PAGBASA I     

2 Sam 11:1-4a, 5-10a, 13-17

Pagbasa tikang han Ikaduha nga Basahan ni Samuel.

Han tikahirani na an kathuraw, ha panahon han tuig nga nahiaaraan han mga hadi hin pakig-away, ginsugo ni David hi Joab, upod an iya mga opisyal ngan an Israelita nga kasondalohan; ginpirde nira an mga Amonitanhon ngan ira ginpalibotan an syudad han Raba. Kundi nagpabilin hi David didto ha Jerusalem. Usa ka kulopay, binuhat hi David ha iya pagpahuway ngan sinaka ngadto han atop han palasyo. Han naglalakatlakat hiya didto, hinkit-an niya in babaye nga nakarigo didto han iya balay. Mahusay hiya hin duro. Sanglit nagsugo hi David hin pagpanginano kon hin-o hiya, ngan hinbaroan nga hi Batseba hiya nga anak ni Eliam ngan asawa ni Urias nga Hiteohanon. Iginpakuha hiya ni David; gindara hiya ngan nakighilawas ha iya hi David. Katapos inoli hiya. Waray kaiha nakasabot hiya nga burod na hiya ngan ginsumatan niya hi David.

Ginpatugonan ni David hi Joab, “Pakadia ha akon hi Urias nga Hiteohanon.” Sanglit gindara ni Joab hi Urias ngadto kan David. Han pag-abot ni Urias, ginpakianhan hiya ni David han kahimtang ni Joab ngan han mga sondalo, ngan kon ano na an araway. Katapos nagsiring hiya kan Urias, “Uli na ngan pahuway anay.” Linakat hi Urias ngan ginpalanatan hiya hin regalo ni David. Kundi waray umuli hi Urias; kinaturog la lugod hiya didto han ganghaan han palasyo tampo han mga gwardya han hadi. Nahibaro hi David nga waray umuli hi Urias. Gindapit hiya hin panihapon ni David ngan ginhubog hiya. Kundi waray gihapon umuli hi Urias hito nga gab-i, kinaturog lugod hiya nagkurumpat han iya taklap didto han kwarto han mga gwardya.

Han pagkaaga nagsurat hi David kan Joab ngan iginpadara ini kan Urias. Iginsurat niya: “Ikadto ha atubangan hi Urias diin makusog hin duro an araway; ngan isol ikaw ngan pabay-i hiya nga mamatay.” Sanglit han ginlilibotan ni Joab an syudad, ikinadto niya hi Urias hin dapit nga iya hinsabtan nga makusog an kaaway. Nagkagawas han syudad an kaaway nga kasondalohan, ngan pinakiawayan an kasondalohan ni Joab; may nagkamatay han mga opisyal ni David ngan namatay liwat hi Urias.

An Pulong han Ginoo.

SALMO RESPONSORIO

Sal 51:3-4, 5-6a, 6bcd-7, 10-11

℟. Kalooye kami, Ginoo kay nakasala kami.

1. Kalooyi gad ako, O Dyos,

tungod han imo dayuday nga paghigugma.

Tungod han imo dako nga pagkalooy paraa an akon mga sala!

Hugasi an ngatanan ko nga karat-an

ngan linisi ako han akon sala!

℟. Kalooye kami, Ginoo kay nakasala kami.

2. Hinbabaroan ko an akon mga pagtalapas;

hinsasabtan ko permi an akon mga sala.

Nakasala ako ha imo—ha imo gudla,

ngan ginbuhat ko an maraot ha imo atubangan.

℟. Kalooye kami, Ginoo kay nakasala kami.

3. Sanglit matadong an imo paghukom ha akon;

ngan waray sayop an imo paghatag hin sirot.

Maraot ako tikang pa han akon katawo;

makasasala ako nga daan

tikang pa han iginbuburod pa la ako.

℟. Kalooye kami, Ginoo kay nakasala kami.

4. Pabatia ako han mga tingog hin kalipay ngan pagrayhak;

ngan bisan kon gindugmok mo ako

magmamalipayon ako gihapon.

Piyonga an imo mga mata ha akon mga sala

ngan paraa an ngatanan ko nga karat-an.

℟. Kalooye kami, Ginoo kay nakasala kami.

ebanghelyo             

Mc 4:26-34

Pagbasa tikang han santos nga Ebanghelyo sumala kan Marcos.

Nagpadayon hi Jesus hin pagsiring: “Alid-agid an Ginhadian han Dyos hin tawo nga nagsabod hin binhe ha iya uma. Kahuman niya pagsabod han binhe, nagpapadayon hiya han iya ikina-adlaw nga mga buruhaton, samtang naturok ngan natubo an binhe. Kundi diri hiya maaram kon ano an kasugad hini. An tuna ngahaw an nakakapatubo ngan nakakapabunga: syahan, nananahon; niyan, namumukad; kahuman, namumunga. Kon hinog na an bunga, gin-aani han tag-iya, kay inabot na an takna hin panguha. “Ano ba an aton ikatatanding han Ginhadian han Dyos?” nagpakiana hi Jesus. “Ano nga pananglitan an sadang naton gamiton hin pagsaysay hini? Amo ini nga pananglitan: Usa ka tawo nagtanom ha tuna hin liso hin mustasa, an gigugutiayi nga liso dinhe ha tuna. Natubo ini ngan nahihimo nga gidadakoi nga kahoy. Narampag an iya mga sanga ngan nahapon an katamsihan ngan dito nagsasalag.” Nagwali hi Jesus ha mga tawo pinaagi hin alid-agid hini nga mga pananglitan. Ginsumatan niya hira sugad han ira hinsasabotan. Waray gud hiya magyakan ha ira kon diri pinaagi hin mga pananglitan; kundi kon an iya mga tinun-an la an iya kahimangraw, iya iginsasaysay an ngatanan ha ira.

An Ebanghelyo han Ginoo.