PAGBASA I     

1 Sam 9:1-4, 17-19; 10:1

Pagbasa tikang han Syahan nga Basahan ni Samuel.

May-ada hadto usa nga riko ngan harangdon gud nga tawo nga ginngaranan nga Cis ngan sakop han tribo ni Benjamin. Anak hiya ni Abiel ngan apo ni Zeror, ngan sakop han panimalay ni Becorat nga bahin han banay ni Afia. May-ada hiya anak nga ginngaranan nga Saul, gwapo ngan batan-on. Hiruhitaas hiya hin bisan hin-o nga tawo didto ha Israel ngan waray makakalabaw ha iya hin ka gwapo.

Nagsarang in mga asno ni Cis, sanglit nagsiring hiya kan Saul, “Paupda ha imo in usa han mga surugoon ngan pamilnga an mga asno.” Ginsudoy nira an sagkahon nga katunaan han Efraim ngan han katunaan han Salisa, kundi waray hira makaagi. Sanglit nagpadayon hira hin pagsudoy han katunaan han Saalim, kundi waray didto an mga asno. Niyan nagsudoy hira han katunaan ni Benjamin, kundi waray gihapon nira hiagii an mga asno.

Han paghikit-i ni Samuel kan Saul, nagsiring ha iya an Ginoo, “Amo ini an tawo nga akon iginsumat ha imo. Hiya an maghahadi han akon mga tawo.”

Niyan gindaop ni Saul hi Samuel nga nakada hirani han ganghaan, ngan nagpakiana hiya “Sumati daw ako, hain ba pag-uokoy an paratigo?” Binaton hi Samuel, “Amo ako an paratigo. Pag-una kamo ha akon ngadto han dapit hin pagsingba. Makikigsaro ako ha iyo yana nga adlaw. Buwas han aga babatonon ko an ngatanan niyo nga mga pakiana ngan palalakton ko kamo.

Niyan kinuha hi Samuel hin usa ka tibod nga lana hin olibo ngan iginbubo ini han ulo ni Saul, hinadkan hiya, ngan nagsiring, “Gindidihogan ka han Ginoo nga hadi han iya nasod Israel. Paghahadian mo an iya mga tawo ngan pananalipdan mo hira ha ngatanan nira nga mga kaaway. Ngan amo ini an tigaman nga ginpili ka han Ginoo nga hadi han iya mga tawo.

An Pulong han Ginoo.

SALMO RESPONSORIO

Sal 21:2-3, 4-5, 6-7

℟. Ginoo nakakalipay han hadi an imo kusog.

1. An hadi tugob hin kalipay, Ginoo,

kay hin kusog hin pakadaog tinagan mo.

Iginhatag mo an iya karuyagon,

ngan an iya panuyo imo ginbaton.

℟. Ginoo nakakalipay han hadi an imo kusog.

3. Nagdara ka hin damo nga kaupayan,

ginkoronahan mo hiya hin bulawan.

Hin kinabuhi imo hiya tinagan,

an kinabuhi nga waray katubtoban.

℟. Ginoo nakakalipay han hadi an imo kusog.

4. Tungod han imo bulig, hiya ginhimaya,

dungog ngan bantog tinagan mo hiya.

Kaupayan nga dayon upod ha iya,

nakapuno hin kalipay kay tampo ka.

℟. Ginoo nakakalipay han hadi an imo kusog.

EBANGHELYO

Mc 2:13-17

Pagbasa tikang han santos nga Ebanghelyo sumala kan Marcos.

Binalik hi Jesus ngadto ha baybayon han lanaw ha Galilea.  Dinaop in mga tawo ha iya ngan nagtikang hiya hin pagtutdo ha ira.  Samtang naglalakat hiya, nakita niya in usa nga parasukot hin buhis, hi Levi, nga anak ni Alfeo, nga nalingkod didto han iya buhatan.  Nagsiring hi Jesus ha iya, “Sunod ha akon.”  Binuhat hi Levi ngan sinunod kan Jesus.

Tinangka hi Jesus hin pagkaon didto han balay ni Levi.  Damo an mga parasukot hin buhis ngan mga tinamay nga nagsunud-sunod kan Jesus.  Damo ha ira in nakigsaro ha iya ngan han iya mga tinun-an.  Pinakiana hira han mga tinun-an ni Jesus, “Kay ano nga nakigsaro man hiya han mga parasukot hin buhis ngan han mga tinamay?” Nakabati hi Jesus ha ira ngan ginbaton hira niya.  “Diri nagkikinahanglan hin magtarambal an waray sakit nga tawo, kundi adton may-ada la sakit.  Waray ako makanhi hin pagtawag hadton mga magtadong, kundi hadton mga magpakasasala.”

An Ebanghelyo han Ginoo.