PAGBASA I     

Is 41:13-20

Pagbasa tikang han Basahan ni Isaias nga manaragna.

Ako amo an Ginoo nga iyo Dyos; ginpakusog ngan ginsiring ko kamo, ‘Ayaw kamo kahadlok; bubuligan ko kamo.’” Nagsiring an Ginoo, “Bisan kon gutiay ngan maluya kamo, Israel, ayaw kamo kahadlok; bubuligan ko kamo. Ako an baraan nga Dyos han Israel amo an nagtatalwas ha iyo. Hihimoon ko kamo nga sugad hin giriokan nga tabla, nga may bag-o ngan magtarom nga mga ngipon. Paggigiokon ngan pagbubungkagon niyo ini mga bukid; madudugmok in kapungtoran ngan pupusakon nga mahimo nga tapotapo. Itatakyab ini niyo; igpapalid ini han hangin, ngan igpapasarang ini pinaagi han bagyo. Niyan magmamalipayon kamo kay ako amo an iyo Dyos; iyo pagdadayawon ako nga baraan nga Dyos han Israel. “Kon ha ira pagkinahanglan mamiling hin tubig an akon mga tawo, kon magmara na hin uhaw an ira mga but-ol, niyan ako nga Ginoo an mabaton han ira pag-ampo; diri gud ako nga Dyos han Israel magsasalikway ha ira. Paaawason ko in mga salog dida hin bangkil nga kapungtoran, ngan mga burabod hin tubig didto han mga kahamub-an. Hihimoon ko an kamingawan nga mga linaw hin tubig, ngan an mamara nga tuna nga masulog nga burabod. Patutudkon ko didto ha kamingawan in mga kahoy nga sidro, ngan mga kahoy nga akasya, mga mirtol, ngan mga olibo. Maturok in mga kagurangan didto hin bangkil nga tuna, mga kagurangan hin palotsina, aguho, ug sipre. Hikikit-an ini hin mga tawo ngan hibabaroan nira nga ako nga Ginoo an nagbuhat hini. Makakasabot hira nga ginbuhat ini han baraan nga Dyos han Israel.”

An Pulong han Ginoo.

SALMO RESPONSORIO

Sal 145:1 & 9, 10-11, 12-13ab

℟. An Ginoo maloloy-on ug napaid; mahinay masina, ngan hura hin kalooy.

1. Isangyaw ko ikaw, O Dyos, ngan hadi ko,

magpapasalamat hin dayon ha imo.

Maupay ha tanan hiya nga Ginoo,

ha tanan binuhat napaid hin husto.

℟. An Ginoo maloloy-on ug napaid; mahinay masina, ngan hura hin kalooy.

2. Tanan nga im’ mga binuhat, Ginoo,

mananagdayaw gud ngatanan ha imo.

Ngan pagpapasalamatan ka na hadto,

han ngatanan gud nga imo mga tawo.

An kaharangdon han imo ginhadian

amo gud an ira paghihimangrawan.

Ira igsusumat ngadto han ngatanan

an imo kakusgan, imo kagamhanan.

℟. An Ginoo maloloy-on ug napaid; mahinay masina, ngan hura hin kalooy.

3. Hisabtan han tanan buhat mo nga gamhanan,

ngan an kaanyag gud han im’ ginhadian.

An im’ ginhadian magpapadayon man,

maghahadi ka hin waray kataposan.

℟. An Ginoo maloloy-on ug napaid; mahinay masina, ngan hura hin kalooy. 

EBANGHELYO             

Mt 11:11-15

Pagbasa tikang han santos nga Ebanghelyo sumala kan Mateo.

Nagsiring hi Jesus, “Tigamni niyo ini! Labaw pa hi Juan nga Parabunyag hin bisan hin-o nga igin-anak hin babaye, kundi labaw pa ha iya an gigugutiayi ha Ginhadian han langit. Tikang han pagwali ni Juan ngada yana, nahiagom na an Ginhadian han langit hin makusog nga mga pagsulong, ngan an mag-isog nga mga tawo naniniguro nga maagaw ini nira. Ngada han panahon ni Juan, naghimangraw mahitungod han Ginhadian an ngatanan nga mga manaragna ngan an Balaod ni Moises; ngan kon karuyag niyo hin pagtoo han ira sumat, hi Juan amo hi Elias kanay pag-abot daan na igintagna. Sanglit, pamati kamo kon may niyo mga durunggan!”

An Ebanghelyo han Ginoo.