Kon Misa de Aguinaldo | Kon diri Misa Misa de Aguinaldo

___________________

Syahan nga Adlaw han Misa de Aguinaldo

PAGBASA I     

Is 56:1-3a,6-8

Pagbasa tikang han Basahan ni Isaias nga Manaragna.

Nagsiring an Ginoo ngadto han iya katawhan, “Buhata niyo an igo ngan matadong kay diri maiha tatalwason ko kamo. Pagpapakaupayon ko adton mga dayuday naglilihe han Adlaw nga Iparahuway, ngan adton diri nag papasipara hini nga Adlaw. Pagpapakaupayon ko adton mga diri nagbubuhat hin bisan ano nga maraot.” Kinahanglan diri sumiring in lumalangyaw nga tinampo na han mga tawo han Dyos, “Diri matugot ha akon an Ginoo hin pagsingba tampo han iya mga tawo.”

Ngan nagsiring an Ginoo ngadto hadton mga lumalangyaw nga kausa na han iya mga tawo, nga nahigugma ngan nag-aalagad ha iya, nga nagtutuman han Adlaw nga Iparahuway, ngan nagtutuman hin kinasingkasing han iya ginsaaran: “Pagdadad-on ko kamo ngadto ha Sion nga akon baraan nga pungtod, paglilipayon ko kamo didto han akon balay hin pag ampo, ngan kakarawaton ko an mga halad nga tinubod nga iyo iginhahalad dida han akon altar. Tataw’gon an akon Templo nga usa nga balay hin pag-ampo para han mga tawo han ngatanan nga mga nasod.” Nagsaad an Ginoo nga Dyos, nga nagpauli han iya mga tawo nga Israel tikang ha pagkabihag, nga dadad-on pa niya an iba nga mga tawo hin pagtampo ha ira.

An Pulong han Ginoo.

SALMO RESPONSORIO

Sal 67:2-3, 5,7-8

℟. Pagdayawon ka han mga nasud, O Dyos!

1. O Dyos, pagmaloloy-on manggad ha amon,

imo unta kami pagpaka upayon.

Tan-awa kami ha im’ kamaloloy-on,

nga sabton han ‘tanan imo kaburut-on.

Tanan mga nasod unta mahibaro,

han katalwasan nga natikang ha imo.

℟. Pagdayawon ka han mga nasud, O Dyos!

2. Maglipay na unta adton kanasoran,

ngan magkaranta na nga may kalipayan.

Kay matadong an paghukom mo han tanan,

ngatanan nga nasod im’ ginmamandoan.

℟. Pagdayawon ka han mga nasud, O Dyos!

3. Kay an katunaan namunga hin duro,

naghatag hin abot, hin ani nga husto.

An Dyos, nga aton Dyos naglipay ha aton,

an Dyos amo an ha aton nagbendisyon.

Katawhan ha tanan dapit mag-uruyon

pagyukbo ha iya hin matinahoron.

℟. Pagdayawon ka han mga nasud, O Dyos!

EBANGHELYO             

Jn 5: 33-36

Pagbasa tikang han santos nga Ebanghelyo sumala kan Juan.

Nagsiring hi Jesus ngadto han mga Judiyo: “Ginpadara niyo an iyo mga sinugo ngadto kan Juan, ngan nagyakan hiya ha ngaran han kamatuoran. Diri nga nagkikinahanglan ako hin kanan tawo pagsaksi; ginsusumat ko la ini, basi matalwas unta kamo. Sugad hi Juan hin suga nga naglalaga ngan malamrag, ngan naruyag kamo ha usa kadali hin pagpahimulos han iya kapawa. Kundi may-ada ko saksi para ha akon, nga labaw pa kay han pagsaksi ni Juan: an mga buhat nga akon gintutuman, an mga buhat nga ginpapatuman ha akon han Amay, mga saksi ini hira para ha akon, ngan nagpapahayag nga ginsugo ako han Amay.”

An Ebanghelyo han Ginoo.

___________________

Martes han Ikatulo nga Semana han Adviento

PAGBASA I

Zof 3:1-2, 9-13

Pagbasa tikang han Basahan ni Sofonias nga manaragna.

