PAGBASA I     

Is 30:19-21, 23-26

Pagbasa tikang han Basahan ni Isaias nga manaragna.

Diri na gud magtatangis kamo nga mga tawo nga nag-uokoy didto ha Jerusalem, Malolooyon an Ginoo, ngan kon magtawag kamo hin pakibulig ha iya, pamamatian kamo niya. Tatagan kamo han Ginoo hin kakurian, kundi aada hiya ngahaw ha pagtutdo ha iyo, ngan diri na kamo magpipinamiling ha iya. Kon sumimang kamo han dalan ngadto ha tuo o ha wala, hibabatian niyo ha luyo an iya tingog nga nasiring, “Aadi an dalan, sulsoga ini niyo.”

Ha kada pagtatanom niyo han iyo mga binhe, magpapadara an Ginoo hin uran hin pagpatubo han iyo tanom, ngan mahatag ha iyo hin hura nga aranihon, ngan hin damo nga panabsaban han iyo kabakahan. An mga baka ngan mga asno nga nag-aarado han iyo kaumhan mananabsab han gimamaupayi nga banwa. Dida han adlaw kon mapukan na han iyo mga kaaway an marig-on nga mga kuta ngan panmatayon na an ira mga tawo, mag-aawas in mga sapa tikang han tagsa nga bukid ngan tagsa nga pungtod. An bulan masusugad han adlaw hin kamapawa, ngan magpipito ka pilo an kamapawa han adlaw, sugad han kapawa hin kanan pito ka adlaw. Mahinanabo ini ngatanan kon pagbutkon ngan pagtambalon na han Ginoo an mga kasamdan nga iya iginhatag han iya mga tawo han pagkastigoha ha ira.

An Pulong han Ginoo.

SALMO RESPONSORIO

Sal 147:1-2, 3-4, 5-6

℟. Baraan an naglalaum han pag-anot han Ginoo.

1. Pagdayawon an Ginoo! Pagdayawon!

Maupay an pagkanta nga’t han Dyos naton.

Pagdayaw pinaagi hin karantahon,

pagdayaw ha iya maupay, matadong.

Iginpapahiuli na han Ginoo,

Jerusalem ngan bihag nga mga tawo.

℟. Baraan an naglalaum han pag-anot han Ginoo.

2. Iya gintatambal mga nabibido,

ira mga samad ginbubutok ito.

Gin-isip na niya mga kabiton-an,

gintatawag an tagsa ha iya ngaran.

℟. Baraan an naglalaum han pag-anot han Ginoo.

3. An aton Ginoo dako ngan gamhanan,

diri matugkad an iya kinaadman.

Ginbabayaw n’ya an mapinaubsanon,

kundi gindudugmok ha tuna’n yawan-on.

℟. Baraan an naglalaum han pag-anot han Ginoo.

EBANGHELYO             

Mt 9:35–10:1, 5a, 6-8

Pagbasa tikang han santos nga Ebanghelyo sumala kan Mateo.

Ginduaw ni Jesus an ngatanan nga kabungtohan ngan kabaryohan. Nagtutdo hiya didto han ira mga sinagoga, nagwali han Maupay nga Sumat han Ginhadian, ngan gintambal niya an mga tawo han ngatanan nga mga sakit. Han pakakita niya han damo nga mga tawo, nalooy gud hiya ha ira, tungod kay mabidoon ngan makalolooy man hira, sugad hin mga karnero nga waray magmarangno. Sanglit ginsiring niya an iya mga tinun-an, “Damo in aranihon kundi gutiay la in mga mag-arani. Pag-ampo kamo han tag-ada han aranihon nga padad-an niya hin mga mag-arani nga magtitirok han ira gin-ani.”

Gintirok ni Jesus an iya dose nga mga tinun-an, ngan gintagan hira hin gahom hin pagpaiwas han magraot nga mga espiritu ngan pagtambal han ngatanan nga sakit.

Ginsugo ni Jesus ini nga dose upod ini nga mga tugon: “Kadtoa niyo an nagkawawara nga mga karnero han katawhan han Israel. Lakat kamo ngan ipasangyaw nga hirani na an Ginhadian han langit. Tambala an mga magsakit, banhawa an mga minatay, linisi an mga sanlahon, ngan pagawsa an mga yawa. Kinmarawat kamo nga waray pabaydi ha iyo, sanglit hatag man kamo nga diri kamo magpapabayad.

An Ebanghelyo han Ginoo.