DOMINGO KATIMA HAN EFIPANIA

Kataposan nga Adlaw han Panahon Pasko han Pagkatawo han Ginoo

Tuig ABC

PAGBASA I 

Is 42:1-4, 6-7

Pagbasa tikang han Basahan ni Isaias nga manaragna.

Nasiring an Ginoo, “Iini an akon surugoon nga akon ginpakusog—an akon pinili nga nakakalipay ha akon. Ginpuno ko hiya han akon espiritu, ngan dadad-on niya in katadongan ngadto han tagsa nga nasod. Diri hiya magoliat o masinggit, o diri dako an iya tingog kon mamulong hiya didto han kakalsadahan. Diri hiya magbabari hin nabawog nga tangbo, o magpaparong hin tikapaparong na nga suga. Dadad-an niya an ngatanan hin katadongan nga waray pagkatapos. Diri hiya mawawad-an hin paglaom o kadasig; paririg-on niya an katadongan dinhe ha tuna. Naghuhulat han iya pagturon-an an higrayo nga katunaan.”

“Ako nga Ginoo an nagtawag ha imo ngan naghatag ha imo hin gahom, basi talinguhaon mo nga pagbuhaton an katadongan dinhe ha tuna. Pinaagi ha imo hihimoon ko in ginsaaran ha ngatanan nga mga tawo; pinaagi ha imo pagdadad-an ko hin kapawa an mga nasod. Bubuksan mo an mga mata han mga buta, ngan pagagawson mo adton aadto ha magsirom nga mga prisohan.”

An Pulong han Ginoo.

SALMO RESPONSORIO

Sal 29:1-2, 3-4, 3, 9-10

℟. Kamurayaw an igbebendisyon han Ginoo han iya katawhan.

1. Dayawa an Ginoo, ha langit kagamhanan,

an iya gahom ngan an kahimayaan;

Dayawa an iya matahom nga ngaran,

Singbaha niyo an Usa nga Baraan.

℟. Kamurayaw an igbebendisyon han Ginoo han iya katawhan.

2. Ha dagat hibabatian an Ginoo,

nagdadalugdog an gamhanan nga Dyos ko;

an dako niya nga aningal hinbatian,

ha bawbaw han hiluag nga kalalawdan.

An dalugdog nga tingog han Dyos hinbatian,

ha bug-os nga kusog ug kahimayaan.

℟. Kamurayaw an igbebendisyon han Ginoo han iya katawhan.

3. Nagdadalugdog an gamhanan nga Dyos ko;

ha paggoliat ha Templo han ngatanan,

“Ngadto han Dyos, Ginoo an kadungganan.”

Naghahadi an Ginoo ha kadayonan.

℟. Kamurayaw an igbebendisyon han Ginoo han iya katawhan.

PAGBASA II

Buh 10:34-38

Pagbasa tikang han mga  Buhat han mga Apostol.

Nagtikang hi Pedro hin pamulong, “Hinsasabtan ko na yana nga matuod gud man nga waray han Dyos pinalabi. Kinakarawat niya an may kahadlok ha iya ngan nagbubuhat han matadong, bisan kon ano nga tulin hin katawhan hiya. Maaram kamo han mensahe nga iginhatag niya ha mga tawo han Israel, nga amo an pagpasangyaw han Maupay nga Sumat han kamurayaw pinaagi kan Jesu-Cristo, an Ginoo han ngatanan. Maaram kamo han dako nga nahinabo ha bug-os nga tuna han Israel, nga nagtikang ha Galilea kahuman han pagwali ni Juan han iya mensahe mahitungod hin pagbunyag. Maaram kamo mahitungod kan Jesus nga taga-Nazaret, nga iginbubo ha iya han Dyos an Espiritu Santo ngan an Gahom. Kinmadto hiya ha ngatanan nga dapit hin pagpakaupay ngan hin pagtambal han ngatanan nga ginagarongan han Yawa, kay an Dyos nakada ha iya.”

An Pulong han Ginoo.

Tuig A

EBANGHELYO

Mt 3:13-17

Pagbasa tikang han santos nga Ebanghelyo sumala kan Mateo.

Hadto nga panahon, inabot hi Jesus tikang ha Galilea, ngan kinadto kan Juan didto ha Jordan basi bunyagan hiya ni Juan. Gintalinguha ni Juan nga magbalhin hi Jesus han iya nahuhunahunaan ngan iya ginsiring, “Ako kunta an angay pagbunyagan mo, kundi ikaw lugod an napakanhi ha akon!” Kundi binaton hi Jesus ha iya, “Pabay-i la anay ini yana. Kay dida hini nga paagi mahihimo naton an ngatanan nga ginkikinahanglan han Dyos.” Ngan tinangdo hi Juan. Han kabunyagi na kan Jesus, hinmawas hiya han tubig. Nabuksan an langit ngan hinkit-an ni Jesus an Espiritu han Dyos nga nakunsad sugad hin sarapati ngan hinugdon dida ha iya. Ngan nagsiring in tingog tikang ha langit, “Amo ini an akon hinigugma nga Anak nga nakakalipay gud ha akon.”

An Ebanghelyo han Ginoo.