PAGBASA I     

1 Sam 4:1-11

Pagbasa tikang han Syahan nga Basahan ni Samuel.

Hito nga panahon nakig-away an mga Filisteohanon kontra han Israel. Ginawas hin pakig-away an mga Israelita ngan nagkampo hira didto ha Ebenezer ngan an mga Filisteohanon didto ha Apek. Sinulong an mga Filisteohanon, ngan katapos hin mapintas nga araway napirde nira an mga Israelita, ngan pinamatay nira in mga upat ka yukot ka tawo didto ha pag-awayan. Han pagbalik na han nahisalin nga mga sondalo ngadto ha kampo, nagsiring an mga pangulo han Israel, “Kay ano nga tinugot man an Ginoo nga madaog kita han mga Filisteohanon yana nga adlaw? Tana, kuhaa ta an Kahon han Ginsaaran han Ginoo didto ha Silo basi umopod hiya ha aton ngan talwason kita ha aton mga kaaway.”

Sanglit nagsugo hira hin mga surugoon ngadto ha Silo hin pagkuha han Kahon han Ginsaaran han Ginoo nga Labi Kamakagarahum nga nalingkod ha trono ha igbaw han mga kerubin. Ngan binunyog han Kahon han Ginsaaran hira Ofni ug Pinehas, an duha nga mga anak ni Eli. Han pag-abot na han Kahon han Ginsaaran, naggogliat an mga Israelita, nag-aningal an ira tingog nga nabay-og an tuna. Hinbatian han mga Filisteohanon an gogliat, ngan nagsiring hira, “Pamatii ta daw an dagko nga gogliat didto han kampo han mga Hebreo! Ano ba an karuyag sidngon hini?” Han paghibaro nira nga inabot ngay-an an Kahon han Ginsaaran han Ginoo didto han kampo han mga Hebreo, nagkahahadlok hira ngan nagsiring, “Inabot in usa nga diyos ngadto han ira kampo! Pirde na kita! Waray pa gud mahinabo ha aton in sugad hini! Hin-o in magtatalwas ha aton tikang hito nga gamhanan nga kadiyosan? Amo hira an kadiyosan nga nagpatay han mga Ehiptohanon didto ha kamingawan! Pagmaisog kamo, mga Filisteohanon! Pakig-away kamo ngan pagpakalalake, kay kon diri, maooripon kita han mga Hebreo sugad nga mga oripon man hira naton hadto. Sanglit pakig-away kamo ngan pagpakalalake kita hin kaisog.” Nakig-away hin maupay an mga Filisteohanon ngan ginpirde nira an mga Israelita nga nanadlagan hira tipaoli. Makalilisang adto nga pamatay; pinamatay in katloan kayukot (30,000) nga mga sondalo nga Israelita. Naagaw an Kahon han Ginsaaran han Ginoo, ngan pinamatay hira Ofni ug Pinehas nga mga anak ni Eli.

An Pulong han Ginoo.

SALMO RESPONSORIO

Sal 44:10-11, 14-15, 24-25

℟. Bawia kami, Ginoo, tungod han imo gugma.

1. Kundi yana iginsikway mo kami ngan imo iginpapirde;

diri ka na nabunyog han amon kasondalohan.

Ginpadalagan mo kami han amon mga kaaway,

ngan gintikasan kami nira.

℟. Bawia kami, Ginoo, tungod han imo gugma.

2. Hinkikit-an han amon mga amyaw

an ginbuhat mo ha amon,

ngan ginyuyubitan ug gintataw-an la nira kami.

Ginhimo mo kami nga suronlugon la dida han mga nasod;

usa nga pataraw-an han mga tawo.

℟. Bawia kami, Ginoo, tungod han imo gugma.

3. Pagmata, O Ginoo! Kay ano nga nakaturog ka?

Bangon! Ayaw kami igsikway hin dayon!

Kay ano nga natago ka ha amon?

Ayaw hingalimti an amon pag-antos ngan kasakitan!

℟. Bawia kami, Ginoo, tungod han imo gugma.

EBANGHELYO             

Lc 1:40-45

Pagbasa tikang han santos nga Ebanghelyo sumala kan Marcos.

Dinaop kan Jesus in usa nga sanlahon, linuhod ha iya atubangan, ngan nakimalooy nga buligan hiya.  “Kun imo karuyag,” nagsiring an sanlahon, “makakalinis ka ha akon.” Nalooy hi Jesus ha iya.  Gindun-an hiya ni Jesus ngan sidngon, “Karuyag ko. Magmalinis ka!”  Nakuha dayon an sanla ngan naupay an tawo.  Ginpa-uli hiya upod an hugot nga pagtugon ha iya, “Pamati, ayaw pagsumat bisan kan kanay.  Pakadto dayon ha padi ngan pakita ha iya; kahuman, paghalad sugad han sugo ni Moises basi hisab’tan nga upay ka na.” Linakat an tawo ngan iginpasarang ini nga hinabo ha ngatanan nga dapit.  Ha pagkamatuod damo an nahibaro; sanglit makuri na hi Jesus makasakob hin dayag ha bungto, lugod, didto hiya hin mamingaw nga dapit ngan an mga tawo na la tikang ha magkalain-lain nga dapit an napakadto ha iya.

An Ebanghelyo han Ginoo.