TUIG A

PAGBASA I     

Is 8:23—9:3

Pagbasa tikang han basahan ni Isaias nga manaragna.

Ginpakaalohan hadto anay an tuna han mga tribo han Zabulon ug Neftali, kundi pagpapasidunggan han tidaraon nga panahon ini nga katunaan, tikang ha Mediteraneo tipasinirangan ngadto han tuna didto han tabok han Jordan, ngan ngadto pa ha Galilea nga gin-uokyan han mga lumalangyaw.

Kinita hin dako nga kapawa an mga tawo nga naglalakat ha kasisidman. Adton nag-ukoy didto hin masirom nga tuna, yana sinirang na ha ira in kapawa. Tinagan mo hira hin dako nga kalipay, O Ginoo; ngan ginlipay mo hira. Narayhak hira tungod han imo ginbuhat, sugad han pagrayhak hin mga tawo kon nag-aani hira, o kon nagbabahinbahin hira han ira tinikas nga mga manggad. Kay ginbari mo an yugo nga nakapabug-at ha ira ngan an tungkod nga naghampak han ira mga sugbong. Ginpirde mo an nasod nga nagtalumpigos ngan nagpahimulos han imo mga tawo, sugad han pagdag-a mo han kasondalohan han Madian hadton maiha na nga panahon.

An Pulong han Ginoo.

SALMO RESPONSORIO

Sal 27:1, 4, 13-14

℟. An Ginoo an akon kapawa ug panabang.

1. An Dyos akon kapawa ug katalwasan,

sanglit waray sadang ko nga kahadlokan.

Sinasalipdan ako ha kataragman,

hin kakulba diri ako hisasakban.

℟. An Ginoo an akon kapawa ug panabang.

2. Usa nga butang an akon pinangangaro,

usa gud la an akon hinahangyo;

nga mag-ukoy ako ha balay han Ginoo,

ngatanan nga adlaw samtang buhi pa ako;

basi mamalandong ako han iya kaupayan,

ngan mangaro han iya kasalagdonan.

℟. An Ginoo an akon kapawa ug panabang.

3. Maaram ako nga hikikit-an ko pa,

an pagkamaupay han Ginoo yana;

Pagtapod ug paglaom han Ginoo,

ayaw pagturaw, lugod, ha iya tuo.

℟. An Ginoo an akon kapawa ug panabang.

PAGBASA II   

1 Cor 1:10-13, 17

Pagbasa tikang han Syahan Surat ni San Pablo ngadto han mga taga Corinto.

Nahangyo ako ha iyo, kabugtoan, pinaagi han pagburot-an han aton Ginoo Jesu-Cristo, nga magkauruyon kamo ngatanan dida han iyo mga iginyayakan, basi mawaray dida ha iyo pagkabahinbahin. Mahingpit unta an iyo pagkaurosa dida hin usa la nga panhunahuna ngan panuyo. Kay may mga tawo tikang han panimalay ni Cloe nga nagsumat ha akon, kabugtoan ko, nga may-ada niyo pagkaaway-away. Amo ini an akon buot sidngon: an tagsa ha iyo lain an iginyayakan. Nasiring an usa, “Kan Pablo ako”; an iba, “Kan Apolo ako”; an iba, “Kan Pedro ako”; ngan an iba pa, “Kan Cristo ako.” Nagkabahinbahin na ba hi Cristo? Hi Pablo ba an namatay ha kros para ha iyo? Ginbunyagan ba kamo nga mga tinun-an ni Pablo? Waray ako sugoa ni Cristo hin pagbunyag. Ginsugo ako niya hin pagwali han Maupay nga Sumat, ngan pagwali hito hin waray paggamit hin mga pulong nga makuri masabtan han mga tawo, basi diri kawad-an hin gahom an kamatayon ni Cristo ha kros.

An Pulong han Ginoo.

EBANGHELYO

Mt 4:12-23

[Mt4:12-17]

Pagbasa tikang han santos nga Ebanghelyo sumala kan Mateo.

[ Han pakabati ni Jesus nga napriso hi Juan, kinmadto hiya ha Galilea. Waray na hiya pag-ukoy ha Nazaret kundi ha Capernaum. Aada ini nga bungto ha ligid han Lanaw Galilea, ha katunaan han Zabulon ug Neftali. Nahinabo ini basi matuman an iginsurat ni Isaias nga manaragna nga nasiring: “Galilea han mga Hentil! An tuna ha Zabulon ngan an tuna ha Neftali, aragian tipakadto ha dagat, ha tabok han Jordan. An mga tawo nga nag-uukoy ha kasisidman makita hin dako nga kapawa. Ha ira nga nag-uokoy ha masirom nga tuna han kamatayon malamrag an kapawa!” Tikang hadto nagtikang hi Jesus hin pagwali, “Bayai niyo an iyo mga sala, kay hirani na an Ginhadian han langit!” ]

Samtang naglalakat hi Jesus ha baybayon han Lanaw han Galilea, hinkit-an niya in duha nga magbugto nga mangirisda, hi Simon nga tinatawag nga Pedro ngan an iya bugto nga hi Andres, nga nagtutunod han ira pukot didto han lanaw. Nagsiring hiya ha ira, “Upod kamo ha akon ngan tututdoan ko kamo pagdakop hin mga tawo.” Ira binayaan dayon an ira mga pukot ngan binmunyog hira ha iya. Nagtipaunhan hiya ngan hinkit-an niya in duha pa nga magbugto, hira Santiago ug Juan nga mga anak ni Sebedeo. Nakadto hira han ira sakayan upod an amay nira nga hi Sebedeo, nag-aandam han ira mga pukot. Gintawag hira ni Jesus. Dida dayon binayaan nira an sakayan ngan an ira amay, ngan binmunyog hira kan Jesus. Nagsudoy hi Jesus ha bug-os nga Galilea ngan nagtutdo hiya didto han ira mga sinagoga, nagwali han Maupay nga Sumat han Ginhadian, ngan nagtambal han magkalainlain nga mga sakit ngan mga balatian han mga tawo.

An Ebanghelyo han Ginoo.