PAGBASA I     

1 Sam 3:1-10, 19-20

Pagbasa tikang han Syahan nga Basahan ni Samuel.

Hadto nga mga adlaw han nag-aalagad han Ginoo an bata nga hi Samuel ubos han pagdumara ni Eli, diri pa adto damo an mga mensahe han Ginoo, ngan talagsaon la an mga panan-awon nga tikang ha iya. Usa ka gab-i hi Eli nga haros buta na nakaturog didto han iya kalugaringon nga kwarto; nakaturog man hi Samuel didto ha balay han Ginoo diin nakadto an baraan nga Kahon han Ginsaaran. Han maagahon pa, samtang naglalaga pa an pakaagahan nga suga, nagtawag an Ginoo kan Samuel. Binaton hiya, “Aadi ako!” ngan dinalagan hiya ngadto kan Eli ngan nagsiring, “Nagtawag ka ha akon, ngan iini na ako.” Kundi binaton hi Eli, “Waray ako magtawag ha imo; balik ha imo higdaan.” Sanglit binalik hin paghigda hi Samuel. Nagtawag liwat an Ginoo kan Samuel. Waray kalibutan an bata nga amo adto an Ginoo, kay waray pa gud maghimangraw ha iya an Ginoo hadto. Sanglit binuhat hiya, kinadto kan Eli ngan nagsiring, “Nagtawag ka ha akon, ngan iini na ako.” Kundi binaton hi Eli, “Anak ko, waray ako magtawag ha imo; balik ha imo higdaan.” Nagtawag kan Samuel an Ginoo hin ikatulo; binuhat hiya, kinadto kan Eli ngan nagsiring, “Nagtawag ka ha akon, ngan iini na ako.” Niyan nakasabot hi Eli nga an Ginoo amo an nagtawag han bata, sanglit nagsiring hiya han bata, “Balik ha imo higdaan, ngan kon tawgon ka pa niya, sidnga, ‘Pagyakan, Ginoo, kay namamati an imo surugoon.’” Binalik ha iya higdaan hi Samuel. Inabot an Ginoo ngan tinindog hiya didto, ngan nagtawag sugad han una, “Samuel! Samuel!” Binaton hi Samuel, “Pagyakan; namamati an imo surugoon.”

Nagtubo hi Samuel, kaupod niya an Ginoo, ngan gintuman niya an ngatanan nga iginyakan ni Samuel. Sanglit nahibaro an ngatanan nga mga tawo han Israel, tikang ha usa nga kataposan han tuna ngadto ha luyo, nga tinuod gud nga hi Samuel usa nga manaragna han Ginoo.

An Pulong han Ginoo.

SALMO RESPONSORIO

Sal 40:2 & 5, 7-8a, 8b-9, 10

℟. Iini ako, Ginoo, pagtuman han imo kaburut-on.

1. Duro gud an akon paghinulat

han kanan Ginoo tambulig;

ngan namati hiya ha akon

ngan nadungog an akon pagsangpit.

Palaran an tawo nga nasarig han Ginoo,

nga diri napakadto ha mga diyosdiyos,

o natampo hadton mga nagsisingba hin buwa nga mga diyos.

℟. Iini ako, Ginoo, pagtuman han imo kaburut-on.

2. Diri ka naruruyag hin mga halad-sinunog ngan mga halad;

diri ka nangangaro hin mga mananap

nga ginsunog hin bug-os ha halaran,

o mga halad-sinunog pagkuha hin mga sala.

Gintagan mo lugod ako

hin mga igdurungog pamati ha imo,

sanglit binaton ako, “Iini ako.”

℟. Iini ako, Ginoo, pagtuman han imo kaburut-on.

3. “Aada ha basahan han Balaod an imo

mga tugon para ha akon.

Hin kamaruruyagon ko

pagbuhat han imo kaburut-on, O Dyos ko!

Tinitipigan ko ha akon kasingkasing an imo pagturon-an.”

℟. Iini ako, Ginoo, pagtuman han imo kaburut-on.

4. Iginsumat ko an maupay nga sumat

nga nagtatalwas ka, dida han katig-oban

han ngatanan nimo nga mga tawo, O Ginoo.

Maaram ka nga diri gud ako mahunong pagsinumat hito.

℟. Iini ako, Ginoo, pagtuman han imo kaburut-on.

EBANGHELYO             

Mc 1:29-39

Pagbasa tikang han santos nga Ebanghelyo sumala kan Marcos.

Ginawas han sinagoga hira Jesus ug an iya mga tinun-an, upod hira Santiago ug Juan ngan nagpadayon hira ngadto han balay nira Simon ug Andres.  Nahigda an ugangan nga babayi ni Simon kay hinihirantan.  Pag-abot ni Jesus, ginsumatan hiya mahitungod hini nga masakit.  Gindaop ni Jesus an masakit, kinaptan an kamot, ngan binuligan niya hin pagbuhat.  Nalungasan an masakit han iya hiranat ngan nagdurot ha ira hin pagkaon.

Pagkagab-i, katunod na han adlaw, gindara han mga tawo ngadto kan Jesus an mga magsakit ngan an mga sinasangkayan hin yawa.  Nagtirok an mga tawo ha atubangan han balay.  Gintambal ni Jesus in damo ka la-in nga sakit ngan ginpagawas niya in damo nga mga yawa.  Waray niya tuguti ng makagyakan an mga yawa, kay nakilala ini nga mga yawa kun hin-o hiya.

Han temprano pa han aga, han waray pa sisidlit an adlaw, binuhat hi Jesus ngan linakat.  Ginawas hiya han bungto ngan kinadto hin mamingaw nga dapit ngan didto nag-ampo hiya.  Kundi ginawas liwat han bungto hi Simon ngan an iya mga kaurupod hin pamiling kan Jesus.  Paghiagii nira ha iya, ginsiring nira hiya, “An mga tawo nagpipinamiling ha imo.” Kundi binaton hi Jesus, “Pakadto kita ha iba nga mga baryo nga hiraniay dinhi hini nga dapit.  Kinahanglan magwali liwat ako didto, kay amo ini an tuyo han akon pagkanhi.” Sanglit nagsudoy hiya han bug-os nga Galilea, nagwali hiya ha mga sinagoga ngan nagpagawas hiya hin mga yawa.

An Ebanghelyo han Ginoo.