Tuig A

PAGBASA I     

Sof 2:3; 3:12-13

Pagbasa tikang han Basahan ni Sofonias nga manaragna.

Pangitaa an Ginoo, kamo ngatanan nga mapaubsanon nga mga tawo han tuna, nga nagsusugot han iya mga sugo. Buhata an matadong ngan pagpaubos kamo ha atubangan han Ginoo. Bangin makalikay kamo han kastigo dida han adlaw han kapungot han Ginoo.

Bibilinan ko didto hin mapinaubsanon ngan makalolooy nga mga tawo nga madangop ha akon hin pakibulig. Diri na magbubuhat hin sayop bisan kan kanay an mga tawo han Israel nga mahibilin nga buhi, diri na magbibinuwa, o maglilimbong. Magmamainuswagon ngan himyang na hira, nga waray na nira sadang kahadlokan.

An Pulong han Ginoo.

SALMO RESPONSORIO

Sal 146:6-7, 8-9, 9-10

℟. Palaran adton kablas ha espiritu, kay ira an ginhadian han langit.

1. Amo hiya'n Magturuha han ngatanan,

han langit, han tuna, ngan han kadagatan.

Ngan an tanan nga aada ha ira man,

iya gintutuman mga ginsaaran.

Naghuhukom hiya ngan inuogopan,

adton ginsasakit ngan ginlulupigan.

Adton gutom hin pagkaon gintatagan,

mga priso iya gud ginbubuhian.

℟. Palaran adton kablas ha espiritu, kay ira an ginhadian han langit.

2. Iya ginpapakita an mga buta,

iya ginbabangon adton natutumba.

Magtadong katawhan iya hinigugma,

mga dumuruong ginmamangnoan n’ya.

℟. Palaran adton kablas ha espiritu, kay ira an ginhadian han langit.

3. Hadi gud hin kadayonan an Ginoo,

maghahadi gudman, O Sion, an Dyos mo.

Para han ngatanan nga panahon ito,

pagdayawon, pagdayawon an Ginoo!

℟. Palaran adton kablas ha espiritu, kay ira an ginhadian han langit.

PAGBASA II   

1 Cor 1:26-31

Pagbasa tikang han Syahan Surat ni San Pablo ngadto han mga taga Corinto.

Kabugtoan, panumdoma daw niyo kon ano kamo hadto han pagtawaga ha iyo han Dyos. Gutiay la ha iyo in mga mag-aram, o gamhanan, o may hitaas nga kahimtang ha katilingban sumala han panhunahuna han tawo. Gintuyo han Dyos hin pagpili han gin-iisip han kalibutan nga mga lurong basi maalohan an mga mag-aram; ngan han gin-iisip han kalibutan nga magluya basi maalohan an mga magkusog. Ginpili han Dyos an ginpapahiubos han kalibutan, ngan gintatamay, ngan ginhuhunahuna nga waray gamit, basi hisabtan nga waray gamit an ginhuhunahuna han kalibutan nga importante. Karuyag sidngon hini nga waray makakapanhambog ha atubangan han Dyos. Kundi gindara kamo han Dyos ha pakig-usa kan Cristo Jesus, ngan ginhimo han Dyos hi Cristo nga magin aton kinaadman, ngan pinaagi ha iya gin-isip kita nga matadong sa Dyos, ngan nagin baraan kita nga mga tawo han Dyos, ngan natalwas kita. Sanglit sumala han siring han Kasuratan, “An karuyag pumarayaw, kinahanglan iparayaw niya an ginbuhat han Ginoo.”

An Pulong han Ginoo.

EBANGHELYO

Mt 5:1-12a

Pagbasa tikang han santos nga Ebanghelyo sumala kan Mateo.

Han pakakita ni Jesus han damo nga mga tawo, sinmagka hiya hin pungtod ngan didto linmingkod hiya. Gin-alirongan hiya han iya mga tinun-an, ngan nagtikang hiya hin pagtutdo ha ira: “Palaran adton nakilala nga kablas hira ha espiritu, kay ira an Ginhadian han langit! Palaran adton masulob-on, kay pagliliawon hira han Dyos! Palaran adton mapinaubsanon, kay kakarawaton nira an iginsaad han Dyos! Palaran adton may dako nga tinguha pagtuman han kaburut-on han Dyos, kay patutungahon gud hira han Dyos! Palaran adton maloloy-on ha iba, kay malolooy man an Dyos ha ira! Palaran adton maglinis in kasingkasing, kay makakakita hira han Dyos! Palaran adton nagbubuhat para hin kamurayaw ha mga tawo, kay tatawgon hira nga mga anak han Dyos! Palaran adton ginpapakurian tungod nga nagtutuman hira han kaburut-on han Dyos, kay ira an Ginhadian han langit! Palaran kamo kon pagbiaybiayon, ngan pagpakurian kamo han mga tawo, ngan pagbutangbutangan kamo tungod la nga akon kamo mga sakop. Pagrayhak ngan paglipay kamo, kay dako an balos nga andam didto ha langit para ha iyo.”

An Ebanghelyo han Ginoo.