PAGBASA I     

Jer 23: 5-8

Pagbasa kinuha dida han Basahan ni Jeremias nga manaragna.

Nasiring an Ginoo, “Maabot an panahon nga magpipili ako hin hadi nga usa nga matadong nga tawo nga tulin ni David. Maghahadi hin masinaboton ito nga hadi ngan magbubuhat han matadong ngan angay ha bug-os nga tuna. Kon hadi na hiya, matatalwas an mga tawo han Juda ngan mag-uokoy ha kalinaw an mga tawo han Israel. Pagtatawgon hiya nga ‘An Ginoo nga Aton Katalwasan.’”

Nasiring an Ginoo, “Maabot an panahon nga diri na an mga tawo magsusumpa pinaagi ha akon sugad nga amo an buhi nga Dyos nga nagpagawas han mga tawo han Israel tikang ha tuna han Ehipto. Lugod  magsusumpa hira pinaagi ha akon sugad nga buhi nga Dyos nga nagpagawas han mga tawo han Israel tikang hin usa nga tuna ha amihanan ngan tikang han iba nga mga nasod nga ginpasadngan ko ha ira. Niyan mag-uokoy na hira didto han ira kalugaringon nga tuna.”

An Pulong han Ginoo.

SALMO RESPONSORIO

Sal 72: 1-2, 12-13, 18-19

℟. Maglulurab an katadungan ha iya panahon;

ngan an hingpit nga kamurayaw waray katapusan.

1. Hin paghukom, O Dyos, an hadi tutdoan,

paangbita hiya han im’ katadongan;

Basi an imo kataw’han paghadian

hin matadong pati an mga kablas man.

℟. Maglulurab an katadungan ha iya panahon;

ngan an hingpit nga kamurayaw waray katapusan.

2. Mga kablas nga nagtatawag ha iya,

iya manta nga binubuligan hira;

sugad man an mga tawo nga kabos na,

ngan adton mga ginpasibay-an nala.

Nalolooy hiya han kablas, magluya,

tinatalwas man adton mga runos na.

℟. Maglulurab an katadungan ha iya panahon;

ngan an hingpit nga kamurayaw waray katapusan.

3. An Dyos ha Israel, Ginoo, dayawon,

H’ya la’n nagbubuhat mga urosahon:

Harangdon nga ngaran n’ya daygon hin dayon,

kahuraan niya an tuna pagpun’on.

℟. Maglulurab an katadungan ha iya panahon;

ngan an hingpit nga kamurayaw waray katapusan.

EBANGHELYO             

Mt 1:18-24

Pagbasa tikang han santos nga Ebanghelyo sumala kan Mateo.

Sugad hini an katawo ni Jesucristo. Han karaslon pa la hi Maria nga iroy niya ngan hi Jose, nahibaroan ni Maria nga burod na hiya ha larang han Espiritu Santo. Diri karuyag magpakaalo kan Maria hi Jose kay matadong hiya nga tawo. Sanglit, nakahunahuna hiya hin pagbaya kan Maria hin hilom la. Kundi samtang ginhunahuna niya ini, pinakita ha iya in usa nga anghel han Ginoo pinaagi hin inop, ngan nagsiring, “Jose, tulin ni David, ayaw pag-alang hin pagkarawat kan Maria nga imo asawa kay nagburod hiya ha larang han Espiritu Santo. Mag-aanak hiya hin lalake, ngan pagngangaranan mo hiya nga Jesus, kay magtatalwas hiya han iya kataw’han tikang han ira mga sala.” Nahinabo ini ngatanan basi matuman an iginyakan han Ginoo pinaagi han manaragna nga nasiring, “Magbuburod in usa nga uray nga daraga ngan mag-aanak hin lalake, ngan tatawgon hiya nga Emmanuel” (nga karuyag sidngon, “An Dyos aanhi upod ha aton”).

Sanglit, han pagmata ni Jose, gintuman niya an iginsugo ha iya han anghel han Ginoo, ngan pinangasawa niya hi Maria. Kundi hi Jose waray makighilawas kan Maria tubtob nga nag-anak hi Maria. Ngan Jesus an iginngaran ni Jose han bata.

An Ebanghelyo han Ginoo.