PAGBASA I     

2 Sam 7:4-17

Pagbasa tikang han Ikaduha nga Basahan ni Samuel.

Kundi hito nga gab-i nagsiring an Ginoo kan Natan, “Kadtoa ngan sumati hi David, an akon surugoon, nga nasiring ako ha iya, ‘Diri ikaw an magtitindog hin templo nga akon uokyan. Tikang han paggawara ko han mga tawo han Israel ha Ehipto ngada yana, waray pa gud ako mag-ukoy hin templo. Dida han paglakaton ha kamingawan, nagbarobalhin ako pag-ukoy dida hin tulda. Ha ngatanan nga akon paglakaton upod han mga tawo han Israel waray ako pakiana han mga pangulo nga akon gintudlok kay ano nga waray ako nira ighimo hin templo nga sidro.’

“Sanglit sumati hi David nga akon surugoon nga nasiring ha iya hi ako nga Ginoo nga Labi Kamakagarahum, ‘Ginkuha ko ikaw hin ka paramangno hin mga karnero didto han kaumhan ngan ginhimo ko ikaw nga pangulo han akon mga tawo nga Israel. Dayuday kaupod ako nimo bisan diin ka kadto, ngan ginpirde ko an ngatanan mo nga mga kaaway samtang nasulong ka ha ira. Hihimoon ko ikaw nga sugad ka bantogan han labi kagamhanan nga mga pangulo dinhe ha kalibutan. Nagpili ako hin dapit para han akon mga tawo nga Israelita ngan akon hira iginpahimutang didto, diin mag-uokoy hira hin waray na magtatalumpigos ha ira. Tikang han pagsulod nira hini nga tuna, ginsulong hira hin mag-isog nga mga tawo, kundi diri na ini mahinanabo ha ira. Nagsasaad ako hin pagtalwas ha imo tikang han ngatanan mo nga mga kaaway ngan paghatag ha imo hin mga tulin. Kon mamatay ka na ngan iglubong tampo han imo mga ginikanan, hihimoon ko nga hadi in usa han imo mga anak ngan padidig-onon ko an iya ginhadian. Hiya amo an magtitindog hin templo para ha akon, ngan tatalinguhaon ko nga maghadi an iya katulinan ha kadayonan. Magigin amay ako niya ngan magigin anak ko hiya. Kon makasayop hiya, kakastigohon ko hiya sugad hin pagkastigo han iya anak hin usa nga amay. Kundi diri ko kukuhaon ha iya an akon tambulig, sugad han akon ginbuhat kan Saul nga akon ginkuha basi mahimo ka nga hadi. Dayuday magkakamay-ada mga tulin ngan magpapadayon an imo ginhadian. Diri gud matatapos an paghadi han imo katulinan.’” Iginsumat ni Natan kan David an ngatanan nga iginpadayag ha iya han Dyos.

An Pulong han Ginoo.

SALMO RESPONSORIO

Sal 89:4-5, 27-28, 29-30

℟. Dayuday pagtitipigan ko an akon gugma ha akon surugoon.

1. “Naghimo ak’ hin ginsaaran,

kaupod han tawo nga ak’ ginpili man;

ngan may-ada tawo nga ak’ ginsaaran,

nga ak’ surugoon nga David an ngaran.

Usa hadton imo mga katulinan,

an pirme maghahadi ha kadayonan;

ngan padayon ko gud nga pananalipdan,

an imo panimalay hin kahadian.”

℟. Dayuday pagtitipigan ko an akon gugma ha akon surugoon.

2. ‘Ikaw akon amay,’ sidngon ako niya,

‘Akon Dyos, panalipod, magtaralwas pa.’

Suhag nga ak’ anak h’ya ak’ hihimoon,

tanan kahadian hiya’n palalabwon.

℟. Dayuday pagtitipigan ko an akon gugma ha akon surugoon.

3. Saad ko ha iya pirme tutumanon,

Ak’ ginsaaran ha iya magpadayon.