Nagsiring an Ginoo: Maghihikaraot an Jerusalem, ito nga mahugaw ngan masupilon nga syudad, nga nagraogdaog han kalugaringon niya nga mga tawo. Waray ini mamati han Ginoo o kumarawat han iya mga pagsaway. Waray ini sumarig han Ginoo o makibulig ha iya.

Niyan babalyoan ko an mga tawo han mga nasod ngan mag-aampo hira ngadi ha akon gudla, ngan diri ngadto hin iba nga kadiyosan. Magsusugot ha akon hira ngatanan. Bisan tikang didto han hirayo nga Sudan magdadara ngadi ha akon hin mga halad an akon nagsasarang nga mga tawo. Dida hito nga panahon, mga tawo ko, diri na kamo kinahanglan maawod nga sinupil kamo ha akon. Kukuhaon ko an ngatanan nga mapahitas-on ngan parayawan, ngan diri na gud kamo masupil ha akon didto han akon baraan nga pungtod. Bibilinan ko didto hin mapinaubsanon ngan makalolooy nga mga tawo nga madangop ha akon hin pakibulig. Diri na magbubuhat hin sayop bisan kan kanay an mga tawo han Israel nga mahibilin nga buhi, diri na magbibinuwa, o maglilimbong. Magmamainuswagon ngan himyang na hira, nga waray na nira sadang kahadlokan.

An Pulong han Ginoo.

SALMO RESPONSORIO          

Sal 34:2-3, 6-7, 17-18, 19 & 23

℟. Pinamamatian han Ginoo an araba han mga kablas.

1. Pasalamatan ko pirme an Ginoo,

pagdayaw ha iya di’ maundang ako.

Tungod han iya buhat ak’ dadayawon,

an ginsakit mamati, magmalipayon!

℟. Pinamamatian han Ginoo an araba han mga kablas.

2. Tan-aw ha iya ngan magmalipayon man;

di’ na mahiawod, di’ na maalohan.

Nasangpit an kabos ngan nabaton hiya,

natalwas han tanan kakurian nira.

℟. Pinamamatian han Ginoo an araba han mga kablas.

3. Kontra hiya han nabuhat hin karat-an,

ngan limoton hira han ira katawhan.

An Ginoo namamati han magtadong,

kakurian nira iya kukuhaon.

℟. Pinamamatian han Ginoo an araba han mga kablas.

3. Hiraniay gad la an aton Ginoo

hadton mga nahuhulop na hin duro.

Tinatalwas niya adton nagugupong,

an nawad-an na han tanan nga paglaom.

Kanan Ginoo nga mga surugoon

han Ginoo manta hira tatalwason;

diri gudman niya hira sisirotan

an naayop ha iya nga panalipdan.

℟. Pinamamatian han Ginoo an araba han mga kablas.

EBANGHELYO

Mt 21:28-32

Pagbasa tikang han santos nga Ebanghelyo sumala kan Mateo.

Nagsiring hi Jesus han mga puno nga kapadian ug an mga katigurangan, “Yana, ano man an iyo paghunahuna? May-ada hadto tawo nga may duha nga mga anak nga kalalaken-an. Ginkadto niya an magurang ngan ginsiring, ‘Anak, pagtrabaho yana nga adlaw ha urubasan.’ Binaton ini hiya, ‘Diri ako magtratrabaho!’ kundi naliwat an iya hunahuna, ngan kinadto hiya ha urubasan. Niyan an amay kinadto han manghod nga anak ngan amo gihapon an iya iginsiring, ‘Oo, makadto ako,’ binaton hiya, kundi waray hiya makadto. Hin-o man ha ira nga duha an nagtuman han karuyag han amay nira?” Binaton hira, “An magurang.” “Susumatan ta kamo,” nagsiring hi Jesus ha ira. “An mga parasukot hin buhis ngan an magraot nga kababayen-an mahiuuna pa ha iyo hin pagsulod han Ginhadian han Dyos. Kay kinanhi ha iyo hi Juan nga Parabunyag hin pagtutdo ha iyo han matadong nga aragian, ngan waray kamo tumoo ha iya; kundi tinoo ha iya an mga paragsukot hin buhis ngan an magraot nga kababayen-an. Bisan ngani kamo, kahuman niyo pakakita, waray gihapon kamo magbasol ngan magtoo ha iya.”

An Ebanghelyo han Ginoo.