PAGBASA I     

Num 24:2-7, 15-17a

Pagbasa tikang han Basahan han Numero.

Hinkit-an ni Balaam an mga tawo han Israel nga nagkampo pinaagi han ira mga tribo. Pinakada ha iya an espiritu han Dyos, ngan iginyakan niya ini nga panagna:

“An tugon ni Balaam nga anak ni Beor, An mga pulong han tawo nga dayag an pagkita ngan an pamati han iginyayakan han Dyos. Ha akon pagtutok, nakita ako dida hin usa nga inop usa nga panan-awon nga tikang han Dyos nga Labi Kamakagarahum. Magtahom an mga tulda han Israel, sugad hin namamarapara nga rumbay hin mga palmera sugad hin mga tanaman ha ligid hin salog, sugad hin mga bukad nga igintanom han Ginoo, o hin mga sidro ha ligid han tubig. Magkakamay-ada hira hura nga uran nga magtutubig han mga kaumhan nga pagtatamnan han ira binhe.

Niyan iya iginyakan ini nga panagna:

“An tugon ni Balaam nga anak ni Beor, an mga pulong han tawo nga dayag an pagkita, ngan an pamati han iginyayakan han Dyos ngan nakarawat han hibaro nga natikang han Gihahataasi. Ha akon pagtutok nakita ko dida hin inop usa nga panan-awon nga tikang han Dyos nga Labi Kamakagarahum. Tinatan-aw ko an panahon nga tiarabot, ngan nakita ako han nasod han Israel. Mabangon dida hini nga nasod in usa nga hadi nga sugad hin mapawa nga bitoon. Mapakita in baston tikang ha Israel.

An Pulong han Ginoo.

SALMO RESPONSORIO

Sal 25:4-5ab, 6 & 7bc, 8-9

℟. Ginoo, igtutdo ha akon an imo mga paagi.

1. Ginoo, tutdoi ako han imo mga paagi,

ipahayag hira ha akon.

Tutdoi ako pagkinabuhi

sumala han imo kamatuoran,

kay ikaw man an akon Magtaralwas.

℟. Ginoo, igtutdo ha akon an imo mga paagi.

2. Ginoo, hinumdomi an imo pagkalooy ngan dayon nga paghigugma

nga iginpakita mo tikang pa hin maiha na nga panahon.

Pasaylo-a an mga sala ngan kasaypanan han akon pagkabatan-on.

Tungod han imo dayuday nga paghigugma ngan pagkamaupay,

hinumdomi ako, O Ginoo!

℟. Ginoo, igtutdo ha akon an imo mga paagi.

3. Matadong ngan maupay an Ginoo;

nagtututdo hiya han dalan nga angay pag-agian han mga makasasala.

Nagmamando hiya han mapinaubsanon

ha matadong nga paagi

ngan nagtututdo ha ira han iya kaburut-on.

℟. Ginoo, igtutdo ha akon an imo mga paagi.

ebanghelyo             

Mt 21:23-27

Pagbasa tikang han santos nga Ebanghelyo sumala kan Mateo.

Binalik hi Jesus ngadto han Templo. Han nagtututdo hiya, hinarani ha iya an mga puno han kapadian ngan an katigurangan nga mga Judiyo, ngan nagpakiana, “Ano an imo katungod hin pagbuhat hini nga mga butang? Hin-o an naghatag ha imo hini nga katungod?” Binaton hi Jesus ha ira, “Mapakiana man ako ha iyo hin makausa la, ngan kon makabaton kamo, pagsusumatan ta kamo kon ano an akon katungod hin pagbuhat hini nga mga butang. Diin man tikang an katungod ni Juan hin pagbunyag? Tikang ba sa Dyos o tikang ba han mga tawo?” Nagtikang hira hin paglarolantugi, “Ano man an aton igbabaton? Kon bumaton kita, ‘Tikang sa Dyos,’ masiring hiya ha aton, ‘Kay ano man nga waray kamo tumoo kan Juan?’ Kundi kon sumiring kita, ‘Tikang han mga tawo,’ mahadlok kita han pagbubuhaton han mga tawo ha aton kay maaram an ngatanan nga manaragna hi Juan.” Sanglit ginbaton nira hi Jesus, “Diri kami maaram.” Ngan nagsiring hiya ha ira, “Diri ko man liwat kamo pagsusumatan kon ano an katungod ko hin pagbuhat hini nga mga butang.

An Ebanghelyo han Ginoo.