Panimalay niya kanan kahadian,

magdadayon sugad hadton kalangitan;

dida hadton iya mga katulinan,

pirme may’da usa nga maghahadi man.

℟. Dayuday pagtitipigan ko an akon gugma ha akon surugoon.

ebanghelyo             

Mc 4:1-20

Pagbasa tikang han santos nga Ebanghelyo sumala kan Marcos.

Nagtikang liwat hi Jesus hin pagtutdo didto ha tabi han Lanaw han Galilea. Damo kaupay an mga tawo nga nag-alirong ha iya; sanglit sinakay hiya hin sakayan ngan liningkod hiya. Nakadto ha dagat an sakayan ngan nagkakatukdaw an mga tawo didto ha tabi. Damo an igintutdo niya pinaagi hin mga pananglitan. Dida han iya pagtutdo nagsiring hiya ha ira: “Pamati kamo! May-ada tawo nga kinadto han iya uma hin pagsabod. Han nagsasabod hiya, may mga binhe nga nagkataktak ha dalan ngan pinanuktok han mga tamsi. May-ada nahulog ngada hin batoon nga tuna. Tinurok gad an binhe kay may-ada man manipis nga tuna. Kundi han pagsirak han adlaw, nalaya an mga tanom kay waray makagamot hin maupay, ngan nagkauuga. May mga binhe nga nahulog ha mga tunokon nga kabanwaan. Han pagtubo han kabanwaan, naambongan an mga tanom; sanglit waray mamunga. Kundi may mga binhe nga nahulog ha maupay nga tuna. Tinurok an binhe, tinubo ngan namunga: may-ada namunga hin katloan (30) ka pilo, kaunoman (60) ka pilo an iba, ngan usa kagatos (100) ka pilo an iba liwat.” Ngan nagsiring hi Jesus, “Kon hin-o ha iyo an may durunggan, mamati hin maupay!”

Han nag-uusaan na la hi Jesus, dinaop ha iya adton iba nga nakabati ha iya upod an dose nga mga tinun-an, ngan naghangyo nga igsaysay niya an mga pananglitan. Binaton hi Jesus, “Iginhatag ha iyo an pakasabot han mga natatago nga butang han Ginhadian han Dyos; kundi nakakasabot la adton diri kausa niyo pinaagi hin mga pananglitan, basi ‘Ha ira paniguro hin pagkita, diri lugod hira nakakakita, ha ira paniguro hin pamati, diri lugod hira makakasabot; kay kon makahimo hira, bangin hira bumalik sa Dyos ngan pasasayloon hira niya.’” Ngan nagpakiana hi Jesus ha ira, “Diri ba kamo nakakasabot hini nga pananglitan? Uunanhon man ngay-an niyo hin pakasabot hin bisan ano nga pananglitan? An magsarabod nagsabod han mensahe han Dyos. May-ada mga tawo nga sugad han mga binhe nga nahulog ha dalan. Pakakabati nira han mensahe, naabot dayon hi Satanas ngan inaagaw an mensahe ha ira. An iba nga mga tawo sugad hin mga binhe nga nataktak ha batoon nga tuna. Pakakabati nira han mensahe, kinakarawat dayon nira nga malipayon. Kundi diri gud napabilin ha ira kasingkasing, ngan diri nag-iiha. Sanglit kon naabot in kakurian ngan pag-antos tungod han mensahe, nabaya hira dayon. An iba nga mga tawo sugad hin mga binhe nga ginsabod dida hin tunokon nga kabanwaan. Nakakabati ini hira han mensahe, kundi natatabonan an mensahe han mga kabaraka hiunong hin nga kinabuhi, an paghigugma han manggad, ngan an iba nga mga karuyagon, sanglit diri nakakabunga. Kundi an iba nga mga tawo sugad hin mga binhe nga ginsabod ha maupay nga tuna. Namamati hira han pulong, ira kinakarawat ngan namumunga. May-ada nabunga hin katloan (30) ka pilo, an iba kaunoman (60) ka pilo, ngan an iba na man, usa kagatos (100) ka pilo.”

An Ebanghelyo han Ginoo.