoo pa bisan nagsiring na ako,
“Nahirugmok na gud ako hin kompleto;”
bisan kon nahadlok ngan nasiring ako,
“Waray nagud usa nga kasarigan ko.”
℟. Maglalakat ako ha atubangan han Ginoo, didto ha tuna han mga buhi.
4. Ha pagtan-aw han Ginoo
mahal gudman an kamatayon han ‘ya mga baraan.
Imo ako surugoon, O Ginoo,
tikang hin kamatay gintalwas mo ako.
℟. Maglalakat ako ha atubangan han Ginoo, didto ha tuna han mga buhi.
PAGBASA II
Rom 6: 3-4, 8-9
Pagbasa tikang han Surat ni San Pablo ngadto han mga taga Roma.
Mga kabugtoan: Kay maaram na kamo hini: han pagbunyagi ha aton, nahiusa kita kan Cristo Jesus, nabunyagan kita ngan nahiusa kita han iya kamatayon. Sanglit dida han pagbunyagi ha aton, iginlubong kita upod ha iya ngan inmangbit kita han iya kamatayon, basi sugad nga ginbanhaw hi Cristo pinaagi han mahimayaon nga gahom han Amay, mag-ukoy man liwat kita hin bag-o nga kinabuhi.
Tungod nga namatay na kita upod kan Cristo, natoo kita nga mabubuhi man liwat kita upod ha iya. Kay sayod kita nga ginbanhaw hi Cristo ngan diri na gud mamamatay—waray na gahom ha iya an kamatayon.
An Pulong han Ginoo.
EBANGHELYO
Jn 6: 37-40
Pagbasa tikang han santos nga Ebanghelyo sumala kan Juan.
Ginsiring hi Jesus an kadam-an nga mga tawo, “Napakadi ha akon an bisan hin-o nga itinutubyan ha akon han Amay. Diri ko gud isasalikway an bisan hin-o nga mapakadi ha akon, kay linusad ako tikang ha langit diri pagtuman han akon kalugaringon nga kaburot-on, kundi han kaburot-on han nagsugo ha akon. Karuyag han nagpadara ha akon nga buhaton ko ini: nga waray mawara hin bisan usa han ngatanan nga iya igintubyan ha akon, kundi nga banhawon ko hira ngatanan ha kataposan nga adlaw. Kay amo ini an karuyag han akon Amay: nga makaangkon han dayon nga kinabuhi an ngatanan nga nakilala han Anak ngan natoo ha iya; ngan babanhawon ko hira ha kataposan nga adlaw.”
An Ebanghelyo han Ginoo.
________________
IKATULO NGA MISA
PAGBASA I
Is 25:6a, 7-9
Pagbasa tikang han Basahan ni Isaias nga manaragna.
Dinhe ha Bukid Sion mag-aandam an Ginoo nga Makagarahum han Ngatanan hin bangkite para han ngatanan nga mga nasod han kalibutan. Dinhe kukuhaon niya dayon an dampog han kabidoan nga nagtinahob han ngatanan nga mga nasod. Pagbubungkagon hin kadayonan han Ginoo nga Dyos an kamatayon! Papahiron niya an mga luha tikang han ngatanan nga mga mata ngan kukuhaon niya an kaarawdan nga gin-antos han iya katawhan ha bug-os nga kalibutan. An Ginoo an nagyakan. Kon mahinabo na ini, masiring an ngatanan, “Amo hiya an amon Dyos! Sinmarig kita ha iya ngan gintalwas kita niya. Amo hiya an Ginoo! Sinarig kita ha iya, ngan malipayon ngan narayhak na kita, kay gintalwas kita niya.”
An Pulong han Ginoo.
SALMO RESPONSORIO
Sal 130:1-2, 3-4, 5-6ab, 6c-7,8
℟. Naghihinulat ako han bulig han Ginoo, ngan han iya mga pulong natapod ako.
1. Ha butnga han akon pagturaw, O Ginoo,
natawag ug nasangpit ako ha imo.
Pamatii, Ginoo, an akon mga pangamuyo,
dungga an akon pangaro han tambulig nimo.
℟. Naghihinulat ako han bulig han Ginoo, ngan han iya mga pulong natapod ako.
2. Kon manumdom ka han amon mga kasal-anan,
hin-o man an diri kasisirotan?
Kundi ha amon ikaw napasaylo,
sanglit magsusugot gud kami ha imo.
℟. Naghihinulat ako han bulig han Ginoo, ngan han iya mga pulong natapod ako.
3. Naghihinulat ako han bulig han Ginoo,
ngan han iya mga pulong natapod ako.
Ngan naghuhulat ako han Ginoo,
labaw pa han mga sirino
nga naghuhulat han kaagahon nga bag-o.
℟. Naghihinulat ako han bulig han Ginoo, ngan han iya mga pulong natapod ako.
4. Labaw pa han mga sirino
nga naghuhulat han kaagahon nga bag-o.
O Israel, an Ginoo paglaomi,
kay an iya gugma dayuday gud pirme,
ngan andam hiya hin katalwasan pagserbi.
℟. Naghihinulat ako han bulig han Ginoo, ngan han iya mga pulong natapod ako.
PAGBASA II
2 Tim 2: 8-13
Pagbasa tikang han Ikaduha nga Surat ni San Pablo ngadto kan Timoteo.
Hinumdomi hi Jesu-Cristo nga tulin ni David, nga ginbanhaw, sumala han Maupay nga Sumat nga akon iginwali. Nag-aantos ako kay nagwawali ako han Maupay nga Sumat, ngan kinadenahan pa ngani ako pareho hin kriminal. Kundi diri kinadenahan an pulong han Dyos, ngan tungod hini gin-iilob ko an ngatanan para han kaupayan han mga pinili nga mga tawo han Dyos, basi makaangkon hira liwat han katalwasan nga aada kan Cristo Jesus, upod an waray kataposan nga himaya. Matuod ini nga darahunon: “Kon mamatay kita upod ha iya, mabubuhi man kita upod ha iya. Kon magpadayon kita hin pag-ilob, maghahadi man kita upod ha iya. Kon iglirong ta hiya, iglilirong man kita niya. Kon diri kita magmatinumanon, nagpapadayon gihapon hiya kamatinumanon, kay diri hiya matipa han iya kalugaringon.”
An Pulong han Ginoo.
EBANGHELYO
Jn 11: 21-27
Pagbasa tikang han santos nga Ebanghelyo sumala kan Juan.
Nagsiring hi Marta kan Jesus, “Ginoo, diri unta napatay an akon bugto kon nakanhi ka pa! Kundi maaram ako nga bisan yana, ihahatag ha imo han Dyos an bisan ano nga imo pangaroon ha iya.” Ginsumatan hiya ni Jesus, “Mababanhaw an imo bugto.” Nagbaton hi Marta, “Maaram ako nga mababanhaw hiya ha kataposan nga adlaw.” Nagsiring hi Jesus ha iya, “Hi ako an pagkabanhaw ngan an kinabuhi. Mabubuhi an bisan hin-o nga natoo ha akon, bisan kon mamatay hiya; ngan diri na gud mamamatay an bisan hin-o nga buhi nga natoo ha akon. Natuod ka ba hini?” Nagbaton hiya, “Oo, Ginoo, natoo ako nga amo ka an Mesiyas, an Anak han Dyos, nga makanhi ha kalibutan.”
An Ebanghelyo han Ginoo.