Tuig A

PAGBASA I     

Is 7:10-14

Pagbasa tikang han Basahan ni Isaias nga manaragna.

Nagpadara an Ginoo hin lain nga mensahe ngadto kan Acas: “Pangaroi hin tigaman an Ginoo nga imo Dyos. Diri ngani tikang ha kahiladman han kalibutan han mga patay o tikang didto ha kahitas-an.” Binaton hi Acas, “Diri ako maaro hin tigaman. Diri ko pagsasarihan an Ginoo.” Nagbaton hi Isaias, “Pamati yana, mga tulin ni Hadi David. Kon diri maupay para ha iyo an paghulop han mga tawo—paghuhulopon ba liwat niyo an akon Dyos? Sanglit an Ginoo ngahaw an mahatag ha iyo hin tigaman: Mag-aanak hin lalake in usa nga burod nga daragita ngan pagngangaranan hiya nga ‘Emmanuel’.

An Pulong han Ginoo.

SALMO RESPONSORIO

Sal 24:1-2, 3-4, 5-6.

℟. Pasudla an Ginoo; hiya an hadi han himaya.

1. An Ginoo han kalibutan an tag-iya,

an ngatanan pa nga butang nga aada:

Pati an tuna upod an mga butang,

hiya an tag-ada hini ngatanan.

Ha hilarom nga dagat iya ini gintindog,

didto ha ilarom han tuna iya gin-usok;

ngan ginbutang an mga patukoranan,

didto ha kahiladman han kalalawdan.

℟. Pasudla an Ginoo; hiya an hadi han himaya.

2. Hin-o an may katungod nga mga tawo,

pagsagka ngadto ha pungtod han Ginoo?

Hin-o in makakahimo hin pagkadto

pagsakob han iya baraan nga Templo?

Amo adton mga putli ha buhat nira,

ngan malinis an ira panhunahuna;

nga diri nasingba han mga kadiyosan,

o nagkakawang han mga ginsaaran.

℟. Pasudla an Ginoo; hiya an hadi han himaya.

3. Pagpapakaupayon gud han Ginoo,

ngan pagtatalwason in sugad nga tawo.

An Dyos amo gud an magpapahibaro,

nga waray hira sala nga bisan ano.

Ini nga mga tawo han Dyos madangop,

ha atubangan han Ginoo ni Jacob.

℟. Pasudla an Ginoo; hiya an hadi han himaya.

PAGBASA II   

Rom 1:1-7

Pagbasa tikang han Surat ni San Pablo ngadto han mga taga Roma.

Tikang kan Pablo nga surugoon ni Cristo Jesus ngan apostol nga pinili ngan tinawag han Dyos hin pagwali han Maupay nga Sumat. Maiha na nga iginsaad han Dyos an Maupay nga Sumat pinaagi han iya mga manaragna, ngan iginsurat dida han Baraan nga Kasuratan. Mahitungod ini han iya Anak nga aton Ginoo Jesu-Cristo: ha iya pagkatawo, tulin hiya ni David; ha iya dyosnon nga pagkabaraan, iginpakita hiya nga makagarahom nga Anak han Dyos pinaagi han iya pagkabanhaw ha mga minatay. Pinaagi ha iya kinarawat ko tikang han Dyos an katungdanan han pagkaapostol, basi tungod kan Cristo dad-on ko ngadto ha pagtoo ngan pagsugot an katawhan ha ngatanan nga mga nasod. Upod man liwat kamo nga aada ha Roma nga gintawag han Dyos basi magin sakop ni Jesu-Cristo. Sanglit nagsusurat ako ha iyo ngatanan nga aada ha Roma, nga mga hinigugma han Dyos ngan gintawag nga magin iya kalugaringon nga mga tawo: Tagan unta kamo han Dyos nga aton Amay ngan han Ginoo Jesu-Cristo han grasya ngan han kamurayaw.

An Pulong han Ginoo.

EBANGHELYO             

Mt 1:18-24

Pagbasa tikang han santos nga Ebanghelyo sumala kan Mateo.

Sugad hini an katawo ni Jesu-Cristo. Han karaslon pa la hi Maria nga iroy niya ngan hi Jose, nahibaroan ni Maria nga burod na hiya ha larang han Espiritu Santo. Diri karuyag magpakaalo kan Maria hi Jose kay matadong hiya nga tawo. Sanglit, nakahunahuna hiya hin pagbaya kan Maria hin hilom la. Kundi samtang ginhunahuna niya ini, pinakita ha iya in usa nga anghel han Ginoo pinaagi hin inop, ngan nagsiring, “Jose, tulin ni David, ayaw pag-alang hin pagkarawat kan Maria nga imo asawa kay nagburod hiya ha larang han Espiritu Santo. Mag-aanak hiya hin lalake, ngan pagngangaranan mo hiya nga Jesus, kay magtatalwas hiya han iya katawhan tikang han ira mga sala.” Nahinabo ini ngatanan basi matuman an iginyakan han Ginoo pinaagi han manaragna nga nasiring, “Magbuburod in usa nga uray nga daraga ngan mag-aanak hin lalake, ngan tatawgon hiya nga Emmanuel” (nga karuyag sidngon, “An Dyos aanhi upod ha aton”). Sanglit, han pagmata ni Jose, gintuman niya an iginsugo ha iya han anghel han Ginoo, ngan pinangasawa niya hi Maria.

An Ebanghelyo han Ginoo.