PAGBASA I
Ezeq 47:1-2, 8-9, 12
Pagbasa tikang han Basahan ni Ezequiel nga manaragna.
Iginbalik ako han tawo ngadto han aragian han Templo. May nag-aawas nga tubig tikang ha ilarom han aragian ngan tipakadto ha sinirangan, ngain naatubang an Templo. Nag-aawas ini tipaubos tikang ha ilarom han timogan nga bahin han Templo ngadto han timogan han altar. Iginggawas ako han tawo tikang han tinitindogan han Templo, pinaagi han amihanan nga ganghaan, ngan iginlibot ako ngadto han ganghaan nga naatubang ha sinirangan. May nag-aawas nga gutiay nga sapa didto han timogan han ganghaan. Nagsiring hiya ha akon, “Nag-aawas ini nga tubig dida han tuna ngadto ha sinirangan, ngan nalugsong ngadto han Kahamub-an han Jordan, ngan ngadto han Dagat nga Patay. Kon naawas ini ngadto han Dagat nga Patay, liniliwanan hini hin matab-ang nga tubig an mapag-ad nga tubig hito nga dagat. Bisan ngain aawas an sapa, magkakamay-ada magkalainlain nga kamanampan ngan kaisdaan. Patatab-angon han sapa an tubig han Dagat nga Patay, ngan bisan ngain ini aawas, magdadara ini hin kinabuhi. Dida han tagsa nga pangpang han sapa maturok an magkalainlain nga mga kahoy nga mahatag hin pagkaon. Diri malalaya an ira mga dahon, ngan diri gud maukoy hin pamunga. Mamumunga ini hin bag-o nga mga bunga, kada bulan, kay tinutubigan ini han sapa nga nag-aawas tikang han Templo. Mahatag hin pagkaon an mga kahoy, ngan magagamit an mga dahon hini hin pagtambal hin mga tawo.”
An Pulong han Ginoo.
SALMO RESPONSORIO
Sal 46:2-3, 5-6, 8-9
℟. An tubig han salog nakakalipay han syudad han Dyos, an baraan nga puroy-anan han gihahataasi.
1. An Dyos an at’ kusog ngan an panalipod,
kon may kasamokan andam pagbulig gud.
Sanglit di’ mahadlok, bis’ tuna mabay-og,
Bis’ an kabukiran ha dagat mahulog.
℟. An tubig han salog nakakalipay han syudad han Dyos, an baraan nga puroy-anan han gihahataasi.
2. Syudad han Dyos may lipay tikang hin salog,
ha baraan balay han Gilabawi gud.
An Dyos nagpupuyo dida hit' nga syudad,
ngan diri gud ito manta mababantad.
Ha temprano pa gud hiton kaagahon
naabot na hiya pagbulig gihapon.
℟. An tubig han salog nakakalipay han syudad han Dyos, an baraan nga puroy-anan han gihahataasi.
3. Upod ta’n Ginoo Labaw han Ngatanan.
Dyos ni Jacob amo an at’ darangpanan;
Kadi, kitaa an iya binuhatan,
mga buhat niya nga kahiburongan.
℟. An tubig han salog nakakalipay han syudad han Dyos, an baraan nga puroy-anan han gihahataasi.
PAGBASA II
1 Cor 3:9c-11, 16-17
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Balay liwat kamo han Dyos. Ha pagpahimulos han iginhatag ha akon han Dyos, ginbuhat ko an buruhaton hin batid gud nga panday ngan iginpahimutang ko an patukoranan, ngan iba nga tawo an nagtindog han balay dida hini. Kundi kinahanglan magtagam an kada usa kon uunanhon niya hin pagtindog han balay. Kay iginpahimutang na han Dyos hi Cristo Jesus nga amo gudla ngan usa la nga patukoranan, ngan waray na iba.
Maaram na gud kamo nga amo kamo an templo han Dyos ngan nag-uokoy ha iyo an Espiritu han Dyos! Sanglit kon may magbungkag han templo han Dyos, bubungkagon man hiya han Dyos, kay baraan an templo han Dyos, ngan kamo ngahaw amo an iya templo.
An Pulong han Ginoo.
EBANGHELYO
Jn 2:13-22
Pagbasa tikang han santos nga Ebanghelyo sumala kan Juan.
Hiraniay na an Pyesta han Paglabay han mga Judiyo, sanglit napakadto hi Jesus ha Jerusalem. Hinkit-an niya didto ha Templo an mga tawo nga nagbabaligya hin mga baka, mga karnero, ngan mga sarapati, ngan an mga parabalyo hin kwarta nga nanlilingkod sapit han ira mga lamesa. Naghimo hi Jesus hin latob tikang hin mga lubid, ngan gintabog niya an ngatanan nga mga hayop ngadto ha gawas han Templo, pati an mga karnero ngan mga baka, ngan pinanmalintong niya an mga lamesa han mga parabalyo hin kwarta, ngan ginpasarang niya an ira mga sinsilyo. Ngan ginsugo niya an mga parabaligya han mga sarapati, “Kuhaa niyo ini dinhe! Ayaw niyo paghimoa nga taboan an balay han akon Amay!” Nahinumdom an iya mga tinun-an nga nasiring an kasuratan, “An akon tinuod nga pagmahal han imo balay, O Dyos, naglalaga ha akon kasingkasing sugad hin kalayo!” Gin-ayat hi Jesus han mga punoan nga Judiyo, “Ano nga milagro an ipakikita mo ha amon hin pagpasabot nga may-ada ka katungod hin pagbuhat hini?” Nagbaton hi Jesus, “Bungkaga niyo ini nga balay han Dyos ngan titindogon ko liwat sulod hin tulo ka adlaw.” “Kwarentay seis ka tuig an pagtindog hini nga templo, ngan titindogon mo ini sulod la hin tulo ka adlaw?” nagpakiana hira. Kundi an Templo nga karuyag sidngon ni Jesus, amo an iya lawas. Sanglit han kabanhaw na niya, nahinumdom an iya mga tinun-an hini nga iya ginyakan, ngan tinoo hira han kasuratan ngan han mga pulong nga iginsiring ni Jesus.
An Ebanghelyo han Ginoo.