PAGBASA I     

Is 26:1-6

Pagbasa tikang han Basahan ni Isaias nga manaragna.

Maabot in adlaw nga magkakanta an mga tawo hini nga kanta didto han tuna han Juda: Marig-on an amon syudad! An Dyos ngahaw an nananalipod han mga pader hini! Abrihe an mga ganghaan han syudad ngan pasudla an matinumanon nga nasod, an nasod kanay mga tawo nagbubuhat han matadong. Ikaw, O Ginoo, an nahatag hin hingpit nga kamurayaw ngadto hadton mga magrig-on an panuyo ngan mga nasarig ha imo.

Sarig ha kadayonan ha Ginoo; dayuday pananalipdan kita niya. Ginpahiubos niya adton mga magpinahitas-on, ginbungkag niya an marig-on nga syudad nga ira gin-ukyan, ngan ginrumpag ngadto hin ka tapotapo an mga pader hini. Ginyatakyatakan na ini hadton mga gintalumpigos ngan ira gintamaktamakan.

An Pulong han Ginoo.

SALMO RESPONSORIO

Sal 118:1 & 8-9, 19-21, 25-27a

℟. Baraan hiya nga nakanhi ha ngaran han Ginoo.

1. Pasalamati’n Ginoo, maupay h’ya,

kadayonan gud an iya paghigugma.

Mas maupay an pagsarig han Ginoo,

kay hin pagtapod gudla han mga tawo.

Gabay an Ginoo amo’n sarigan ko,

kay hin tawhanon la nga mga pangulo.

℟. Baraan hiya nga nakanhi ha ngaran han Ginoo.

2. Abrihe ha akon an porta han Templo,

bas’ sumulod pagdayaw han Ginoo ko!

Amo ini portahan han Ginoo,

an magtadong la an makakasakob hito!

Nagdadayaw ako ha imo, Ginoo,

kay ak’ pinamatian ngan ginbaton mo,

kay hin pagdarag-an gintagan mo ako,

ngan nahimo ka gud nga magtaralwas ko!

℟. Baraan hiya nga nakanhi ha ngaran han Ginoo.

3. Talwasa kami, talwasa, O Ginoo,

Tagi’n kagawasan, nahangyo ha imo.

An naabot han Dyos unta bendisyonan,

an nakanhi ha kanan Ginoo ngaran!

Tatagan ka gud namon hin kaupayan,

tikang didto han Templo han Ginoo man!

Dyos an Ginoo; nagin maupay ha amon.

℟. Baraan hiya nga nakanhi ha ngaran han Ginoo.

EBANGHELYO             

Lc 7:21, 24-27

Pagbasa tikang han santos nga Ebanghelyo sumala kan Lucas.

Nagsiring hi Jesus ha iya mga tinun-an, “Diri ngatanan nga natawag ha akon, ‘Ginoo, Ginoo,’ makakasulod han Ginhadian han langit, kundi adton nagtutuman la han kaburut-on han akon Amay ha langit.

“Sanglit, an tagsa nga mamati ngan magtuman hini nga akon mga pulong masusugad hin tawo nga may-ada hibaro nga nagbalay ha bawbaw han bato. Inuranos, binaha an mga salog, ngan inagmakan han makusog nga hangin adto nga balay; kundi waray mapukan, kay maupay an katindog ha bawbaw han bato. “An tagsa nga mamati hini nga akon mga pulong, ngan diri magtuman masusugad hin tawo nga buangbuang nga nagbalay ha bawbaw han baras. Inuranos, binaha an mga salog, ngan inagmakan han makusog nga hangin adto nga balay, ngan napukan. Kamakalilisang an pagkapukan hadto nga balay!”

An Ebanghelyo han Ginoo.