PAGBASA I     

Is 62:1-5

Pagbasa tikang han Basahan ni Isaias nga manaragna.

Magyayakan ako hin pagdasig han Jerusalem. Diri ako mahilom tubtob nga matalwas hiya, ngan maglamrag an iya pagdarag-an sugad hin sulo ha kagab-ihon.

Jerusalem, nakita an mga nasod ha imo nga madinaogon! Makita han imo kaanyag an ngatanan nira nga kahadian. Tatawgon ka hin bag-o nga ngaran, usa nga ngaran nga iginhatag han Ginoo. Masusugad ka hin usa nga matahom nga korona para han Ginoo. Diri ka na gud tatawagon nga “Sinalikway,” o tatawagon an imo tuna nga “An Binayaan nga Asawa.” “Nalilipay ha Iya an Dyos” an magigin bag-o nimo nga ngaran! Tatawagon an imo tuna nga “Ginkasal-Nga-Malipayon,” kay nalilipay ha imo an Ginoo, ngan sugad hiya hin usa nga bana han imo tuna. Sugad hin usa nga olitawo nga nangangasawa hin uray nga babaye, pangangasaw-on ka niya nga nagtuha ha imo. Sugad nga nalilipay in usa nga bana han iya asawa, malilipay man ha imo an imo Dyos.

An Pulong han Ginoo.

SALMO RESPONSORIO

Sal 147:12-13, 14-15, 19-20

℟. Waray katapusan nga pag-aawiton ko an kamaupay han Ginoo.

1. Siring mo, “Naghimo ak’ hin ginsaaran,

kaupod han tawo nga ak’ ginpili man;

ngan Imay-ada tawo nga ak' ginsaaran,

nga ak’ surugoon nga David an ngaran,

Usa hadton imo mga katulinan,

an pirme maghahadi ha kadayonan;

ngan padayon ko gud nga pananalipdan,

an imo panimalay hin kahadian.”

℟. Waray katapusan nga pag-aawiton ko an kamaupay han Ginoo.

2. Hin pagkamalipayon han mga tawo

nga nagkakaranta pagsingba ha imo;

adto hira nga aada pagpupuyo,

dida han kalamrag han pagkalooy mo!

Tungod ha imo hira nagmamalipayon,

ha bug-os gud nga takna han kaadlawon;

ngan ira ka pirme nga pagdadayawon,

tungod hadton imo pagkamaupayon.

℟. Waray katapusan nga pag-aawiton ko an kamaupay han Ginoo.

3. “Ikaw akon amay, sidngon ako niya

‘Akon Dyos, panalipod, magtaralwas pa.

Saad ko ha iya pirme tutumanon,

Ak’ ginsaaran ha iya magpadayon.

℟. Waray katapusan nga pag-aawiton ko an kamaupay han Ginoo.

PAGBASA II   

Buh 13:16-17, 22-25

Pagbasa tikang han mga Buhat han mga Apostol.

Tinindog hi Pablo ngan nagsenyas hiya ha ira nga maghilom, ngan namulong hiya: “Mga igkasi ko Israelita ngan ngatanan nga mga Hentil nga hahani nga nagsisingba han Dyos: pamatii ako! An Dyos han kataw’han han Israel nagpili han aton mga kaapoy-apoyan ngan ginhimo hira nga dako nga nasod ha panahon han pag-ukoy nira nga mga lumalangyaw didto ha Ehipto. Ginpagawas hira han Dyos tikang ha Ehipto pinaagi han iya dako nga gahom.

“Kahuman pagpaiwasa niya kan Saul, hi David an ginhimo han Dyos nga ira hadi. Amo ini an iginsiring han Dyos mahitungod ha iya, ‘Hinbaroan ko nga hi David nga anak ni Isai amo an tawo nga akon naruruyagan ngan magtutuman han ngatanan nga akon karuyag ipabuhat ha iya.’ Hi Jesus nga tulin ni David amo an ginhimo han Dyos nga Magtaralwas han kataw’han han Israel sumala han iya iginsaad. Han waray pa magtikang hi Jesus han iya buruhaton, nagwali na hi Juan ha ngatanan nga mga tawo han Israel nga kinahanglan magbasol hira ngan magpabunyag. Han harapit na matapos hi Juan han iya buruhaton, nagsiring hiya ha mga tawo, ‘Para ha iyo, hin-o gud ako? Diri ako amo an iyo ginhihinulat. Kundi kitaa: makanhi hiya sunod ha akon, ngan diri ngani ako takos hin paghukas han mga sandalyas han iya tiil.’”

