PAGBASA I     

2 Sam 12:1-7a, 10-17

Pagbasa tikang han Ikaduha nga Basahan ni Samuel.

Ginpakadto han Ginoo kan David hi Natan, an manaragna. Nagsiring hi Natan kan David, “May duha ka tawo nga nag-ukoy didto hin usa nga bungto; riko an usa ngan pobre an ikaduha. Damo an mga baka ngan mga karnero han riko, samtang an pobre may usa la nga nati nga karnero nga iya pinalit. Ginmangnoan han pobre ini nga karnero, ngan tinubo ini didto han iya balay tampo han iya mga anak. Gintubongan niya ini han kalugaringon niya nga pagkaon, ginpainom tikang han iya irimnon, ngan ginpalingkod ini dida ha iya paa. Sugad la hin anak niya nga babaye an nati nga karnero. Usa ka adlaw inabot in usa nga bisita didto han balay han riko. Waray an riko maruyag pag-ihaw hin usa han iya mga hayop basi ipakaon han iya bisita; asay lugod niya kinuha an kanan pobre usa la nga nati nga karnero ngan gin-andam ini para han iya bisita.” Nasina hin duro hi David kontra han riko ngan nagsiring, “Nagsusumpa ako pinaagi han buhi nga Ginoo nga angay mamatay an tawo nga nagbuhat hini! Kinahanglan pagbaydan niya hin upat ka pilo an iya kinuha, tungod han pagbuhat niya hin sugad kamabangis nga butang.”

“Ikaw amo adto nga tawo,” nagsiring hi Natan kan David. “Ngan amo ini an siring han Ginoo nga Dyos han Israel: ‘Mapatay hin makalilisang nga kamatayon in pira han imo mga panimalay ha kada katulinan, kay imo ako ginsupak ngan gin-agaw mo an asawa ni Urias. Iginsusumpa ko ha imo nga susugoon ko in usa han imo kalugaringon nga panimalay hin pagsamok ha imo. Makakasabot ka hini kon kuhaon ko ha imo an imo mga asawa ngan ihatag ko hira ngadto hin iba nga tawo; ngan makikighilawas hiya ha ira dida ha kapaw-an han adlaw. Imo ini gintago nga sala, kundi ipabubuhat ko ini ha kapaw-an han adlaw, ha atubangan han bug-os nga Israel.’”

Nagsiring hi David, “Nakasala ako kontra han Ginoo.” Binaton hi Natan, “Pinapasaylo ka han Ginoo; diri ka mapatay. Kundi tungod kay nagpasipara ka han Ginoo han pagbuhat mo hini, mapatay an imo anak.” Katapos inoli hi Natan.

Ginbuot han Ginoo nga masakit hin grabe an bata nga igin-anak kan David han asawa ni Urias. Nag-ampo hi David hin pakimalooy han Dyos nga mag-upay an bata. Nagpuasa hiya ngan kada gab-i nasulod hiya ngadto han iya kwarto ngan nahigda hiya ha salog ha bug-os nga gab-i. Kinadto ha iya an mga opisyal han iya palasyo ngan ginpabuhat hiya nira, kundi diniri hiya ngan waray gud kumaon upod ha ira.

An Pulong han Ginoo.

SALMO RESPONSORIO

Sal 51:12-13, 14-15, 16-17

℟. Tagi ako, Ginoo, hin putli nga kasingkasing.

1. Linisi an akon kasingkasing, O Dyos,

ngan pagbag-ohi ako hin mapinadayonon nga espiritu.

Ayaw ako isikway ha imo atubangan,

ngan ayaw kuhaa ha akon an imo baraan nga espiritu.

℟. Tagi ako, Ginoo, hin putli nga kasingkasing.

2. Ipahioli ha akon an kalipay han imo katalwasan,

ngan andama ako hin pagsugot ha imo.

Niyan an mga makasasala pagtututdoan ko han imo mga paagi,

ngan mabalik hira ha imo.

℟. Tagi ako, Ginoo, hin putli nga kasingkasing.

3. O Dyos nga akon magtaralwas,

bawia ako han sala han pagpatay,

ngan igsasangyaw ko nga malipayon an imo pagkamatadong.

Buligi ako pagyakan, O Ginoo,

ngan pagdadayawon ko ikaw.

℟. Tagi ako, Ginoo, hin putli nga kasingkasing.

EBANGHELYO             

Mc 4:35-41

Pagbasa tikang han santos nga Ebanghelyo sumala kan Marcos.

Han pagkagab-i hito manta nga adlaw, nagsiring hi Jesus ha iya mga tinun-an, “Talabok kita ngadto ha luyo han lanaw.” Sanglit binayaan nira an kadam-an nga mga tawo. Sinakay han sakayan an mga tinun-an diin nakadto na hi Jesus, ngan tinalabok hira. May iba nga mga sakayan didto. Inabot in makusog nga alipuros ngan ginsasakayan na an ira sakayan hin mga balod nga haros mapuno na hin tubig an sakayan. Nakaturog hi Jesus didto ha may ulin; nakakaulon hiya ha iya paghigda. Ginpukaw hiya han mga tinun-an, “Magturutdo, diri ka ba nababaraka nga magkakamatay na kita?”

Binuhat hi Jesus ngan ginsaway niya an hangin, “Hugpoy na!” ngan an mga balod, “Pagmalinaw kamo!” Hinugpoy an hangin ngan nagmalinaw. Nagsiring hi Jesus ha iya mga tinun-an, “Kay ano nga nahahadlok man kamo? Waray la gihapon kamo pagtoo?” Kundi duro gud an ira paghipausa, ngan may hinsiring ha ira: “Hin-o ini nga tawo nga nasugot man ha iya bisan an hangin ngan an mga balod?”

An Ebanghelyo han Ginoo.