Tuig A

PAGBASA I     

Is 11:1-10

Pagbasa tikang han Basahan ni Isaias nga manaragna.

Sugad hin kahoy nga ginpulod an hadianon nga panimalay ni David; kundi sugad nga nananaringsing an puno han kahoy nga ginpulod, mabangon man in bag-o nga hadi tikang han mga tulin ni David. Mahatag ha iya hin kinaadman an espiritu han Ginoo, ngan hin hibaro ngan hin kaabtik hin paghadi han mga tawo han Ginoo. Makakasabot hiya han kaburut-on han Ginoo ngan han pagtahod ha iya, ngan malilipay hiya hin pag-alagad han Ginoo. Diri hiya maghuhukom sumala han iya hinkikit-an o hinbabatian; maghuhukom hiya hin matadong han mga kablas, ngan maugop hiya han mga katungod han mga magpakalolooy. Pinaagi han iya sugo pagkakastigohon niya an mga tawo, ngan papatayon niya an magraot nga mga tawo. Matadong ngan maligdong an iya paghadi han iya mga tawo. Magtatampo nga malinawon an mga lubo ngan mga karnero, ngan madirig an mga leyopardo han nati nga mga kanding. Magsasaro an nati nga mga baka ngan hati nga mga liyon, ngan pagmamangnoan ini hin gudti nga kabataan. Magsasaro an mga baka ngan mga uso, ngan magdidirig nga malinawon an ira mga nati. Makaon an mga liyon han uhot nga kinakaon han mga baka. Diri paglalabtan bisan in usa nga minasus-an kon mag-uyag hiya hirani hin malara nga halas. Didto ha Sion nga baraan nga bukid han Dyos mawawaray gud bisan ano nga nakakadarahog o maraot. Mapupuno an tuna han hibaro han Ginoo sugad nga puno hin tubig an kadagatan. Maabot in adlaw nga magigin tigaman han mga nasod an bag-o nga hadi nga tikang han hadianon nga panimalay ni David. Magtititirok hira didto han iya hadianon nga syudad ngan pagpapasidunggan hiya nira.

An Pulong han Ginoo.

SALMO RESPONSORIO

Sal 72:1-2, 7-8, 12-13, 17

℟. Maglulurab an katadungan ha iya panahon; ngan an hingpit nga kamurayaw waray katapusan.

1. Hin paghukom, O Dyos, an hadi tutdoan,

paangbita hiya han im’ katadongan;

Basi an imo katawhan paghadian

hin matadong pati an mga kablas man.

℟. Maglulurab an katadungan ha iya panahon; ngan an hingpit nga kamurayaw waray katapusan.

2. Ha iya panahon mamay katadongan,

ngan pag-uswag samtang nasirang an bulan.

Umabot unta an iya ginhadian

ha pataboktabok hadton kadagatan;

tikang han salog nga Eufrates an ngaran,

ngadto pa gud ha sidsid han kalibutan.

℟. Maglulurab an katadungan ha iya panahon; ngan an hingpit nga kamurayaw waray katapusan.

3. Mga kablas nga nagtatawag ha iya,

iya manta nga binubuligan hira;

sugad man an mga tawo nga kabos na,

ngan adton mga ginpasibay-an nala.

Nalolooy hiya han kablas, magluya,

tinatalwas man adton mga runos na.

℟. Maglulurab an katadungan ha iya panahon; ngan an hingpit nga kamurayaw waray katapusan.

4. Iya ngaran diri unta hingalimtan,

daw adlaw magdayon iya kabantogan.

Dayawon unta h’ya han nasod ngatanan,

pangaroon ha Dyos han ‘tanan katawhan;

nga tagan hira han Dyos hin kaupayan,

sugad han ginbuhat ngadto han hadi man.

℟. Maglulurab an katadungan ha iya panahon; ngan an hingpit nga kamurayaw waray katapusan.

PAGBASA II   

Rom 15:4-9

Pagbasa tikang han Basahan ni Isaias nga manaragna.

Mga kabugtoan: Iginsurat an ngatanan nga nahisurat ha Kasuratan hin pagtutdo ha aton, basi mamay-ada unta naton paglaom pinaagi han pagpailob ngan pagpadasig nga iginhatag ha aton han Kasuratan. Hinaot unta nga an Dyos nga burabod han pagpailob ngan pagpadasig, an mag-usa han iyo panhunahuna, pinaagi hin pagsunod han susbaranan ni Cristo Jesus, basi mag-urusa unta kamo ngatanan hin pagdayaw han Dyos nga Amay han aton Ginoo Jesu-Cristo.

Sanglit tungod han himaya han Dyos, karawata an iyo igkasi mga magtinuohon sugad han pagkarawat ni Cristo ha iyo. Kay nagsusumat ako ha iyo nga nagin surugoon hi Cristo tungod han mga Judiyo pagpakita nga matinumanon an Dyos, basi an mga saad han Dyos ngadto han mga Patriyarka matuman, ngan basi liwat makahimo an mga Hentil hin pagdayaw han Dyos tungod han iya kalooy. Sumala han siring han Kasuratan, “Sanglit pagdadayawon ko ikaw dida han mga Hentil, magkakanta ako hin mga pagdayaw ha imo.”

