PAGBASA I     

1 Sam 1:9-20

Pagbasa tikang han Syahan nga Basahan ni Samuel.

Usa ka higayon, katapos nira pangaon didto han balay han Ginoo ha Silo, tinindog hi Ana. Mabidoon gud hiya ngan duro an iya pagtinangis samtang nag-aampo hiya ngadto han Ginoo. Hito nga takna nakadto hi Eli nga padi han iya lingkoran ha ligid han porta. Nagsumpa hi Ana, “Ginoo nga Labi Kamakagarahum, siplati gad ako nga imo surugoon! Tan-awa an akon kasakitan, ngan hinumdomi ako! Ayaw gad ako hingalimti! Kon imo ako tagan hin anak nga lalake, nagsasaad ako nga akon hiya ighahalad ha imo ha bug-os niya nga kinabuhi ngan diri ko gud hiya aarotan.” Naiha an pag-inampoon ni Ana ngadto han Ginoo ngan gin-ininaw ni Eli an iya mga im-im. Hilom la an iya pag-ampo; nagkikiwa an iya mga im-im, kundi waray niya tingog nga hinbabatian. Sanglit nakahunahuna hi Eli nga hubog hi Ana, ngan ginsiring hiya, “Ayaw na pagpakahubog! Ayaw na pag-ininom ngan upaya na an imo panhunahuna!” “Diri gad ako hubog,” binaton hiya, “Waray gad ako pag-ininom! Masurub-on gud ako, ngan nag-inampo ako, basi makapahungaw ako han akon kakurian ngadto han Ginoo. Ayaw pakasiring nga maraot ako nga babaye. Nag-inampo ako hin sugad hini kay makalolooy an akon kahimtang.” Nagsiring hi Eli, “Lakat nga malinawon; ayaw na kaguol. Tagan ka unta han Dyos han Israel han imo pinangaro ha iya.” Binaton hiya, “Magmaloloy-on ka unta ha akon.” Niyan linakat hiya, kinaon, ngan waray na pagmabidoon. Han pagkabuwas han aga binuhat hin temprano hi Elcana ngan an iya panimalay, ngan katapos nira magsingba han Ginoo, inoli hira ngadto ha Rama.

Nakighilawas hi Elcana kan Ana nga iya asawa, ngan pinamatian han Ginoo an pag-ampo ni Ana. Nagburod hi Ana ngan nag-anak hin lalake. Iya ginngaranan nga Samuel, kay siring pa niya, “Gin-aro ko hiya han Ginoo.”

An Pulong han Ginoo.

SALMO RESPONSORiO          

1 Sam 2:1, 4-5, 6-7, 8abcd

℟. Nalilipay an akon kasingkasing dida han Ginoo.

1. Ginpuno han Ginoo hin kalipay an akon kasingkasing;

kamalipayon ko tungod han iya ginbuhat!

Gintataw-an ko la an akon mga kaaway;

kamalipayon ko kay ginbuligan ako han Dyos!

℟. Nalilipay an akon kasingkasing dida han Ginoo.

2. Nababari an mga pana han kusgan nga mga sondalo,

kundi nagmamakusog an mga magluya.

An mga tawo nga hadto anay hura hin pagkaon

nagpapasuhol na yana basi makakaon;

kundi may-ada na pagkaon an mga ginugutom.

Nag-anak an baw-as nga asawa hin pito nga anak,

kundi an iroy hin damo napuohan hin mga anak.

℟. Nalilipay an akon kasingkasing dida han Ginoo.

3. Makakahimo an Ginoo hin pagpatay ngan hin paghatag liwat kinabuhi;

pinapakadto niya an mga tawo ha kalibutan han mga patay,

ngan ginkukuha liwat niya.

Itinugot niya nga mapobre in pira nga mga tawo ngan mariko an iba;

nga magpaubos in pipira ngan magamhanan an iba.

℟. Nalilipay an akon kasingkasing dida han Ginoo.

4. Binabayaw niya an mga kablas tikang ha tuna,

ngan binabangon niya an mga makalolooy ha ira kakurian.

Ngan ginhihimo hira nga mga kaupod hin mga pangulo,

ngan ibinubutang hira ha mga dapit nga dungganan.

℟. Nalilipay an akon kasingkasing dida han Ginoo.

EBANGHELYO

Mc 1:21-28

Pagbasa tikang han Santos nga Ebanghelyo sumala kan San Marcos.

Inabot hira ha bungto han Capernaum ngan han pagkasunod nga Adlaw nga Iparahuway, sinakob hi Jesus han ira sinagoga ngan nagtikang hin pagtutdo. Nahipausa an mga tawo han iya pagtutdo, kay diri man hiya sugad han mga magturutdo han Balaod ni Moises; lugod, an iya pagtutdo may-ada gahom. Hito nga takna, sinakob han sinagoga in tawo nga may maraot nga espiritu ngan ginoliat, “Ano an imo karuyag buhaton ha amon, Jesus nga taga-Nazaret? Pupuohon mo ba kami? Nakilala ako kon hin-o ka: Ikaw an baraan nga sinugo han Dyos!” Ginsaway ni Jesus an maraot nga espiritu, “Ayaw hin aringasa. Gawas dida hito nga tawo!” Binuntog an tawo, ginoliat hin dako nga tingog, ngan ginawas an maraot nga espiritu dida ha iya. Nahipausa an ngatanan, ngan may hinsiring, “Ano ini nga nahinabo? Usa ba ini nga bag-o nga pagturon-an? May gahom ini nga tawo hin pagsugo han mga magraot nga espiritu ngan nasugot hira ha iya!” Nahisangyaw dayon ha bisan diin nga dapit han katunaan ha Galilea ini nga hinabo nga ginbuhat ni Jesus.

An Ebanghelyo han Ginoo.