An Pulong han Ginoo.

EBANGHELYO             

Mt 1 : 1-25

[Mt 1:18-25]

Pagbasa tikang han santos nga Ebanghelyo sumala kan Mateo.

Amo ini an pagkasunodsunod han mga kaapoy-apoyan ni Jesu-Cristo nga tulin ni David, nga tulin ni Abraham.

Tikang kan Abraham ngadto kan Hadi David, amo ini an mga kaapoy apoyan: Abraham, Isaac, Jacob, Juda, ngan an iya kabugtoan; Fares ug Sara (an iroy nira amo hi Tamar), Esrom, Aram, Aminadab, Naason, Salmon, Boos (an iroy niya amo hi Rahab), Obed (an iroy niya amo hi Rut), Isai, ngan hi Hadi David.

Tikang kan David ngadto han panahon han pagbalhina nga mga bihag han mga tawo han Israel ngadto ha Babilonia, amo ini an mga kaapoy-apoyan: David, Solomon (an iroy niya amo an asawa anay ni Urias), Roboam, Abias, Asa, Josafat, Joram, Usias, Jotam, Acas, Ezequias, Manases, Amon, Josias, ngan hi Jeconias ngan an iya kabugtoan.

Tikang han panahon kahuman han kabalhin nira nga mga bihag ha Babilonia ngadto han katawo ni Jesus, amo ini an mga kaapoy-apoyan: Salatiel, Sorobabel, Abiud, Eliaquim, Asor, Sadoc, Aquim, Eliud, Eleasar, Matan, Jacob, ngan Jose nga nangasawa kan Maria, an iroy ni Jesus nga ginngaranan nga Mesiyas.

Sanglit, may-ada katorse ngatanan nga katulinan tikang kan Abraham ngadto kan David, katorse man nga katulinan tikang kan David ngadto han kabalhin nira nga mga bihag ha Babilonia, ngan katorse liwat nga katulinan tikang han kabalhin nira nga mga bihag ha Babilonia ngadto han katawo han Mesiyas.

[ Sugad hini an katawo ni Jesucristo. Han karaslon pa la hi Maria nga iroy niya ngan hi Jose, nahibaroan ni Maria nga burod na hiya ha larang han Espiritu Santo. Diri karuyag magpakaalo kan Maria hi Jose kay matadong hiya nga tawo. Sanglit, nakahunahuna hiya hin pagbaya kan Maria hin hilom la. Kundi samtang ginhunahuna niya ini, pinakita ha iya in usa nga anghel han Ginoo pinaagi hin inop, ngan nagsiring, “Jose, tulin ni David, ayaw pag-alang hin pagkarawat kan Maria nga imo asawa kay nagburod hiya ha larang han Espiritu Santo. Mag-aanak hiya hin lalake, ngan pagngangaranan mo hiya nga Jesus, kay magtatalwas hiya han iya kataw’han tikang han ira mga sala.” Nahinabo ini ngatanan basi matuman an iginyakan han Ginoo pinaagi han manaragna nga nasiring, “Magbuburod in usa nga uray nga daraga ngan mag-aanak hin lalake, ngan tatawgon hiya nga Emmanuel” (nga karuyag sidngon, “An Dyos aanhi upod ha aton”). Sanglit, han pagmata ni Jose, gintuman niya an iginsugo ha iya han anghel han Ginoo, ngan pinangasawa niya hi Maria. Kundi hi Jose waray makighilawas kan Maria tubtob nga nag-anak hi Maria. Ngan Jesus an iginngaran ni Jose han bata. ]

An Ebanghelyo han Ginoo.

