PAGBASA I     

Is 40:25-31

Pagbasa tikang han Basahan ni Isaias nga manaragna.

Kanay niyo itatanding an baraan nga Dyos? May-ada pa ba iba nga sugad ha iya? Hangad daw ngadto ha langit! Hin-o an nagtuha han mga bitoon nga imo hinkikit-an? Hiya nga nagpagawas ha ira sugad hin hugpo hin mga sondalo; maaram hiya han kadamo hini, ngan gintagan niya hin ngaran an kada usa! Tungod han iya pagkagamhanan waray gud usa hini nga nawawara! Israel, kay ano man nga nangurutob ka nga diri nasabot an Ginoo han imo mga kakurian, o diri nababaraka kon nag-aantos ka han mga pagraogdaog ha imo?

Diri ka ba maaram? Waray ka ba makabati? An Ginoo amo an waray kataposan nga Dyos; gintuha niya an bug-os nga kalibutan. Diri gud hiya kinakapoy o ginugul-an. Waray gud nakakatugkad han iya mga panhunahuna. Ginpapakusog niya adton mga magluya ngan kinakapoy. Nanluluya bisan adton mga batan-on; matutumba hin kakapoy an batan-on nga kalalaken-an. Kundi adton mga nasarig han tambulig han Ginoo tatagan hin bag-o nga kusog. Malupad hira sugad hin mga agila; madalagan hira kundi diri kakapoyon; magbabaktas hira kundi diri manluluya.

An Pulong han Ginoo.

SALMO RESPONSORIO

Sal 103:1-2, 3-4, 8 & 10

℟. Pagdayawa an Ginoo, kalag ko.

1. An Ginoo, kalag ko, imo pagdayawon,

an iya baraan nga ngaran akon pagdayegon.

An Ginoo, kalag ko, imo pagdayawon,

an iya pagkamaupay diri mo limoton.

℟. Pagdayawa an Ginoo, kalag ko.

2. Napasaylo hiya han akon mga sala,

an akon mga sakit gintatambal niya.

Pinapahirayo ako niya ha lubnganan,

gugma ug kalooy ako niya tinatagan.

℟. Pagdayawa an Ginoo, kalag ko.

3. An Ginoo maloloy-on ug mahigugmaon,

mahinay masina, may gugma nga dayon.

Diri kita niya ginsisirotan,

sumala ha igo ha aton ug kaangayan.

Diri man kita niya ginbabalosan,

sumala han aton mga kasal-anan.

℟. Pagdayawa an Ginoo, kalag ko.

EBANGHELYO             

Mt 11:28-30

Pagbasa tikang han santos nga Ebanghelyo sumala kan Mateo.

Nagsiring hi Jesus ngadto han kadam-an, “Kadi kamo ha akon, ngatanan kamo nga ginugul-an hin pagdara han iyo mabug-at nga mga paras-anon, ngan tatagan ta kamo hin pahuway. Kuhaa an akon yugo ngan ibutang dida ha iyo, ngan pagtuon kamo ha akon kay malumo ako ngan mapinaubsanon ha kasingkasing; ngan hiaagian niyo an pagpahuway. Kay masayon an yugo nga ihinahatag ko ha iyo, ngan magaanay an darad-on nga ipapapas-an ko ha iyo.”

An Ebanghelyo han Ginoo.