PAGBASA I     

2 Sam 6:12b-15, 17-19

Pagbasa tikang han Ikaduha nga Basahan ni Samuel.

Kinuha ni David an Kahon han Ginsaaran tikang han balay ni Obed Edom basi dad-on ini ngadto ha Jerusalem pinaagi hin maribhong nga pagsaurog. Pakalakat la hin unom ka pitad han mga tawo nga nagpapasag han Kahon han Ginsaaran, ginpaukoy hira ni David samtang naghalad hiya han Ginoo hin tinubod nga todo nga baka ngan hin pinatambok nga nati nga baka. Nagsinayaw hi David, tugob hin kalipay, ha pagpasidungog han Ginoo, nga nakakatapis la hiya hin dugnit nga lino. Sanglit gindara niya ngan han ngatanan nga mga Israelita an Kahon han Ginsaaran ngadto ha Jerusalem inupdan hin rugyaw ngan tunog hin mga trompeta. Gindara nira an Kahon ngan iginbutang ini dida han dapit nga burutangan hini ha sakob han Ginoo han Tulda nga gintindog ni David. Katapos naghalad hi David hin mga halad nga tinubod ngan hin mga halad hin pagdait. Han kahuman niya paghalad, ginbendisyonan niya an mga tawo ha ngaran han Ginoo nga Labi Kamakagarahum, ngan tinagan hira ngatanan hin pagkaon. Tinagan niya an kada lalake ug babaye didto ha Israel, hin tag-usa ka bug-os nga tinapay, usa ka gurot nga sinugba nga karne, ngan mga pasas. Katapos nangoli an ngatanan.

An Pulong han Ginoo.

SALMO RESPONSORIO

Sal 24:7, 8, 9, 10

℟. Hin-o an hadi han himaya? Hiya, an Ginoo, amo an hadi han himaya.

1. Buksi hin maupay an mga ganghaan,

abrehi an mga daan nga portahan;

kay amo ini an iya pag-aagian,

han kusgan nga hadi han kahimayaan.

℟. Hin-o an hadi han himaya? Hiya, an Ginoo, amo an hadi han himaya.

2. Hin-o ini nga hadi han kahimayaan?

An Ginoo nga makusog ngan gamhanan;

an Ginoo nga dara an pagdarag-an,

pag-uli niya tikang ha pag-awayan.

℟. Hin-o an hadi han himaya? Hiya, an Ginoo, amo an hadi han himaya.

3. Buksi hin maupay an mga ganghaan,

abrehi an mga daan nga portahan;

kay masulod na an hadi nga bantogan,

nga amo an hadi han kahimayaan.

℟. Hin-o an hadi han himaya? Hiya, an Ginoo, amo an hadi han himaya.

4. Hin-o ini nga hadi han kahimayaan?

An Ginoo hiya han kasondalohan;

an Ginoo nga dara an pagdarag-an,

hiya an hadi han kahimayaan!

℟. Hin-o an hadi han himaya? Hiya, an Ginoo, amo an hadi han himaya.

ebanghelyo             

Mc 3:31-35

Pagbasa tikang han santos nga Ebanghelyo sumala kan Marcos.

Inabot an iroy ni Jesus ngan an iya kabugtoan. Waray hira sumakob han balay, kundi nagpatugon la hira nga may-ada tuyo nira ha iya. Nabubutnga hi Jesus hin mga nagkakalingkod nga mga tawo, ngan nagsiring hira ha iya, “Aadto ha gawas an iroy ngan kabugtoan mo, may-ada tuyo ha imo.” Binaton hi Jesus, “Hin-o an akon iroy? Hin-o an akon kabugtoan?” Siniplat hiya han mga nagkakalingkod nga mga tawo nga naglilibot ha iya ngan nagsiring, “Amo ini an akon iroy ngan an akon kabugtoan. Akon kabugtoan ngan akon iroy an bisan hin-o nga nagtutuman han iginpapabuhat ha iya han Dyos.”

An Ebanghelyo han Ginoo.