PAGBASA I     

Sir 3:2-6, 12-14

Pagbasa tikang han Basahan han Sirac.

An mga kag-anak gintagan han Ginoo hin pagburot-an han ira mga anak, ngan tinagan an mga anak han katungdanan hin pagsugot han ira mga nanay. Kon magtahod kamo han iyo amay, magkakabayad na kamo han iyo mga sala, ngan kon pasidunggan niyo an iyo nanay, magtitirok kamo hin dako nga manggad. Kon magtahod kamo han iyo amay, ha san-o nga adlaw paglilipayon liwat kamo han iyo mga anak; pamamatian han Ginoo an iyo mga pag-ampo. Kon magsugot kamo han Ginoo pinaagi hin pagpasidungog han iyo amay, ngan pagpahalipay han iyo nanay, mag-uokoy kamo hin hilawig nga kinabuhi.

Anak, mangnoi an imo amay kon lagas na hiya; ayaw hiya tagi hin kaguol samtang buhi pa hiya. Ipakita an imo pagpaid ha iya bisan kon maluya na an iya hunahuna; ayaw hiya pagtamaya tungod la nga makusog ngan maupay an imo panlawas. Diri an Ginoo mahingangalimot han kalooy nga imo iginpakita han imo amay; makakabulig ini hin pagbayad han imo mga sala.

An Pulong han Ginoo.

SALMO RESPONSORIO

Sal 128:1-2, 3, 4-5

℟. Malipayon  an tawo nga nahadlok han Ginoo ug naglalakat ha iya dalan.

1. Palaran adton nahadlok han Ginoo,

an nagtutuman han iya mga sugo!

Maaangkon mo an ginkinahanglan mo,

may kalipay ngan kauswagan pa nimo.

℟. Malipayon  an tawo nga nahadlok han Ginoo ug naglalakat ha iya dalan.

2. Magigin-pareho an imo asawa

hin ubas ha balay, damo gud an bunga.

Mga anak mo mapapareho hira,

hin olibo palibot han im' lamesa.

℟. Malipayon  an tawo nga nahadlok han Ginoo ug naglalakat ha iya dalan.

3. Sugad hini an kaupayan hin tawo,

kon nahahadlok gud hiya an Ginoo.

Paglilipayon gud hiya hin tutoo.

Ha Sion an Dyos maglipay gud ha imo!

Kauswagan hadton Jerusalem unta

tanan nga adlaw mo imo makikita!

℟. Malipayon  an tawo nga nahadlok han Ginoo ug naglalakat ha iya dalan.

PAGBASA II   

Col 3:12-21

[Col 3:12-17]

Pagbasa tikang han Surat ni San Pablo ngadto han mga taga Colosas.[ Mga kabugtoan: Hi kamo amo an mga tawo han Dyos; ginhigugma kamo niya ngan ginpili nga magin iya kalugaringon. Sanglit, kinahanglan maloloy-on kamo, mapuanguron, mapinaubsanon, buotan, ngan may-ada pagpaid. Pagsinabtanay kamo, ngan paggiparopasaylo kamo kon in usa ha iyo may-ada sumbong kontra hin iba. Kinahanglan maggiparupasaylo kamo, sugad han pagpasaylo ha iyo han Ginoo. Ngan ha ngatanan hini idugang an gugma nga naghihigot han ngatanan nga mga butang ngada hin hingpit nga pagkaurosa. Papaghadia ha iyo mga kasingkasing an kalinaw nga ihinahatag ni Cristo, kay tungod hini nga kalinaw gintawag kamo han Dyos ngada hin usa nga lawas. Ngan pagpasalamat kamo. Kinahanglan mag-ukoy dida ha iyo mga kasingkasing an hingpit nga mensahe ni Cristo. Pagtinutdoay ngan pagsinagdonay kamo sugad han iyo hinbabaroan. Pagkanta kamo hin mga salmo, mga imno, ngan mga baraan nga arawiton. Pagkanta kamo ngadto han Dyos upod an pagpasalamat ha iyo mga kasingkasing. An ngatanan nga iyo bubuhaton o yayaknon kinahanglan buhaton niyo ha ngaran han Ginoo nga Jesus, samtang nga nagpapasalamat kamo han Dyos nga Amay pinaagi ha iya. ] Mga asawa, pagsugot kamo han iyo bana, kay amo ini an angay niyo buhaton ha iyo pagkacristianos. Mga bana, higugmaa niyo an iyo asawa, ngan upaya an iyo pag-alagad ha ira. Mga anak, kinahanglan dayuday an pagsugot niyo han iyo mga kag-anak, kay amo ini an nakakalipay han Dyos. Mga kag-anak, ayaw niyo pagbusai an iyo mga anak, bangin hira magturaw.An Pulong han Ginoo.

EBANGHELYO             

Mt 2:13-15, 19-23

Pagbasa tikang han santos nga Ebanghelyo sumala kan Mateo.

Han paghilakat na nira, pinakita kan Jose ha inop in usa nga anghel han Ginoo ngan nagsiring, “Buhat, dad-a an bata ngan an iroy niya, ngan palagiw kamo ngadto ha Ehipto. Pabilin kamo didto ngada han pagsidnga ko ha iyo, kay magbibiling han bata hi Herodes basi patayon niya.” Binuhat hi Jose, gindara niya an bata ngan an iroy, ngan kinalagiw hira ngadto ha Ehipto hadto ngahaw nga gab-i. Nagpabilin hira didto ngada han kamatay ni Herodes. Nahinabo ini basi matuman an iginsiring han Ginoo pinaagi han manaragna, “Gintawag ko an akon Anak tikang ha Ehipto.”

Han kamatay na ni Herodes, pinakita kan Jose pinaagi hin inop didto ha Ehipto in usa nga anghel han Ginoo. Nagsiring hiya, “Buhat, dad-a an bata ngan an iroy niya, ngan balik ngadto ha tuna han Israel, kay patay na an mga nagdudumot han bata.” Sanglit binuhat hi Jose, gindara niya an bata ngan an iroy niya, ngan inoli ngadto ha Israel. Kundi han pakabati niya nga hi Arquelao nga anak ni Herodes, amo an sinaliwan nga hadi han Judea, nahadlok hi Jose hin pag-ukoy didto. Ginpahimangno pa hiya pinaagi hin inop, sanglit kinadto hiya ha lalawigan han Galilea; ngan nag-ukoy hiya ha Nazaret nga bungto, basi matuman ini nga iginsiring han manaragna: “Tatawgon hiya nga Nazareno.”

An Ebanghelyo han Ginoo.