PAGBASA I     

Is 25:6-10a

Pagbasa tikang han Basahan ni Isaias nga manaragna.

Dinhe ha Bukid Sion mag-aandam an Ginoo nga Makagarahum han Ngatanan hin bangkite para han ngatanan nga mga nasod han kalibutan—bangkite han girarasahi nga pagkaon ngan han gimamaupayi nga bino. Dinhe kukuhaon niya dayon an dampog han kabidoan nga nagtinahob han ngatanan nga mga nasod. Pagbubungkagon hin kadayonan han Ginoo nga Dyos an kamatayon! Papahiron niya an mga luha tikang han ngatanan nga mga mata ngan kukuhaon niya an kaarawdan nga gin-antos han iya katawhan ha bug-os nga kalibutan. An Ginoo an nagyakan.

Kon mahinabo na ini, masiring an ngatanan, “Amo hiya an amon Dyos! Sinarig kita ha iya ngan gintalwas kita niya. Amo hiya an Ginoo! Sinarig kita ha iya, ngan malipayon ngan narayhak na kita, kay gintalwas kita niya.” Pananalipdan han Ginoo an Bukid Sion.

An Pulong han Ginoo.

SALMO RESPONSORIO

Sal 23:1-3a, 3b-4, 5, 6

℟. Didto ako maukoy ha balay han Ginoo ha bug-os ko nga kinabuhi.

1. An Ginoo an magmarangno ha akon,

dida ha iya waray ko iiliwon.

Gindara ako ngadto hin kabanwaan,

ngadto hin pahuwayan nga kapatagan.

Gindara ako niya ngadto han linaw,

tubig nga bulong hin kapaso ug kauhaw.

Hin bag-o nga kusog hi ako tinagan,

℟. Didto ako maukoy ha balay han Ginoo ha bug-os ko nga kinabuhi.

2. Ha matadong nga dalan ako gin-unhan;

pagtuman niya han iya ginsaaran.

Bisan kon magtarap ako han kasisidman,

Ginoo, waray ko sadang kahadlokan;

kay ikaw man an akon inuupdan,

imo tungkod ug tabog an akon abayan.

℟. Didto ako maukoy ha balay han Ginoo ha bug-os ko nga kinabuhi.

3. Hin sasaro para ha akon ikaw naghikay,

ha atubangan han akon mga kaaway.

Kinarawat ako, imo ginpasidunggan,

ginpalapwas nimo an akon irimnan.

℟. Didto ako maukoy ha balay han Ginoo ha bug-os ko nga kinabuhi.

4. Magpapabilin an imo paghigugma,

samtang nga aanhi pa ako ha tuna.

Ngan an imo balay akon puroy-anan,

nga buhi pa ako ha mga katuigan.

℟. Didto ako maukoy ha balay han Ginoo ha bug-os ko nga kinabuhi.

EBANGHELYO             

Mt 15:29-37

Pagbasa tikang han santos nga Ebanghelyo sumala kan Mateo.

Binaya hi Jesus hadto nga dapit ngan nagligid hiya han baybayon han lanaw ha Galilea. Sinagka hiya hin pungtod ngan liningkod. Hinarani ha iya in kadam-an nga mga tawo nga nagdara hin mga piay, mga buta, mga lulid, mga ngula, ngan damo pa nga mga magsakit, ngan gindara nira ha tiilan ni Jesus; ngan gintambal hira niya. Nahipausa an mga tawo han pakakita nira nga nagpakayakan na an mga ngula, nagkauupay na an mga lulid, nagpakalakat na an mga piay, ngan nagpakakita na an mga buta; ngan gindayaw nira an Dyos han Israel.

Gintawag ni Jesus an iya mga tinun-an ngan ginsiring, “Nalolooy ako hini nga mga tawo kay kaupod hira nakon hin tulo na ka adlaw, ngan waray na hira pagkaon yana. Diri ko karuyag paolion hira kon diri anay magpakakaon, kay bangin mahiraptay hira dida ha dalan ha ira pangoli.” Nagpakiana an mga tinun-an ha iya, “Diin man kita pakakaagi hin igo nga pagkaon dinhe hini nga kamingawan basi ipakaon hini nga mga tawo?” “Pipira pa man an iyo tinapay?” nagpakiana hi Jesus. Binaton hira, “Pipito na la ka bug-os ngan hin pipira nga gudtiay nga mga isda.” Pinapanlingkod ni Jesus ha tuna an mga tawo. Niyan ginkuha niya an pito ka bug-os nga tinapay ngan an isda, ngan nagpasalamat hiya han Dyos. Ginpinit-pinit ini niya ngan iginhatag han iya mga tinun-an, ngan igindurot liwat nira ngadto ha mga tawo. Nangaon hira ngatanan ngan nagkabubusog. Nakatirok pa an mga tinun-an hin pito ka alat han mga salin.

An Ebanghelyo han Ginoo.