Tuig A

PAGBASA I     

Is 35:1-6a, 10

Pagbasa tikang han Basahan ni Isaias nga manaragna.

Marayhak an kamingawan, ngan manbubuswak an mga bukad didto han waray gamit nga mga tuna. Makanta ngan magoliat an kamingawan tungod hin kalipay; masusugad ini hin kamatahom han Kabukiran han Libano ngan sugad hin kamalangbo han kaumhan han Carmelo ug Saron. Makita an ngatanan han kaanyag han Ginoo, makita han iya pagkagamhanan ngan pagkaharangdon. Pakusga an mga kamot nga kinakapoy ngan an mga tuhod nga magluya. Sidnga an ngatanan nga nagtuturaw, “Pagdasig ngan ayaw kamo kahadlok! Tikanhi na an Dyos hin pagtalwas ha iyo, Tikanhi na hin pagkastigo han iyo mga kaaway.” Makakakita an mga buta, ngan makakabati an mga bungol. Maglulukso ngan magsasayaw an mga piay, ngan maggogogliat adton mga ngula tungod hin kalipay.

Maabot hira nga malipayon ngadto ha Jerusalem, nga nagkakanta ngan naggogogliat tungod hin kalipay. Magmamalipayon hira ha kadayonan, nga talwas na hira han ira kabidoan ngan kagul-anan.

An Pulong han Ginoo.

SALMO RESPONSORIO

Sal 146:6-7, 8-9, 9-10

℟. Pakadi, Ginoo, ngan talwasa kami.

1. Naghuhukom hiya ngan inuogopan,

adton ginsasakit ngan ginlulupigan.

Adton gutom hin pagkaon gintatagan,

mga priso iya gud ginbubuhian.

℟. Pakadi, Ginoo, ngan talwasa kami.

2. Iya ginpapakita an mga buta,

iya ginbabangon adton natutumba.

Magtadong katawhan iya hinigugma,

mga dumuruong ginmamangnoan n’ya.

℟. Pakadi, Ginoo, ngan talwasa kami.

3. Hadi gud hin kadayonan an Ginoo,

maghahadi gudman, O Sion, an Dyos mo.

Para han ngatanan nga panahon ito,

pagdayawon, pagdayawon an Ginoo!

℟. Pakadi, Ginoo, ngan talwasa kami.

PAGBASA II

Snt 5:7-10

Pagbasa tikang han Surat ni Santiago.

Kabugtoan ko, pagmailobon kamo, tubtob han pag-abot han Ginoo. Kitaa niyo an kamailobon han parauma samtang naghuhulat han pag-ani han abot han iya uma. Naghuhulat hiya nga mapailobon han panahon han kat-uran. Kinahanglan magmailobon liwat kamo. Magmalinaomon gud kamo kay hirani na an adlaw han pag-abot han Ginoo. Kabugtoan ko, ayaw kamo paggipasumbongsumbong, basi diri kamo paghukman han Dyos. Hirani na an Maghurukom, andam na pagsulod! Kabugtoan ko, hinumdomi niyo an mga manaragna nga nagyakan ha ngaran han Ginoo. Himoa niyo hira nga mga susbaranan hin mapailobon nga pagpadayon ha butnga hin mga pag-antos.

An Pulong han Ginoo.

EBANGHELYO

Mt 11:2-11

Pagbasa tikang han santos nga Ebanghelyo sumala kan Mateo.

Han pakabati ni Juan nga parabunyag didto ha bilanggoan mahitungod han mga buhat ni Cristo, ginpakadto niya kan Jesus in pira han iya mga tinun-an. Nagpakiana hira kan Jesus, “Sumati daw kami, ikaw ba an ginpapaabot nga ginsiring ni Juan, o maghuhulat pa ba kami hin lain?” Binaton hi Jesus, “Balik kamo ngan sumati hi Juan han iyo hinbabatian ngan hinkikit-an: nakakakita na an mga buta, nakakalakat na an mga lulid, malinis na an mga sanlahon, nakakabati na an mga bungol, nabanhaw na an mga minatay, ngan iginpasangyaw na an Maupay nga Sumat ngadto han mga kablas. Hin kapalaran hadton waray pagruhaduha ha akon!” Samtang naoli na an mga tinun-an ni Juan, naghimangraw hi Jesus ha mga tawo mahitungod kan Juan: “Han pagkadto niyo kan Juan didto ha kamingawan, ano man an karuyag niyo hikit-an? Usa ba nga dahon nga ginpapalidpalid han hangin? Ano gud an iyo ginkadto hin pagkita? Usa ba ka tawo nga nakakasul-ot hin mahal nga panapton? Aadto pag-uokoy ha mga palasyo an mga nagpapanapton hin sugad hito! “Sumati ako, ano gud an iyo ginkadto hin pagkita? Usa ba nga manaragna? Tinuod, nasiring ako ha iyo, hinkit-an niyo in labaw pa hin manaragna. Kay amo hi Juan an hinabihan han kasuratan: ‘Iini an akon magsarangyaw, nasiring an Dyos; ipadadara ko hiya una ha imo basi mag-andam han imo aagian.’ Tigamni niyo ini! Labaw pa hi Juan nga Parabunyag hin bisan hin-o nga igin-anak hin babaye, kundi labaw pa ha iya an gigugutiayi ha Ginhadian han langit.

An Ebanghelyo han Ginoo.