PAGBASA I     

2 Sam 5:1-7, 10

Pagbasa tikang han Ikaduha nga Basahan ni Samuel.

Ngan kinadto kan David didto ha Hebron an ngatanan nga mga tribo han Israel ngan nagsiring ha iya, “Imo kami kalugaringon ha unod ug dugo. Han naglabay nga panahon, bisan han hadi pa namon hi Saul, nangulo ka na han mga tawo han Israel, didto ha pag-awayan, ngan nagsaad ha imo an Ginoo nga ikaw an magdudumara han iya mga tawo ngan magigin pangulo ka nira.” Sanglit kinadto kan David didto ha Hebron an ngatanan nga mga pangulo han Israel. Nagsumpa hi David hin pakig-urosa ha ira, gindihogan hiya nira, ngan nahimo hiya nga hadi han Israel. Hi David katloan (30) na an panuigon han kahimo niya nga hadi, ngan naghadi hiya hin kap-atan (40) ka tuig. Naghadi hiya han Juda didto ha Hebron sulod hin pito ka tuig hin tunga, ngan han bug-os nga Israel ug Juda didto ha Jerusalem sulod hin katloan kagtulo (33) ka tuig.

Inabot an panahon nga ginsulong ni Hadi David ngan han iya mga tawo an Jerusalem. Naghunahuna an mga Jebuseohanon nga nag-ukoy didto nga diri makakabihag han syudad hi David sanglit nagsiring hira ha iya, “Diri ka gud makakasulod ngadi; makakapugong ha imo bisan an mga buta ngan an mga lulid la.” (Kundi nabihag ni David an ira madig-on nga kota han Sion, ngan ginkilala ini nga “Syudad ni David.”)

Nagtikakusog la hi David, kay nakada ha iya an Ginoo nga Dyos nga Labi Kamakagarahum.

An Pulong han Ginoo.

SALMO RESPONSORIO

Sal 89:20, 21-22, 25-26

℟. Maupod ha iya an akon kamatuoran ug paghigugma.

1. Siring mo ha dugay na nga panan-awon,

ha matinumanon mo nga surugoon,

“Usa ka tawo an akon ginbuligan,

usa hiya nga sondalo nga bantogan.

Han trono amo h’ya an akon gintagan,

akon ginpili h’ya tikang han katawhan.”

℟. Maupod ha iya an akon kamatuoran ug paghigugma.

2. Akon surugoon David ginpili ko,

ngan h’ya an ginhimo ko nga hadi niyo.

Akon kusog pirme mag-upod ha iya,

akon gahom magin kusog pa gud niya.

℟. Maupod ha iya an akon kamatuoran ug paghigugma.

3. Ha iya ak’ mahigugma ngan maunong,

akon hiya dayuday pagpapadag-on.

Ak’ paaabotan iya ginhadian,

tikang ha Eufrates nga’t han kadagatan.

℟. Maupod ha iya an akon kamatuoran ug paghigugma.

EBANGHELYO            

Mc 3:22-30

Pagbasa tikang han santos nga Ebanghelyo sumala kan Marcos.

May-ada mga magturutdo han Balaod nga tikang ha Jerusalem nga nagsiring: “Hinkakaptan hiya ni Beelsebul!” Nagsiring an iba, “Naghatag ha iya hin gahom an puno hin mga yawa hin pagpagawas ha ira.” Sanglit gintawag ni Jesus an mga tawo ngan nagsumat hiya hin mga pananglitan: “Uunanhon man ni Satanas hin pagpaiwas ha iya ngahaw? Kon magkabahinbahin in usa nga nasod ngan mag-aruaraway hira, mapupukan ito nga nasod. Kon makabahinbahin in usa nga panimalay ngan mag-aruaraway hira, mabubungkag ito nga panimalay. Sanglit kon magkabahinbahin an ginhadian ni Satanas, diri ito mag-iiha, kundi mabubungkag ngan mapupukan. “Waray makakasulod hin balay hin kusgan nga tawo hin pangawat, kon diri anay niya gaposon an kusgan nga tawo. Kon magapos na niya, amo na an pakapangawat niya. “Tigamni ini niyo: Mapapasaylo an mga tawo han ira mga sala ngan han magraot nga ira mga ginyakan. Kundi diri mapapasaylo an tawo nga magpasipara hin pagyakan supak han Espiritu Santo.” (Ginyakan ini ni Jesus kay may-ada nasiring nga may-ada hiya maraot nga espiritu.)

An Ebanghelyo han Ginoo.

____________________

Pagdumdum kanda San Timoteo ug Santo Tito

PAGBASA I     

2 Tim 1:1-8

Pagbasa tikang han Ikaduha nga Surat ni San Pablo ngadto kan Timoteo.

Tikang kan Pablo nga apostol ni Cristo Jesus tungod han pagbuot han Dyos, nga ginsugo pagpasangyaw han iginsaad nga kinabuhi, nga aton naangkon pinaagi hini pakig-usa kan Cristo Jesus—Ngadto kan Timoteo, an akon hinigugma nga anak: Ihatag unta ha imo han Dyos nga Amay ngan ni Cristo Jesus nga aton Ginoo an grasya, kalooy, ngan kamurayaw.

