PAGBASA I

Is 62: 11-12

Pagbasa tikang han Basahan ni Isaias nga manaragna.

Nagpapahibaro an Ginoo ngadto han bug-os nga tuna: “Sumati an mga tawo han Jerusalem nga tikanhi na an Ginoo hin pagtalwas ha iyo, nga gindadara niya an mga tawo nga iya gintalwas.” Pagtatawgon kamo nga “Baraan nga Kataw’han han Dyos,” “An Kataw’han nga Gintubos han Ginoo.” Pagtatawgon an Jerusalem nga “An Syulad nga Hinihigugma han Dyos,” “An Syudad nga Waray Igsalikway han Dyos.”

An Pulong han Ginoo.

SALMO RESPONSORIO

Sal 97: 1 & 6, 11-12

℟. Magmamasiga ha aton yana nga adlaw

in usa nga kapawa, kay natawo an aton Ginoo.

1. Hadi an Ginoo! Pagkalipay, tuna!

Kapupod-an ha dagat, pagkalipay na!

Iginsasangyaw na hadton kalangitan

ha ngatanan adton iya katadongan;

ngan han mga nasod ini hinkikit-an.

An himaya niya kita han kataw’han.

℟. Magmamasiga ha aton yana nga adlaw

in usa nga kapawa, kay natawo an aton Ginoo.

2. Nasilaw an lamrag ha mga magtadong,

an mga mag-upay, nagmamalipayon;

rayhak ha Ginoo, magtadong ngatanan,

iya baraan ngaran pasalamatan.

℟. Magmamasiga ha aton yana nga adlaw

in usa nga kapawa, kay natawo an aton Ginoo.

PAGBASA II   

Ti 3:4-7

Pagbasa tikang han Surat ni San Pablo ngadto kan Tito.

Han pagpakita na han kalooy ngan gugma han Dyos nga aton Magtaralwas, gintalwas kita niya. Diri adto tungod hin ano man nga mag-upay nga mga buhat nga aton gintuman, kundi tungod han iya kalugaringon nga pagkalooy nga gintalwas kita niya pinaagi han paghugas han Espiritu Santo nga nahatag ha aton hin bag-o nga pagkatawo ngan bag-o nga kinabuhi. Ibinubo ha aton han Dyos an Espiritu Santo pinaagi kan Jesucristo nga aton Magtaralwas, basi pinaagi han iya grasya, maisip kita nga matadong sa Dyos, ngan makatag-iya kita han aton ginlalaoman nga dayon nga kinabuhi.

An Pulong han Ginoo.

EBANGHELYO             

Lc 2: 15-20

Pagbasa tikang han santos nga Ebanghelyo sumala kan Lucas.

Han pagbalik na han mga anghel ngadto ha langit, nagsarabot an mga magmarangno hin karnero, “Kadto kita ha Betlehem ngan kitaa ta ini nga butang nga nahinabo nga iginsumat ha aton han Ginoo.” Sanglit nagdagmit hira hin pagkalakat, ngan hin-agian nira hira Maria ug Jose, ngan hinkit-an nira an bata nga hinulid ha pasungan. Han pakakita nira han bata, iginsumat han mga magmarangno an iginsiring han anghel mahitungod ha iya. Nanhipausa an ngatanan nga nagpakabati hini nga iginsumat ha ira han mga magmarangno. Gintipigan ni Maria ini ngatanan nga mga butang, ngan ginpamalandong niya ha iya kasingkasing. Namalik an mga magmarangno nga nagkakanta hin mga pagdayaw sa Dyos, tungod han ngatanan nga ira hinbatian ngan hin kit-an; nahinabo an ngatanan sumala gud han iginsumat ha ira han anghel.

An Ebanghelyo han Ginoo.