PAGBASA I     

Sir 48:1-4, 9-11

Pagbasa tikang han Basahan han Sirac.

Pinakita liwat an maisog nga manaragna nga hi Elias, kanay mga pulong naglalaga sugad hin sulo. Gindad-an niya hin gutom an mga tawo ngan damo ha ira an nagkamatay tungod han iya tinguha nga magpadayon ini nga gutom. Ha pagyakan niya ha ngaran han Ginoo, ginpudngan niya an uran ngan hin tulo ka higayon ginpauran niya hin kalayo. Elias, makaaramdok an imo mga milagro! Waray na gud iba nga makakapanhambog hin sugad nga mga binuhatan! Gindara ka ngadto ha langit dida hin kalayo nga buhawe, usa nga karuwahe nga ginsasaog hin nagkakalayo nga mga kabayo. Nasiring an kasuratan nga andam ka hin pagpakita dida han igintalaan nga panahon, basi hugpoyon mo an kasina han Dyos ha diri pa ini maulyab ha kapungot; nga imo pagtitirokon liwat an mga amay ngan mga anak, ngan ibabalik mo an mga tribo han Israel. Palaran adton mga buhi pa hin pagkita ha imo kon makanhi ka, sugad man adton mga nagkamatay na ha paghigugma, kay mabubuhi man liwat kami.

An Pulong han Ginoo.

SALMO RESPONSORIO

Sal 80:2ac & 3b, 15-16, 18-19

℟. An kalangitan nagpapasangyaw han himaya han Dyos.

1. Pamatii kami, O Magmarangno han Israel;

dungga kami, pangulo han imo panon.

O ikaw nga nalingkod han imo trono dida han kerubim.

Ipakita ha amon an imo kusog.

℟. An kalangitan nagpapasangyaw han himaya han Dyos.

2. Lingia kami, O Dyos nga Labi Kamakagarahum!

Tamdi kami tikang ha langit;

kadi ngan panimangnoa an imo balagon hin ubas!

Kadi ngan panimangnoa ini nga balagon nga ikaw ngahaw an nagtanom,

ini nga luyat nga balagon nga imo ginpakusog hin duro!

℟. An kalangitan nagpapasangyaw han himaya han Dyos.

3. Panalipdi ngan bantayi an katawhan nga imo ginpili,

an nasod nga imo ginpakusog hin duro!

Diri na gud kami matalikod ha imo;

buhia kami, ngan pagdadayawon ka namon.

℟. An kalangitan nagpapasangyaw han himaya han Dyos.

EBANGHELYO             

Mt 17:9a, 10-13

Pagbasa tikang han santos nga Ebanghelyo sumala kan Mateo.

Han paglugsong nira han bukid, gintugon hira ni Jesus, “Kay ano nga nasiring an mga magturutdo han Balaod nga makanhi anay hi Elias?” Binaton hi Jesus, “Makanhi man ngani anay hi Elias ngan aandamon niya an ngatanan. Kundi nasiring ako ha iyo, kinmanhi na hi Elias, ngan waray kumilala an mga tawo ha iya, kundi ginbuhat nira ha iya an ira karuyag. Ha amo man nga paagi, pagpapakurian man liwat nira an Anak han Tawo.” Niyan, nakasabot an mga tinun-an nga naghimangraw hiya ha ira mahitungod kan Juan nga Parabunyag.

An Ebanghelyo han Ginoo.