Nagpapasalamat ako han Dyos nga akon gin-aalagad hin malinis nga konsensya, sugad han ginbuhat han akon mga kaapoy-apoyan. Nagpapasalamat ako ha iya samtang dayuday nagdumdom ako ha imo dida ha akon mga pag-ampo, adlaw-gab-i. Nahinunumdom ako han imo mga luha, ngan karuyag ko gud makigkita ha imo, basi magmalipayon ako. Nahinunumdom ako han imo kinasingkasing nga pagtoo, an pagtoo nga naangkon liwat ni Loida nga imo apoy, ngan ni Eunice nga iroy mo. Waray ruhaduha nga naangkon liwat ini nimo.

Tungod hini, ginpapahinumdom ko ikaw nga buhion mo an upa nga iginhatag han Dyos ha imo, han pagdun-an ko han akon mga kamot ha imo. Kay an Espiritu nga iginhatag ha aton han Dyos diri espiritu hin kaawod; lugod, Espiritu hin gahom, gugma, ngan pagpugong han kalugaringon. Sanglit ayaw kaawod hin pagsaksi para han aton Ginoo ug para ha akon nga usa nga binilanggo para kan Cristo. Pakig-angbit lugod han pag-antos para han Maupay nga Sumat, sumala han kusog nga ihinatag han Dyos ha imo.

An Pulong han Ginoo.

Kon di’ man, ini:

Tit 1:1-5

Pagbasa tikang han Surat ni San Pablo ngadto kan Tito.

Tikang kan Pablo, surugoon han Dyos ngan apostol ni Jesu-Cristo. Ginpili ngan ginpadara ako hin pagparig-on han pagtoo han mga tawo nga pinili han Dyos ngan pagdara ha ira ngadto han kamatuoran nga gintutdo han aton tuloohan, nga pinapasikad dida han paglaom han dayon nga kinabuhi. An Dyos nga diri nagbubuwa nagsaad ha aton hini nga kinabuhi tikang pa ha tinikangan. Ha igo nga panahon iginpadayag niya dida han iya mensahe nga igintapod ha akon, ngan iginpasangyaw ko tungod han sugo han Dyos nga aton Magtaralwas. Nagsusurat ako kan Tito, an akon matuod nga anak ha pagtoo nga aton ginkakaangbitan. Tagan ka unta han Dyos nga Amay ngan han aton Magtaralwas nga hi Cristo Jesus han grasya ngan kamurayaw.

Iginbilin ko ikaw ha Creta pagtuhay han mga butang nga kinahanglan pa buhaton, ngan pagtudlok hin mga katigurangan han singbahan ha kada bungto. Hinumdomi an akon mga tugon.

An Pulong han Ginoo. 

SALMO RESPONSORIO

Sal 96:1-2a, 2b-3, 7-8a, 9-10a

℟. Igpasangyaw an iya mga orosahon nga buhat ha mga kanasuran.

1. Kanta ha Ginoo hin bag-o nga kanta!

Kanta ha Ginoo, an bug-os nga tuna!

Kanta ha Ginoo, pagdayawa hiya!

℟. Igpasangyaw an iya mga orosahon nga buhat ha mga kanasuran.

2. Kada adlaw sumat katalwasan niya.

Ha kanasoran iyo igpakilala

iya pagkaharangdon, iya himaya,

ngan an mga gamhanan nga buhat niya

ha ngatanan nga katawhan han tuna.

℟. Igpasangyaw an iya mga orosahon nga buhat ha mga kanasuran.

3. Dayawa'n Ginoo, katawhan ha tuna,

dayawa an iya gahom ug himaya.

Dayawa'n mahimayaon ngaran niya.

℟. Igpasangyaw an iya mga orosahon nga buhat ha mga kanasuran.

4. Yukbo kamo ha iya gud atubangan,

kon pumakita an Labi Kabaraan;

panngurog ha iya kamo gud ngatanan,

ngatanan nga katawhan ha kalibutan.

Sidnga'n kanasoran, “Ginoo hadi na!

℟. Igpasangyaw an iya mga orosahon nga buhat ha mga kanasuran.

EBANGHELYO            

Lc 10:1-9

Pagbasa tikang han santos nga Ebanghelyo sumala kan Lucas.

Katapos hini nagpili an Ginoo hin iba nga kapitoan kagduha (72) nga kalalaken-an ngan ginsugo hira, padis padis, hin pag-una ha iya ngadto ha tagsa nga bungto ug dapit nga iya ngahaw kakadtoan. Nagsiring hiya ha ira, “Damo an aranihon, kundi gutiay la an mga mag-arani. Sanglit pag-ampo kamo han tag-iya han aranihon nga magpadara hiya hin mga mag-arani ngadto han iya aranihon. Kadto na! Ginsusugo ta kamo sugad hin mga karnero ha butnga hin mga lubo. Ayaw kamo pagdara hin supot o surudlan hin limos o sandalyas; ayaw kamo pakigbali bisan kan kanay dida ha dalan. Pagsulod niyo hin balay, siring anay, ‘An kalinaw maada hini nga balay.’ Kon naukoy didto in tawo nga murayaw an kinabuhi, ibilin ha iya an iyo ginpamulong nga kamurayaw; kon diri, bakwia an iyo ginpamulong nga kamurayaw. Pabilin dida hito ngahaw nga balay; kaon ngan inom han ira idudurot ha iyo, kay an magburudlay takos han iya suhol. Ayaw kamo pagbinurobalhin hin urokyan. Kon makadto kamo hin bungto ngan karawton kamo, kaon han igdudurot ha iyo, tambala niyo an mga magsakit didto hito nga bungto, ngan sidnga an mga tawo, ‘Haraniay na ha iyo an Ginhadian han Dyos.’

An Ebanghelyo han Ginoo.