PAGBASA I     

Is 2:1-5

Pagbasa tikang han Basahan ni Isaias nga manaragna.

Iini an mensahe nga iginhatag han Dyos kan Isaias nga anak ni Amoz hiunong han Juda ug Jerusalem. Ha mga adlaw nga tiarabot an bukid nga tinitindogan han Templo amo an labi kahitaas han ngatanan, nga mananawantawan han ngatanan nga kapungtoran. Maawas ngadto hini in damo nga mga nasod, ngan masiring an ira mga tawo, “Sagka kita han pungtod han Ginoo, ngadto han Templo han Dyos han Israel. Basi pagtutdoan kita niya han karuyag niya ipabuhat ha aton; ngan maglakat kita dida han mga agian nga iya ginpili. Kay tikang ha Jerusalem an pagturon-an han Ginoo; tikang ha Sion nagyayakan hiya han iya mga tawo.” Magtutuhay hiya hin mga kalipongan dida han dagko nga mga nasod. Pipilpigon nira an ira mga espada ngan hihimoon nga mga arado, ngan an ira mga bangkaw hihimoon nga mga garab. Diri na gud makikig-away an mga nasod, diri na gud mag-aandam para hin araway. Mga tulin ni Jacob, paglakat na kita dida han kapawa nga ihinatag ha akon han Ginoo!

An Pulong han Ginoo.

SALMO RESPONSORIO

Sal 122: 1-2, 3-4, 4-5, 6-7, 8-9

℟. Pakadto kita nga malipayon ha balay han Ginoo.

1. Nalipay ako han sidngon ako nira,

“Ngat’ han balay han Ginoo kadto kita.”

Jerusalem, aanhi na kami yana,

naninindog sakob han im' mga porta!

℟. Pakadto kita nga malipayon ha balay han Ginoo.

2. Jerusalem, syudad nga nahibalik na,

ngadto hin matahom nga pagkaurosa!

Amo ini an kinakadtoan nira,

nga mga tribo han Israel nga tana.

℟. Pakadto kita nga malipayon ha balay han Ginoo.

3. Kadto hin pagpasalamat han Ginoo,

sumala han iya ha ira ginsugo.

Kahadian han Israel napakadto,

hin paghukom hadton ira mga tawo.

℟. Pakadto kita nga malipayon ha balay han Ginoo.

4. Kanan Jerusalem kalinaw ig-ampo:

“Mag-uswag unta an may gugma ha imo!

Magmalinaw unta sakob han pader mo,

ngan im’ mga palasyo man masiguro.”

℟. Pakadto kita nga malipayon ha balay han Ginoo.

5. Tungod hadton akon mga kauropdan,

ngan tungod man han ak' mga kasangkayan;

Jerusalem an sisidngon ko ngadaan,

“Maimo na unta an kamurayawan!”

Tungod naman hadton balay han Ginoo,

balay han Ginoo nga amo an Dyos ko.

Akon gudman ini nga gin-iinampo,

an para han mga kauswagan nimo.

℟. Pakadto kita nga malipayon ha balay han Ginoo.

PAGBASA II   

Rom 13:11-14

Pagbasa tikang han Surat ni San Pablo ngadto han mga taga Roma.

Mga kabugtoan: Kinahanglan buhaton niyo ini kay maaram kamo nga inabot na an takna nga kinahanglan magmata na kamo. Kay an takna han aton katalwasan haruharani na yana kay hadto han pagtikang ta hin pagtoo. Harapit na matapos an kagab-ihon, haraniay na an adlaw. Hunong na kita hin pagbuhat han mga butang han kasisidman, ngan isul-ot ta an mga hinganiban hin pakig-away dida ha kapaw-an. Manggawi na kita hin maupay sugad nga mga tawo nga aada ha kalamragan; waray na malaw-ay nga mga pagkalipay o paghinubog, waray na kalaw-ayan o kahugawan, waray na pag-inaragway o pangabugho. Kundi dad-a niyo an mga hinganiban han Ginoo Jesu-Cristo ngan ayaw na niyo pagtagda an iyo salaan nga kinaiya ngan ayaw patumani an ira mga ungara.

An Pulong han Ginoo.

EBANGHELYO             

Mt 24:37-44

Pagbasa tikang han santos nga Ebanghelyo sumala kan Mateo.

Nagsiring hi Jesus ha iya mga tinun-an, “An pag-abot han Anak han Tawo masusugad han nahinabo han panahon ni Noe. Sugad han mga adlaw nga waray pa an lunop, nagpinangaon ngan nag-inirignom an mga tawo. Nag-aragsawa an kalalaken-an ngan kababayen-an tubtob han adlaw han pagsulod ni Noe han arka. Waray makasabot an mga tawo kon ano an nahinanabo ngada han pag-abot han lunop, ngan igin-anod hira ngatanan. Amo man liwat ito an mahinanabo kon umabot na an Anak han Tawo. Hito nga panahon, duha ka tawo in magtratrabaho ha uma: kukuhaon an usa ngan ibibilin an ikaduha. Duha nga babaye in maggigiling hin pagkaon: kukuhaon an usa ngan ibibilin an ikaduha. Sanglit, pagbantay, kay diri kamo maaram kon san-o nga adlaw an pagkanhi han iyo Ginoo. Hinumdomi ini niyo: kon maaram la an amay han panimalay han takna han pag-abot han kawatan, mag-aagma manta hiya ngan diri matugot nga makasulod han iya balay an kawatan. Sanglit, tungod hini, kinahanglan nga dayuday andam liwat kamo, kay maabot an Anak han Tawo ha takna nga diri niyo hiya pamumulaton.

An Ebanghelyo han Ginoo.

PAG-AMPO HAN BUNGTO

Dida hiton panahon han Adviento nag-aandam kita hiton kalibutanon ngan langitnon nga pyesta. Nagpapamulat kita han katawo katawo ni Cristo ngan han aton katawo ngadto han langitnon nga kinabuhi ngan kahingpitan han ginhadian, sanglit mag-aampo kita hin pagsering:

Ginoo, andama kami han imo katawo.

1. Nga nagmamata na kami ha panahon han pagkanhi han Ginoo, ngan pukaw kami han damo nga paagi han pagkanhi niya ha aton, mag-ampo kita han Ginoo.

2. Nga magin andam an aton mga kasingkasing han ginhadian han Ginoo ha sakob ha aton ngan para han kahingpitan han ikaduha nga pagkanhi Cristo, mag-ampo kita han Ginoo.

3. Nga an adviento magin panahon han aton pagbag-o han aton kasingkasing ug hunahuna nga ginpatig-a han kamakikalugaringon agud diri kita kalikatan han tinood nga pagkanhi ni Cristo, mag-ampo kita han Ginoo.

4. Nga magbuhat pa kami hin sobra para mahitanum an kan Cristo ginhadian dida han mga kablas ngan an mga tapang han kan Cristo gugma ug kalinaw, mag-ampo kita han Ginoo.

5. Nga an aton pag-andam han pagkatawo han Ginoo maghimo hin mga pitad agud magdara hin kalinaw, paglaum ngan gugma dida ha aton, mag-ampo kita han Ginoo.

Langitnon nga Amay, an imo anak nagtubyan han iya kalugaringon, kinuha an kinaiya hin surugoon hin pagtalwas ha amon. Buligi kami hin paglinis han amon kalugaringon dida hini nga pananon hin pag-andam han pag-abot ni Jesucristo nga amon Ginoo. Amen.