PAGBASA I     

Is 29:17-24

Pagbasa tikang han Basahan ni Isaias nga manaragna.

Amo ini an siring han Ginoo: “Diri maiha mahihimo nga uma nga tuna an kagurangan, ngan mabalik ngadto hin ka kagurangan an gin-uma nga tuna.” Kon umabot na ito nga adlaw, makakabati an bungol kon basahon in basahan hin dako nga tingog, ngan mapukrat ngan makakakita an buta nga nag-ukoy ha kasisidman. Makakaangkon na liwat an pobre ngan mapinaubsanon nga mga tawo han kalipayan nga ihahatag han Ginoo nga baraan nga Dyos han Israel. Amo na ini an kataposan hadton mga nagtatalumpigos han iba nga mga tawo ngan nagyuyubit han Dyos. Pagpupuohon an tagsa nga makasasala. Pagpupuohon han Dyos adton mga nagraogdaog han iba nga mga tawo, adton mga nagpupugong nga diri pagkastigohon an mga magtinalapasnon, ngan adton mga nagbibinuwa, basi an tangkod nga mga tawo diri katagan han katadungan. Sanglit nasiring an Ginoo nga Dyos han Israel, nga nagtalwas kan Abraham tikang ha kakurian, “Mga tawo ko, diri na gud kamo pagpakaalohan, ngan diri na gud manluluspad hin kaawod an iyo mga bayhon. Kon hikit-an niyo an mga anak nga akon ihahatag ha iyo, niyan magmamatuod kamo nga ako amo an baraan nga Dyos han Israel. Pagpapasidunggan ako niyo ngan magsisingba kamo ha akon. Mahibabaro hin pakasabot an lurong nga mga tawo, ngan adton mga dayuday la nagnginginurutob malilipay nga pagtututdoan hira.”

An Pulong han Ginoo.

SALMO RESPONSORIO

Sal 27:1, 4, 13-14

℟. An Ginoo an akon kapawa ug akon katalwasan.

1. An Dyos akon kapawa ug katalwasan,

sanglit waray sadang ko nga kahadlokan.

Sinasalipdan ako ha kataragman,

hin kakulba diri ako hisasakban.

℟. An Ginoo an akon kapawa ug akon katalwasan.

2. Usa nga butang an akon pinangangaro,

usa gud la an akon hinahangyo;

nga mag-ukoy ako ha balay han Ginoo,

ngatanan nga adlaw samtang buhi pa ako;

basi mamalandong ako han iya kaupayan,

ngan mangaro han iya kasalagdonan.

℟. An Ginoo an akon kapawa ug akon katalwasan.

3. Maaram ako nga hikikit-an ko pa,

an pagkamaupay han Ginoo yana;

Pagtapod ug paglaom han Ginoo,

ayaw pagturaw, lugod, ha iya tuo.

℟. An Ginoo an akon kapawa ug akon katalwasan.

EBANGHELYO

Mt 9:27-31

Pagbasa tikang han santos nga Ebanghelyo sumala kan Mateo.

Binaya hi Jesus hadto nga dapit ngan han naglalakat hiya, ginsunod hiya hin duha nga lalake nga buta. Ginuliat hira, “Kaluoyi intawon kami, Anak ni David!” Han pagsulod na ni Jesus hin balay, dinaop ha iya an duha nga buta, ngan nagpakiana hiya ha ira, “Natoo ba kamo nga mahihimo ko ini?” Binaton hira, “Oo, Ginoo.” Niyan kinamkam ni Jesus an ira mga mata ngan nagsiring, “Mahimo unta sumala gud han iyo pagtoo!”— ngan nakakita na hira. Gintugon hira ni Jesus, “Ayaw gud kamo pagsumat hini bisan kan kanay!” Kundi linakat hira ngan iginsumat lugod nira ha ngatanan nga dapit didto hadto nga tuna an ginbuhat ha ira ni Jesus.

An Ebanghelyo han Ginoo.