PAGBASA I     

2 Sam 7:18-19, 24-29

Pagbasa tikang han Ikaduha nga Basahan ni Samuel.

Sinulod hi David han Tulda han Ginoo, liningkod, ngan nag-ampo hiya, “Diri ako takus, bisan ngani an akon panimalay han imo na ginbuhat ha akon, O Ginoo nga Dyos. Kundi ginbubuhat pa nimo in labaw pa gud, O Ginoo nga Dyos; nagsaad ka mahitungod han akon katulinan ha tiarabot nga katuigan. Ngan iginpakita mo ha akon an tiarabot ko nga mga katulinan, O Ginoo nga Dyos!

Ginhimo mo nga imo kalugaringon nga nasod an Israel ha kadayonan, ngan ikaw, O Ginoo, nahimo nga ira Dyos. “Ngan yana, O Ginoo nga Dyos, tumana ha ngatanan nga panahon an iginsaad mo mahitungod ha akon ngan han akon katulinan, ngan tumana an imo iginsiring nga imo bubuhaton. Mababantogan ka hin duro, ngan masiring ha kadayonan an mga tawo, ‘An Ginoo nga Labi Kamakagarahum amo an Dyos han Israel.’ Ngan imo ipapadayon ha ngatanan nga panahon an akon katulinan. O Ginoo nga Labi Kamakagarahum nga Dyos han Israel! Nakadasig ini ha akon hin pag-ampo ha imo, kay iginpadayag mo ini ngatanan ha akon nga imo surugoon, ngan iginsumat mo ha akon nga imo hihimoon nga kahadian an akon katulinan. “Ngan yana, O Ginoo nga Dyos, ikaw amo an Dyos; dayuday nagtutuman ka han imo mga saad, ngan imo ginhimo ha akon ini nga makaaramdok nga saad. Nahangyo ako ha imo nga bendisyonan mo an akon katulinan basi magpadayon hira pagpahimulos han imo kamaloloy-on ngan kamaupay. Ikaw, O Ginoo nga Dyos an nagsaad hini, ngan magpabilin unta ha kadayonan an imo bendisyon dida han akon katulinan.”

An Pulong han Ginoo.

SALMO RESPONSORIO

Sal 132:1-2, 3-5, 11, 12, 13-14

℟. Ihahatag han Dyos ha iya an linkuranan han iya amay, hi David.

1. 1Ayaw hingalimti hi David, Ginoo,

sugad man han magkuri iya nahimo.

An pagsumpa niya ha Ginoo hadto

ha Gamhanan nga Dyos ni Israel, kuno:

℟. Ihahatag han Dyos ha iya an linkuranan han iya amay, hi David.

2. “Diri ak’ mauli ha akon higdaan,

diri ko pahuwayan o katurogan.

Tubtob an Ginoo hin dapit katagan,

balay han kan Israel Dyos nga Gamhanan.”

℟. Ihahatag han Dyos ha iya an linkuranan han iya amay, hi David.

3. Ginhimo kan David saad nga sagrado,

ngan diri na nimo babawion ito:

“Usa han im' anak pahahadion ko,

maghahadi hiya sunod gud ha imo.

℟. Ihahatag han Dyos ha iya an linkuranan han iya amay, hi David.

4. Kon an imo mga anak magtuman la

han ak’ ginsaaran ngan sugo ha ira;

mga anak liwat nira masunod pa

ha imo ngan maghahadi tanan takna.”

℟. Ihahatag han Dyos ha iya an linkuranan han iya amay, hi David.

5. An Sion man an ginpili han Ginoo,

karuyag gud niya an pag-ukoy didto:

“Amo ini an dayon nga urokyan ko,

Dinhe’n karuyag ko nga maghadi ako.

℟. Ihahatag han Dyos ha iya an linkuranan han iya amay, hi David.

ebanghelyo             

Mc 4:21-25

Pagbasa tikang han santos nga Ebanghelyo sumala kan Marcos.

Nagpadayon hi Jesus, “Kon may-ada nagdadara hin suga, tinatakloban ba niya ini, o ibinubutang ba ha sirong hin higdaan? Diri ba ikinakadto ha iya burutangan? Ipadadayag an natatago; bubuksan an natatahoban. Kon hin-o an may mga durunggan, mamati hin maupay!”

Nagsiring pa hiya ha ira, “Tigamni an iyo hinbabatian. An amo ngahaw nga mga lagda nga ginagamit niyo hin paghukom han iba, amo man an gagamiton han Dyos hin paghukom ha iyo, ngan bangin labaw pa hin kamakuri. Tatagan pa adton may-ada na; kukuhaan adton waray, bisan han gutiay nga aada ha iya.”

An Ebanghelyo han Ginoo.