PAGBASA I     

Is 9: 1-6

Pagbasa tikang han Basahan ni Isaias nga manaragna.

Kinita hin dako nga kapawa an mga tawo nga naglalakat ha kasisidman. Adton nag-ukoy didto hin masirom nga tuna yana sinirang na ha ira in kapawa. Tinagan mo hira hin dako nga kalipay, O Ginoo; ngan ginlipay mo hira. Narayhak hira tungod han imo ginbuhat, sugad han pagrayhak hin mga tawo kon nag-aani hira, o kon nagbabahinbahin hira han ira tinikas nga mga manggad. Kay ginbari mo an yugo nga nakapabug-at ha ira ngan an tungkod nga naghampak han ira mga sugbong. Ginpirde mo an nasod nga nagtalumpigos ngan nagpahimulos han imo mga tawo, sugad han pagdag-a mo han kasondalohan han Madian hadton maiha na nga panahon. Pagsusunogon hin kalayo an mga butas han nasulong nga kasondalohan ngan an ngatanan nga mga panapton nira nga humog hin dugo! Natawo ha aton in bata! Iginhatag ha aton in anak nga lalake! Ngan magigin punoan hiya naton. Pagtatawgon hiya nga “Urusahon nga Magsaragdon,” “Gamhanan nga Dyos,” “Amay nga Waray Kataposan,” “Prinsipe han Kamurayaw.” Magpapadayon hin kamainuswagon an iya hadianon nga gahom; dayuday magmamalinaw an iya ginhadian. Maghahadi hiya nga sumurunod ni Hadi David, ngan ipapakita niya an iya gahom dida han pagkamatadong ug katadongan, tikang yana tubtob han kataposan nga panahon. Pagbubuhaton gud ini ngatanan han Ginoo nga Labi Kamakagarahum.

An Pulong han Ginoo.

SALMO RESPONSORIO

Sal 96:1-2a,2b-3,11-12,13

℟. Yana nga adlaw natawo an aton Manunubos, hi Cristo nga Ginoo.

1. Kanta ha Ginoo hin bag-o nga kanta!

Kanta ha Ginoo, an bug-oS nga tuna!

Kanta ha Ginoo, pagdayawa hiya!

℟. Yana nga adlaw natawo an aton Manunubos, hi Cristo nga Ginoo.

2. Kada adlaw sumat katalwasan niya

Ha kanasoran iyo igpakilala

iya pagkaharangdon, iya himaya,

ngan an mga gamhanan nga buhat niya

ha ngatanan nga kataw’han han tuna.

℟. Yana nga adlaw natawo an aton Manunubos, hi Cristo nga Ginoo.

3. Pagkalipay kamo, tuna, kalangitan!

Uwang, dagat, ug binuhat ha imo man;

pagkalipay kamo nga mga kaumhan,

ngan mga binuhat ha imo ngatanan.

Niyan magrarayhak tanan kakahoyan.

℟. Yana nga adlaw natawo an aton Manunubos, hi Cristo nga Ginoo.

4. Pagrayhak ha Ginoo kay maabot hiya gud man,

katawhan ha tuna iya paghadian

han pagkamatadong ngan kamatuoran.

℟. Yana nga adlaw natawo an aton Manunubos, hi Cristo nga Ginoo.

PAGBASA II   

Ti 2:11-14

Pagbasa tikang han Surat ni Apostol Pablo ngadto kan Tito.

Iginpahayag han Dyos an iya grasya para han katalwasan han ngatanan nga mga tawo. Nagtututdo ha aton ito nga grasya, nga bayaan ta an diri dyosnon nga kinabuhi ngan an kalibutanon nga mga kaipahon, ngan mag-ukoy kita dida hin pagpugong han kalugaringon, hin matadong, ngan hin dyosnon nga kinabuhi dinhi hini nga kalibutan, samtang naghuhulat kita han ginlalaoman ta nga baraan nga Adlaw, diin makikita an kaharangdon han aton gamhanan nga Dyos ngan Magtaralwas, hi Jesucristo. Igintubyan niya an iya kalugaringon tungod ha aton, hin pagtalwas ha aton  tikang han ngatanan nga karat-an, ngan hin paghimo ha aton nga putli nga mga tawo nga sakop gudla ni Cristo, ngan nagtitinguha pagbuhat hin maupay.

An Pulong han Ginoo.

EBANGHELYO

Lc 2:1-14

Pagbasa tikang han santos nga Ebanghelyo sumala kan Lucas.

Hadto nga panahon nagsugo hi Emperador Augusto nga magpalista para han sensos an ngatanan nga mga sakop han Imperyo. Hi Cirenio amo an gobernador han Siria han paghimoa hini nga syahan nga sensos. Sanglit kinadto hin pagpalista an ngatanan, an kada usa ngadto han iya kalugaringon nga bungto. Tikang ha bungto han Nazaret ha Galilea, kinadto hi Jose ha Judea, ngadto han bungto han Betlehem nga natawhan ni Hadi David, kay tulin man hiya ni David. Kinadto hiya hin pagpalista upod hi Maria nga sinayoran na ha iya, ngan hingarak-an na. Samtang nakadto hira ha Betlehem, inabot an panahon nga mag-aanak na hi Maria. Nag-anak hiya han iya suhag nga lalake, ginputos niya hin mga lampin, ngan iginhulid ha pasungan, kay waray na man lugar para ha ira didto han balay nga pahuwayan.

May mga magmarangno hin karnero didto hadto nga dapit nga nag-aagma ha bug-os nga gab-i didto han kaumhan hin pagmangno han ira mga panon. Pinakita ha ira in usa nga anghel han Ginoo, ngan nalamragan hira han himaya han Ginoo, ngan nagkahadlok hira. Kundi nagsiring ha ira an anghel, “Ayaw kamo kahadiok! Hahani ako ngan may-ada ako dara nga maupay nga sumat para ha iyo, nga maghahatag hin dako nga kalipayan han ngatanan nga kataw’han. Natawo yana nga adlaw didto han bungto ni David an iyo Magtaralwas nga amo an Cristo nga Ginoo. Amo ini an tigaman para ha iyo: hiaagian niyo in bata nga pinutos hin mga lampin ngan hinulid ha pasungan.” Ha gilayon pinakita upod han anghel in dako nga hugpo hin mga anghel ha langit, nga nagkakanta hin mga pagdayaw ha Dyos: “Himaya sa Dyos ha kahitas-an, ngan kalinaw dinhe ha tuna hadton mga tawo nga maupay an kaburot-on!”

An Ebanghelyo han Ginoo.