______________________

An kadaan nga paghubad han Mt 1:1-25

Pagbasa tikang han santos nga Ebanghelyo sumala kan Mateo.

An basahan han katulinan ni Jesucristo, nga anak ni David, nga Anak ni Abraham.

Nagin amay hi Abraham ni Isaac, hi Isaac an amay ni Jacob, hi Jacob an amay ni Juda ngan han iya mga kabugtuan. Nagin amay hi Juda ni Fares ngan Zara nga an iroy amo hi Tamar. Nagin amay hi Fares ni Esrom, hi Esrom an amay ni Aram, hi Aram an amay ni Aminadab. Nagin amay hi Aminadad ni Naason, hi Naason an amay ni Salmon, hi Salmon an amay ni Boas nga an iroy amo hi Rajab. Nagin amay hi Boas ni Obed nga an iroy amo hi Rut. Nagin amay hi Obed ni Jesse, hi Jesse an amay ni Hadi David.

Nagin amay hi David ni Solomon nga an iroy amo an nagin asawa anay ni Urias. Nagin amay hi Solomon ni Rehoboam, hi Rehoboam an amay ni Abia, hi Abia an amay ni Asap. Nagin amay hi Asap ni Josafat, hi Josafat an amay ni Horam, hi Horam an amay ni Ozias. Nagin amay hi Ozias ni Joatam, hi Joatam an amay ni Acaz, hi Acaz an amay ni Esequias. Nagin amay hi Esequias ni Manases, hi Manases an amay ni Amon, hi Amon an amay ni Josias. Nagin amay hi Josias ni Jeconias ngan an iya mga kabugtuan han panahon ha pagkabihag ha Babilonia.

Katapos han pagkabihag ha Babilonia, nagin amay hi Jeconias ni Salatiel, hi Salatiel an amay ni Sorobabel, hi Sorobabel an amay ni Abiud. Nagin amay hi Abiud ni Eliakim, hi Eliakim an amay ni Azor, hi Azor an amay hi Sadok. Nagin amay ni Sadok ni Aquim, hi Aquim an amay ni Eliud, hi Eliud an amay ni Eleazar. Nagin amay hi Eleazar ni Mattan, hi Mattan an amay ni Jacob, hi Jacob an amay ni Jose, an bana ni Maria nga tikang ha iya natawo hi Jesus nga ginngangaranan nga Mesiyas.

Kon sugad an ngatanan nga katulinan tikang kan Abraham ngadto kan David maabot hin katorse nga katulinan; tikang kan David ngadto han pagkabihag ha Babilonia, katorse nga katulinan; tikang ha Babilonia ngadto han Mesiyas, katorse nga katulinan.

[ Sugad hini an katawo ni JesuCristo. Han karaslon pa la hi Maria kan Jose, kundi diri pa hira naglulungon, nahibaroan nga nagbuburod na hiya hin bata pinaagi han Espiritu Santo. Naglarang hi Jose pagbulag ha iya hin hilom la kundi nag-alang hiya hin pagpakaalo kay matadong man hiya nga tawo. Amo ini an iya nahuna-hunaan kundi dida han nakaturog hiya tigda la nga nagpainop ha iya in anghel nga nagsiring, “Jose, anak ni David, ayaw kahadlok pagdara kan Maria ngadto han iyo panimalay. Nagpanamkon hiya pinaagi han Espiritu Santo. Mag-aanak hiya hin lalake ngan pagngangaranan hiya hin Jesus, tungod hiya an magtatalwas han mga sala. Nahinabo ini basi matuman an ginsiring han Ginoo pinaagi han manaragna:

“Pamati! Usa nga daraga nga uray pa an magbuburod ngan mag-aanak hin lalake nga pagngangaranan hin Emmanuel,” nga an karuyag sidngon “Kaupod ta an Dios.” Pagmata ni Jose, iya gintuman an iginpabuhat ha iya han anghel han Ginoo ngan iya gindara an iya asawa ha iya panimalay. ]

An Ebanghelyo han Ginoo.