PAGBASA I     

1 Sam 8:4-7, 10-22a

Pagbasa tikang han Syahan nga Basahan ni Samuel.

Niyan nagtirok an ngatanan nga mga pangulo han Israel, kinadto hira kan Samuel didto ha Rama, ngan nagsiring ha iya, “Kitaa daw, tikalagas ka na ngan an imo mga anak diri nagsusunod han imo susbaranan. Sanglit pagtudlok hin usa nga hadi nga magpapangulo ha amon, basi magkamay-ada kami usa nga hadi sugad han iba nga mga nasod.” Nakabido kan Samuel an ira pangaro hin hadi; sanglit nag-ampo hiya han Ginoo, ngan nagsiring an Ginoo, “Pamatii an ngatanan nga pinangaro ha imo han mga tawo. Diri ikaw an ira ginsasalikway kundi hi ako. An ngatanan nga tugon ha iya han Ginoo iginsumat ni Samuel ngadto han mga tawo nga naaro ha iya hin hadi. Iginsaysay ni Samuel, “Amo ini an bubuhaton ha iyo han iyo hadi. Hihimoon niya nga mga sondalo an iyo mga anak nga kalalaken-an; may-ada ha ira magmamaneho han iya mga karuwahe; an iba hihimoon nga iya dikabayo nga mga sondalo, ngan an iba pa madalagan hin pag-una han iya mga karuwahe. Hihimoon niya an iba ha ira nga mga opisyal nga tinaporan hin tinag-usa kayukot (1,000) nga mga tawo, ngan an iba tinaporan hin tinag-kalim-an (50) nga mga tawo. Mag-aarado han iya mga uma an iyo mga anak nga kalalaken-an, mag-aani han iya mga aranihon, ngan manhihimo han iya mga hinganiban ngan kasangkapan han iya mga karuwahe. Maghihimo an iyo mga anak nga kababayen-an hin iya mga pahamot, ngan magbubuhat nga iya mga paraluto ngan mga parahudno. Kukuhaon niya an iyo gimamag-upayi nga mga uma, mga urubasan, ngan mga kaolibohan, ngan ighahatag ini niya ngadto han iya mga opisyal. Kukuhaon niya an ikanapulo nga bahin han iyo mga pagkaon ngan han iyo mga ubas para han iya mga opisyal han palasyo ngan iba pa nga mga opisyal. Kukuhaon niya an iyo mga surugoon, ngan an iyo gimamag-upayi nga kabakahan ngan kaasnohan, ngan magbubuhat ini hira para ha iya. Kukuhaon niya ha iyo an ikanapulo nga bahin han iyo mga panon, ngan mahihimo kamo ngahaw nga iya mga oripon. Kon umabot na ito nga panahon, mangurutob kamo tungod han iyo hadi nga kamo ngahaw an nagpili, kundi diri pamamatian han Ginoo an iyo mga sumbong.”

Waray la bumali kan Samuel an mga tawo, kundi nagsiring hira, “Diri! Karuyag gud namon in usa nga hadi, basi masugad kami han iba nga mga nasod, nga may-ada namon kalugaringon nga hadi nga mamumuno ha amon, ngan mangungulo ha amon ha pag-awayan.” Pinamatian ni Samuel an ngatanan nga ira iginsiring ngan linakat hiya ngan ginsumatan niya an Ginoo. Binaton an Ginoo, “Buhata an ira karuyag ngan tagi hira hin usa nga hadi.”

An Pulong han Ginoo.

SALMO RESPONSORIO

Sal 89:16-17, 18-19

℟. Diri ako mahunong pag-awit han pagkamaupay han Ginoo.

1. Hin pagkamalipayon han mga tawo,

nga nagkakaranta pagsingba ha imo;

adto hira nga aada pagpupuyo,

dida han kalamrag han pagkalooy mo!

Tungod ha imo hira nagmamalipayon,

ha bug-os gud nga takna han kaadlawon;

ngan ira ka pirme nga pagdadayawon,

tungod hadton imo pagkamaupayon.

℟. Diri ako mahunong pag-awit han pagkamaupay han Ginoo.

2. Kami amo an imo ginhahatagan,

hin dagko nimo nga mga pagdarag-an;

imo kami ginhihimo nga daogan,

dida hadton imo paghigugma gudman.

Ikaw, O Ginoo, amo an nagpili,

hin mananalipod tinagan mo kami;

an Baraan nga Dyos han Israel ngani,

amo an naghatag ha amon hin hadi.

℟. Diri ako mahunong pag-awit han pagkamaupay han Ginoo.

EBANGHELYO

Mc 2:1-12

Pagbasa tikang han santos nga Ebanghelyo sumala kan Marcos.

Paglabay hin pira ka adlaw, binalik hi Jesus ha Capernaum ngan nahibantog nga inoli na hiya.  Damo in mga tawo nga kinadto, sanglit napuno an balay, bisan pa ngani an bungsaran ha atubangan han portahan.  Han nagwawali hi Jesus ha ira, gindara ngada ha iya in usa nga lulid nga ginpasag hin upat ka tawo.  “Tungod han kadamo han mga tawo, waray hira makahirani kan Jesus.  Sanglit gin-ukban nira an atop nga tungod ni Jesus.  Ira gintuntun tikang ha atop an lulid nga nakada ha iya higdaan.  Nakasabot hi Jesus han ira dako nga pagtoo, ngan ginsiring niya an lulid, “Anak, ginpasaylo na an imo nga sala.” May-ada mga magturutdo han Balaud nga nagkakalingkod didto nga nagsiring ha ira ngahaw, “kay ano nga ginahum man hiya pagyakan hin sugad hini?  Usa ini nga pagpanamastamas han Dyos?  Waray tawo nga makakapasaylo hin sala; an Dyos la in makakahimo.”

Nakasabot dayon hi Jesus han ira mga ginhuhunahuna.  Sanglit nagsiring hira ha ira, “kay ano nga nakahunahuna man kamo hin sugad?  Hain in masarusayon: an pagsiring ngada hini nga lulid, ‘An imo sala ginpasaylo,’ kun an pagsiring, ‘Buhat, dad-a an imo higdaan ngan lakat?”  Ipapakita ko ha iyo nga may gahum dinhi ha tuna an Anak han Tawo hin pagpasaylo han mga sala.”  Sanglit ginsiring niya an lulid, “Nasiring ako ha imo, “buhat, dad-a an imo higdaan ngan uli ha iyo balay!”         Ha atubangan han mga tawo, binuhat an lulid, gindara an iya higdaan, ngan linakat dayon.  Nahipausa hira ngatanan, ngan nagdayaw hira han Dyos hin pagsiring, “Waray pa kami kumita hin sugad hini nga hinabo!”

An Ebanghelyo han Ginoo.