An Pulong han Ginoo.

EBANGHELYO            

Mt 3:1-12

Pagbasa tikang han santos nga Ebanghelyo sumala kan Mateo.

Hadto nga panahon hi Juan nga Parabunyag kinadto ha kamingawan han Judea ngan nagtikang hin pagwali. Nagsiring hiya, “Magbasol ngan bayai an iyo mga sala kay hirani na an Ginhadian han langit.” Hi Juan amo an hinabihan ni Isaias nga manaragna han pagsiring niya: “May nagoliat ha kamingawan, ‘Andama niyo an dalan para han Ginoo; tadonga an dalan nga iya aagian!’”

Hinimo hin buhok hin kamelyo an kan Juan panapton, anit an iya bakos ha hawak, ngan mga duron ngan dugos ha kagurangan an karaonon niya. Kinadto ha iya an mga tawo tikang ha Jerusalem, tikang ha bug-os nga lalawigan han Judea ngan tikang han ngatanan nga katunaan nga harani han Salog Jordan. Iginkumpisal nira an ira mga sala ngan ginbunyagan hira ni Juan didto ha Salog Jordan.

Han pakakita ni Juan han damo nga mga Parisiyo ngan mga Sadusiyo nga nadaop pagpabunyag ha iya, nagsiring hiya ha ira, “Kamo nga mga halas—hin-o ngani an nagsumat ha iyo nga makakalikay kamo han tiarabot nga kasina han Dyos? Ipakita ha iyo mga buhat nga nagbasol na kamo han iyo mga sala. Ayaw kamo tapod nga mga anak kamo ni Abrahan. Nasiring ako ha iyo nga ini nga mga bato mahihimo han Dyos nga mga anak ni Abraham. Andam na an parakol hin pagpulod han kahoy ha iya mga gamot; pupudlon ngan susunogon an tagsa nga kahoy nga diri nahatag hin maupay nga bunga. Nagbubunyag ako ha iyo hin tubig, tigaman han iyo pagbasol; kundi magbubunyag ha iyo han Espiritu Santo ngan hin kalayo hiya nga masunod ha akon. Labaw gud hiya ha akon; diri ngani ako takos magbitbit han iya mga sandalyas. Dara niya an iya nigo hin pagpalid basi an uhot mahilain han tipasi. Pagtitirokon niya an trigo didto ha iya kamalig, kundi an uhot pagsusunogon ha kalayo nga diri napaparong.”

An Ebanghelyo han Ginoo.

PAG-AMPO HAN BUNGTO

An Cristohanon nga kinabuhi in kanunay nga pagsaurog han adviento: An ginhadian han Dyos aanhi na. Hi San Juan Bautista nagtatawag ha aton hin pagbaton han iya ginwali ha kamingawan sanglit masiring kita:

Buligi kami, Ginoo,

hin pag-andam han imo aragian.

1. Para hadton namumuno han Singbahan: nga an pagkatawo ni Cristo maghatag ha ira hin bag-o nga kadasig hin pag-ataman han ngatanan, mag-ampo kita han Ginoo.

2. Para han gintungdan hin gahum pagdumara han aton nasud, probinsya, bungto ug barangay: nga an Espiritu Santo maghatag ha ira han mga upa nga kan Isaias gintagna: kinaadman, kadasig,  matadong nga paghusga, gugma sa Dyos, ngan pagtahud han kinabuhi, mag-ampo kita han Ginoo.

3. Para han husgado han aton nasud, nga mahibaro hira hin pagtuman han ira mga katungdanan diri pinaagi la han ira kinikita ug nahibabatian kundi an pamaagi subay han dyosnon nga kasingkasing agud matuman an tinuod nga hustisya para han ngatanan, mag-ampo kita han Ginoo.

4. Para han aton katilingban ngan Cristohanon nga komunidad: nga kanunay mamiling kita hin bag-o ngan malinapuson nga mga paagi hin pagtuman han kan Cristo buhat hin  pagpsaylo ug paghibalik ha mga tawo, mag-ampo kita han Ginoo.

5. Para ha aton tagsatagsa: nga aton karawaton an iba nga tawo sugad han pagkarawat ni Jesus ha aton ngan magin tigaman kita han kan Cristo presensya dinhi ha kalibutan, mag-ampo kita han Ginoo.

Amay namon nga Dyos, buligi kami dida hini nga panahon han adviento hin pagtug-an han amon mga kaluyahan ngan magtubo kami dida hin gugma ha imo ngan han amon igkasitawo, nga hi Cristo matawo ngahaw dinhi ha kalibutan dida han amon mga kinabuhi, yana ug ha kadayunan. Amen.